Jisálamu 132 - O Mikanda Ikola

Jipolomesa Ja Nzambi Ni Ja Davidi

Muimbu ua ngenji uia mu bheza.

¹ Jihova, tata, lembalala Davidi, ni hadi ioso ia tale;

² kioso kia lokela Jihova, anga u di hambelela kua Ngunza ia Jakobo, uixi:

³ Kia kidi kiene, mu kibuta kiami ki ngii-mu, bhu hama iami ki ngi zeka-bhu;

⁴ ki ngi xikina kuia ku kilu, mesuʼami ka badikinha;

⁵ katé ki ngi sota kididi kia Jihova kia kutula, o dibhata mu tunga Ngunza ia Jakobo.

⁶ Álaka tua ivu exi, iala bhu Efalata, tua i bongela mu mukáu ua ditutu dia Jahale.

⁷ Tu bokone mu balaka ia Ngana, tu bheze bhu bangu ia inama iê.

⁸ Balumuka, Jihova, u bhixile mu dinhohenu dié, ni eie ni álaka ia nguzu ié.

⁹ Jinganga jé ji zuate kukumbidila ni kubatula mu kidi, o athu é angene a sanzuke ni kusanguluka.

¹⁰ Mukonda dia selevende ié Davidi ua mu zola! muthu ué ua mu undu ni maji, ku mu sonokese pholo.

¹¹ Jihova ua te ni Davidi, kikutu kia mulôko, ka ẋikina dingi kualuluka; kuma uambe, uixi; Mona u tunda ku mukutu ué muene u ku bhingana bhu kiandu.

¹² Anʼé se aiuka o kikutu kiami ki nga a bhana, ni ijila iami ioso i nga-nda ku a longa, ni ku mululu ni ku mulaula nuka ku kamba mukua muiji ué, u xikama bhu kiandu kié, katé ku hádia ni hádia.

¹³ Mukonda Jihova ua solo Ziione; kiene kididi kiê kia kutunga kia mukala ku muẋima.

¹⁴ Iú uambe, uixi: Diene dinhohenu diamʼidi, katé ku hádia ni hádia; bhenhabha nga kubu muene, kuma kiene ki nga solo.

¹⁵ Ngi sokolola muene ni kuvula kuoso o idima iê, katé, ni jingadiama kúdia ku a kuma.

¹⁶ Jinganga jê ngi ji zuika kubhanduluka; akua bhata momo, a zanzuka, ni kusanguluka!

¹⁷ O kutena kua nguzu ia Davidi, muenhomo ku kuia-ku dingi; ngi sendela kandeia phala o muthu uami nga mu undu ni maji.

¹⁸ Nguma jê ngi ji zuika jisonhi ni kusebuka; o muene-phe kitundu kiê ki kala mu luendela.