Jisálamu 119 - O Mikanda Ikola

Azediua oso Aiuka o Ijila Ni Mabatuilu Ma Ngana Nzambi Alef

Alef

¹ Azediua ió oso a iukila kiambote mu njila, mu kuenda a kaiela o ngonge ia Jihova.

² A lungu ió aiuka o umbangi uê, a mu u sota muene ni muẋima uoso.

³ Euá, a fula muene kubhanga ima ia kubhengalala, maji a kuata kuenda jinga mu jinjila jê.

⁴ Eie ua tu bhana o phangu ni ndongo phala tu kuate muanu mu ku i aiuka.

⁵ Tamano ngi di fikidila mu uendelu uami, anga ngi tena muene kukuata o ijila ié ioso.

⁶ Jisonhi-phe ki jeje ku ngi kuata, mukonda o itumu ié ioso nga i te muene muẋima.

⁷ Ngi ku sakidila, Ngana, ni muẋima uemana nzanza, se nga zubha ku di longa o ifundisu ié iatetuluka.

⁸ Ngi i kuata muene, o ijila iê, nga diondo, eie kana ku ngʼehelela.

Bet

Bet

⁹ Munzangala ua diiala u di zelesa kiebhi o uendelu? Ki kale u di langa kiambote, kala kiambe o maka mé.

¹⁰ Nga ku soto, tata, ni muẋima uami uoso; ku ngʼehelele kúxia o itumu ié ni ngʼila muengi.

¹¹ Maka mé nga a kondeka moxi dia muẋima uami, phala eme ngi lémbue ku ta kituxi kokué.

¹² A ku tanese, Ngana, u Jihova; u ngi longe o jimbambe joso ji ua xindi.

¹³ Mizumbu iami ia kuata mukumbi ua kutanga o kufundisa kua dikanu dié, kuma kuasokelela kuoso.

¹⁴ Nga sanguluka mu ku kutuka mu njila ia umbangi ué, o jimbongo joso ja ngi kala ndenge.

¹⁵ Ngi kuata mu kubanza o jiphangu jé, ngi ta mesu ku ua jikula o jinjila jé.

¹⁶ O kutonoka kuami, ngi suka bhu mbambe ia mixinda ié; o maka mé ku muẋima uami, ka-nda kúbhua-ku.

Gimel

Gimel

¹⁷ Ngi bhandulule, Ngana, ngi laie, ngi selevende ié; phala ngʼijiie kualuka o maka mé.

¹⁸ Ngi jikule o mesu, phala ngi mone madiuanu mósueke mu mukanda ua ngonge ié.

¹⁹ Ngi nzuángiza ngó mu ngongo mumu; itumu ié i tukuluke muene, ki iile kala a ngi suekela-iu.

²⁰ Muenhu uami ua iokojoka mukonda dia hânji ia kuijiia o matendelelu mé jithembu joso.

²¹ Eie, Ngana, u bazela akua izala ni kuhalumuka kuoso; u a ta mázui, oso a dianguka ni kuxibhaka o ijila ié.

²² Eme-phe ngi katule o môndo ni malebhu; kuma o umbangi ué nga u kuata muene.

²³ Jingungu kioso ki ja xikamene ni ku ngi ta ikutu, selevende ié-phe ngixi, ngi xingeneka ioso i ua xindi eie.

²⁴ Maumbangi mé ue mene ma ngi kala mu vondadi, mene ma di bhange o jindongixi jami, ji ngi bhana o kaiula.

Dalet

Dalet

²⁵ Muenhu uami ua fufujuka mu mavu; ngi phaphumune kala kiambe o maka mé.

²⁶ Nga ku kundu o mauendelu ami oso, eie-phe ua ngʼivu, ua ngi vutuila; ngi longe o ijila ié.

²⁷ Ngʼijidise o njila ia mutendelu ué; phala ngi kale mu xinganeka jinga o madiuanu mé.

²⁸ Muenhu uami ua botomoka ni lamba; eie-muène u ngi bhana nguzu ka kiambe o maka mé.

²⁹ O uendelu ua makutu u ngi xale bhua lebha; maji o ngonge ié ngi bhane-iu muene ni kulenduka.

³⁰ Eme nga solo uendelu ua ufiiele; ima ioso i ua tetulula nga i bhake muene ku mesu.

³¹ Nga naminina ku umbangi ué; Eie, u Jihova, kana ku ngi kuatesa jisonhi.

³² Uendelu ua itumu ié, ngi u kuata muene ni lusolo, kioso, eie Ngana, ki u ngi kudisa o muẋima moxi. He

He

³³ Ngi longe, u Jihova, o njila ié kioso ki ua i xinda, eme ngi i kuate muene katé ku ia suku.

³⁴ Ngi bhane kilunji, ngʼaluke o ngonge ié; ngi ta-ku muene muẋima uami uoso.

³⁵ Ngʼendese, Ngana, mu hoka ia itumu ié; kuma muene mua ngi kala o kusanguluka kuami.

³⁶ Muẋima uami u zuame ku umbangi ué, ki u zuame ku ima ia luimbi.

³⁷ Ngi katule mesu mu kutala ima ia ulalu, u ngi bhane huii mu kenda o njila ié.

³⁸ Kumbidila jiplomesa jé kua selevende ié, uala kuinda kukaiela o uoma ué.

³⁹ Ngi katule o kusebha kuala ku ngi kuata uoma, kuma o kutetuluka kué-eie kua uabha.

⁴⁰ Ngi tale, ki ngalʼiki, kuma ijila ié iene i ngʼinda jinga; ngi suinise, Ngana, mu kukumbidila kué.

Vau

Vau

⁴¹ Jihenda jé jize ji ngi sange, u Jihova, ni kubhuluka kuene ku tuevila ku maka mé.

⁴² Phala ngi kale ni kia kuvutuila ió uoso u ngi ta môndo, kuma mu maka mé muene mu nga di fikidila.

⁴³ O uanji ua kidi kié, kana ku ngi katula-u mu kanu diami; kuma nga dielela eie ki uene kubatula o milonga.

⁴⁴ Nga solo ngi kaiela ngonge ié sé kufula, katé ku mbambe iê ʼté ku hádia ni hádia.

⁴⁵ Ngenda jinga muene mu ikoka iatu, kuma o ijila ié iene i nga bhindamena.

⁴⁶ Ngi tanga jinga o umbangi ué, ni bhu pholo ia jingana, jisonhi ki ji tena ku ngi kuata.

⁴⁷ O kutonoka kuami, mbambe mu itumu ié; kuma ioso eie i ua tumu, iene ia ngi uabhela kiavulu.

⁴⁸ Maku ami nga a leka mu kuxikana o itumu ié, ioso i ua xindi, ngi kala jinga mu ku i xinganeka.

Zain

Zain

⁴⁹ Lembalala, Ngana, o kikutu ki ua ta ni selevende ié, kuma eie ua ngi dielelesa.

⁵⁰ Kiene kia ngi bhetula o muẋima mu kubhita mu jiphaxi, mukonda o maka mé, ene a ngi bhana o muenhu.

⁵¹ Akua izala a ngi tobhesa muene kiavulu; maji o ngonge ié-phe, ki nga i lueza.

⁵² Ioso ia ua lekelʼeie tunde mʼokulu, iene i nga lembalala, u Jihova; iene ia ngi tululula o muẋima moxi.

⁵³ Maji nga thathamana muene kiavulu, mu kumona athu abhukumuka, kioso kia bhumina o ngonge ié.

⁵⁴ Maka ma kaiula ké, ma di bhange ene o mimbu iami ia kuimba, mu inhunginu iami mumu, mu ngala kubhita.

⁵⁵ Dijina dié, u Jihova, ngi di xinganeka muene ni mu usuku, o ngonge ié nga i te ku muẋima.

⁵⁶ Muene mua ngi kala o kuzediua kuami, mukonda o jiphangu jé, nga ji bhake muene ku muẋima.

Het

Het

⁵⁷ Jihova muene dikânda diami di nga solo; nga ki tange muene kuma, ngʼaluka o maka mé.

⁵⁸ Nga diondo ni muẋima uami uoso, ngi kale mu kiadi kié; ngi lendukile, Ngana kala ki ua ki tanga jinga.

⁵⁹ Nga xinganeka kuoso ku ngi bheka o jinjila jami, ngixi-phe kota inama iami i kutuke mu kaiula ké.

⁶⁰ Nga bhange lusolo, ngixi nguami kulaleka, ngi kale mu tumaka o itumu ié.

⁶¹ Mikolo ia ísueia ia ngi bhidile muene; maji eme-phe o ngonge ié ki ia ngi jimbi, kana.

⁶² Ni mu kaẋi ka usuku, ngi balumuka mu ku ku ximana, mukonda o kufundisa kué kuoso kua tetuluka.

⁶³ Ngi dikamba dia ió oso a ku kala ni uoma, oso ene mu ku tumaka o ijila ié.

⁶⁴ U Jihova, oxi iezala ni jimbote ja kiadi kié, ngi longe, Ngana, kioso ki tu di tuma.

Tet

Tet

⁶⁵ Selevende ié ua mu bhanga jinga mbote, eie u Jihova, kala ki tua sange mu maka mé.

⁶⁶ Ngi longe kutongoloka ni kukala ni kilunji; kuma o itumu ié nga i xikana.

⁶⁷ Kioso ki nga kexile, eie kua ngi beta luua, nga sotele kujimbila; maji kiki-phe, maka mé nga ma kuata muene.

⁶⁸ Eie, Ngana, u muthu uambote, u bhanga o mbote iene; ngi longe o kaiula ka jingonge jé.

⁶⁹ Akua izala a ngʼona kiavulu milonga; maji eme-phe ni muẋima uami uoso, ngʼaluka o ijila ié.

⁷⁰ Ene mixima iâ ia nete kala banha, ki i moneka kiáxi; eme-phe ngonge ié iene ia ngi kala mu vondadi.

⁷¹ Kima kiambote, muene kia ngi talesa o hadi; phala ngi di longe o kaiula ka jingonge jê.

⁷² Ngonge i tunda mu kanu dié nga i mono kota mu kuta, o jisaku ja itadi ia ulu ni phalata, ndenge.

Jod

Jod

⁷³ Maku é ene a ngi bhanga, ia a ngi sokejeka; ngi bhane kilunji kia ku di longa o itumu ié.

⁷⁴ Oso akua uoma ué, a sanguluka mu ku ngi mona mesu, mukonda ngi muthu nga dielela ku kizuelu kié.

⁷⁵ Nga kʼijiia muene, u Jihova, kuma o mabatuilu mé ma kidi kioso; o ki ua ngi talesa hadi, ua ki bhange muene ni ufiiele.

⁷⁶ Nga ku diondo-phe, kiadi kié ki ngi nhohese-ku hanji, kala ki ua bhana o kizuelu kua selevende ié.

⁷⁷ Jihenda jé, Ngana, ji ngi sange, phala ngi laie; kuma o ngonge ié, iene i ngi bhana o kusanguluka.

⁷⁸ Akua izala ió, a kuatese jisonhi; kuma a ngi bhange phulu, sé kikuma; eme-phe ngi kana kuxinganeka mu ijila ié.

⁷⁹ Oso akua uoma ué, a tale jipholo ko kuami, mbé ejiie kioso ki kala o umbangi ué.

⁸⁰ Eme-phe muẋima uami u iukile mu mixinda ia jingonge jé, phala ku pholo ki ku ngʼize kukakuka, sonhi ni ji ngi kuata. Kaf

Kaf

⁸¹ Muenhu uami ua senduka ni ku kinga o ubhulukilu ué, maji kizuelu kié nga ki dielela.

⁸² Mu mesu muala ku ngi bhita-bhita kiá, mukonda ngʼandeka okulu ni kutala ku kizuelu kié, ngala kuila: Ngana hinu u ngi tukulukila bhebhi, mu ku ngi konda o malamba?

⁸³ Mbata nga di bhange kala mbinda ia kibha, ia nhiengena bhu dixi; maji ku kaiula ké, ki nga jimbi-ku.

⁸⁴ Izuua ia selevende ié, ií iia ngoho ni kunana, kizuua kuxi-phe ki u bhesa o kaxtiku kua ió ala ku ngi zukutisa?

⁸⁵ A kua izala a ngi kandeia madiela, athu ka xikina kubhanga kala kiala mu ngonge ié.

⁸⁶ Itumu ié ioso-phe ia kidi; ene a ngi zukutisa sé kikuma; Eie, Ngana, ngi kudile.

⁸⁷ Kua kambele ngó, ene eje ku ngi jimisa o mbutu mu ngongo; maji eme-phe, ijila ié ki nga xikina ku i xa.

⁸⁸ Ngi bhane nguzu iobhe mu kiadi kié, Ngana Nzambi; umbangi ua dikanu dié, ngʼijiie kiambote o ku u aiuka.

Lamed

Lamed

⁸⁹ U Jihova, maka mé ma kuata ku diulu, ki bhuala u tena ku ma tumbulula, katé ku hádia ni hádia.

⁹⁰ O ufiiele ué u bhixila ku miji ni miji, kala ki ua iudika oxi ií ia kuata, ia nange.

⁹¹ Katé ni lelu ima ioso ii nangʼiii, mukonda eie kiene ki ua tumu; mbata ima ioso kifua jiselevende jé, i ku tumaka eie.

⁹² Se nga kambele vondadi ia kukala mu ngonge ié, hinu nga buila kiá ukulu, mu kaẋi ka jiphaxi jene ku ngʼiza.

⁹³ Nuka ijila ié ia kà ngi jimba, mukonda muene, Ngana, mu a ngi bhela o muenhu.

⁹⁴ Eie-muène ua ngʼivu, ngi bhulule, Ngana, kuma ngi ué; mukonda o ijila ié nga i bhindamena muene.

⁹⁵ Athu abukumuka a ngi batamena phala ku ngi jikinisa; maji eme-phe ngi kana kuxinganeka o umbangi ué.

⁹⁶ Nga mono kuila ima ioso né iauabha, hanji kua i kambe; maji o kitumu kié-phe, ki kiene mbambe.

Mem

Mem

⁹⁷ Ngonge ié ku ngi uabhela kuahi! Ngi i xinganeka kumbi dioso dia kambàmba.

⁹⁸ Eie, mu itumu ié u ngi bhana kuijiia, jinguma jami ndenge; kuma o jinguma ki jene mu kamba.

⁹⁹ Nga beta kutongoloka, jimesene jami joso ndenge; mukonda-phe dia kuxinganeka o umbangi ué.

¹⁰⁰ Ngejiia muene, ni adiakimi a ki lémbua, mukonda nga kuata o ijila ié.

¹⁰¹ Njila joso jaiibha, nga fulu ku ji enda, phala ngi di longe o maka mé.

¹⁰² Jindóngo jé nga ditunu ku ji xia ni ngʼila muengi; mukonda eie ua ngi longo kiá.

¹⁰³ Maka mé nga a lola, o kutouala kuahi ngó! ene a beta kutouala, o uiki ndenge, mu kanu diami.

¹⁰⁴ Mu ijila ié muene mu nga kuatela o kilunji; njila ja kujimbidisa eme nga di zembe na-ju.

Nun

Nun

¹⁰⁵ Maka mé kandeia ka inama iami, muanga u ngi muikina mu njila.

¹⁰⁶ Nga loka muene, nga-nda ku ki jijila, kuila o ijila ié ia kidi nga-nda ku i aiuka jinga muene.

¹⁰⁷ Nga bhondalala kiavulu muene, u Jihova phe ngi bhane dingi muenhu kala ki uambe ku maka mé.

¹⁰⁸ Xikina, Ngana, nga ku diondo, ioso i nga ku bhakuila ni dikanu diami, u ngi longe kioso ki kala o mabatuilu mé:

¹⁰⁹ Muenhu uami ithangana ioso kifua nga u zenzeka bhu maku, maji o ku ngonge ié ki ngi jimbi-ku.

¹¹⁰ Isueia a ngi tela mukala; maji o ijila ié ki ngi i lueza.

¹¹¹ Umbangi ué uene u nga tambula kuma undundu uami sé thembu, mukonda uene ua ngi bhana o kusanguluka mu muẋima.

¹¹² Muẋima uami nga u lungisa mu kualuka o jingonge jé, mu hádia ni hádia katé ku mbambe.

Samek

Samek

¹¹³ Nga di zemba ni akua mixima iiadi; maji o ngonge ié ia ngi uabhela muene.

¹¹⁴ Eie u dilengelu diami, u ngubu iami ia ku ngi xitila; nga dielela kizuelu kié.

¹¹⁵ Ngi tundidienu bhu mbandu, enu mua solo kubhanga kiaiibha, mukonda ngʼandala kubhaka o ijila ia Nzambi iami.

¹¹⁶ Ngi fikidile, Ngana, kala kiala mu maka mé, phala ngi laie; ki ngi fule dingi kioso ki nga dielela, anga ngi xalela ni jisonhi.

¹¹⁷ Eie se u ngʼimika, ki ngi dibhale dingi, kana! Ngi kale jinge mu xila o ilekelelu ié sé ngó kulueza.

¹¹⁸ Eie, Ngana, u buakulula oso a dianguka mu ilekelelu ié, nʼela muengi, kuma o kudinganala kuá makutu oso.

¹¹⁹ A bhukumuka mu ngongo eie u a kita dixidilu dia kutexe; eme-phe kiene kia ngi katela o umbangi ué.

¹²⁰ Xitu ja ngi teketa mukonda dia uoma ué, kuma o kufundisa kué, Ngana, ku kôla.

Ain

Ain

¹²¹ Eme nga kumbidila o kidi ni kuiuka; kana-phe ku ngʼehelela kua ió andala ku ngi bhanga usuéia.

¹²² Eie-muène, Ngana, u kala u dílemba dia selevende ié dia ku mu bhanga mbote; kuehele akua izala ku ngi bhondeleka.

¹²³ Mu mesu mú ngi vunda ni kutala mu kukinga o ubhulukilu ué, ni kizuelu kié kia ku ngi batuila o milonga.

¹²⁴ Selevende ié mu bhange kala ki tuma o kiadi kié, u ngi longe ioso i ua lekelela.

¹²⁵ Ngi selevende ié muene; ngi bhane kilunji, phala o umbangi ué ngʼu ijiie kiambote.

¹²⁶ Dikumbi dieza kiá dia eie u Jihova kukalakala; kuma ene o ngonge ié a i somboka kiavulu.

¹²⁷ Eme-phe itumu ié nga indi muene, ulu ua ngi kala ndenge, né ulu muene uafina.

¹²⁸ Kala kiki, o ijila ié nga i mono kuiuka mu ima ioso; njila ioso ia makutu nguami na-iu dingi.

Pe

Pe

¹²⁹ Umbangi ué, Ngana, madiuanu! kiene muẋima uami ki ua u bhakela, iu ua u lundu.

¹³⁰ Bhua jimbuluila o maka mé a muika, a zelesa; ni ió ua tobho a mu bhana kuijiia.

¹³¹ Nga bhane mu kanu diami ni kuhaha; mukonda dia hânji ia kukuata o itumu ié.

¹³² Ngi tale kunu ku ngala, u ngi lendukile, kala ki uene kubhanga oso a zola o dijina dié.

¹³³ Ngʼendese o makanda mami mu njila ia maka mé; kana dingi kituxi ni ki ngi tolola.

¹³⁴ Ngi kule ku ubhika ua athu mu ngongo; phala ngi kale mu kualuka o jindôngo ja ijila ié.

¹³⁵ Pholo ié i ngi muikine ngi selevende ié, uende ni ku ngi longa kioso ki tu di tuma.

¹³⁶ Kisoxi muene kiala ku ngi buabumuka mu mesu kala ngiji, mukonda dia athu kubhumina o ngonge ié.

Tsade

Tsade

¹³⁷ Eie, u Jihova, o muthu ua kuiuka, o kufundisa kué kuoso kua kidi.

¹³⁸ Umbangi ué u ua tubhula ua tetuluka muene, uezala kitongola katé bhu mbambe.

¹³⁹ O muanu uami, hinu u ngi dia! Mukonda o jinguma jamiʼojo nguauâ kusuua o maka mé.

¹⁴⁰ Maka mé ma zele, sé ngó dixilu; selevende ié kiene kia a zolela kiavulu.

¹⁴¹ Nga tolo muene, ki ngalʼiki, ngi muthu a ngi tobhesa; maji o ijila ié ki i ngi jimbi, kana.

¹⁴² O kuiuka kué kuiuka ku nangenena; o ngonge ié kiene o kidi.

¹⁴³ Phaxi ni lamba ia ngi kuata muene; maji o kubindumuka kuami kuala mu itumu ié.

¹⁴⁴ O kuiuka kua umbangi ué, kua kalʼé, ki kua kà bhua-ku dingi; ngi bhane-phe kilunji, nda ngi laie.

Kof

Kof

¹⁴⁵ Nga di kola ni muẋima uami uoso; ngʼivue u Jihova, ngʼaluke o ilekelelu ié.

¹⁴⁶ Nga di kola ko kué, ngi bhulule, Ngana, ngi kaiejele muene mu kaiula ké.

¹⁴⁷ Munhá ngó, mu makolombolo, eme ngi dikola kiá, mukonda maka mé nga ma dielela.

¹⁴⁸ Ngi fula kilu mu usuku, né ola kiluua i bhana, mbebhu o kuxinganeka o maka mé.

¹⁴⁹ Ngʼivue o dízui diami, nga ku diondo mu kiadi kié; u ngi bhetule o muẋima, mu phangu ja mabatuilu mé.

¹⁵⁰ Enhó andala ku ngi bhanga o phulu, a zukama kiá, ngonge ié a i xi, a baluka dikanga.

¹⁵¹ Eie-phe ua ngi zukama, u Jihova; o ima ioso i u tuma eie, iene ia kidi.

¹⁵² O umbangi ué ió, nga kʼijiia tunde okulu kuma kima ki ua zuela, kia kolo muene, ki ki tena dingi kusangunuka.

Res

Res

¹⁵³ Ngi tale ki nga bhondalala, u ngi bhandulule; kuma ngonge ié, iene i nga te o muẋima.

¹⁵⁴ Ngi fundile milonga iami, u ngi kule mu ubhika; u ngi bhane muenhu uobhe, kala ki ua ki tanga.

¹⁵⁵ Oso abhukumuka o kubhuluka ku a kala dikanga, kuma ioso i ua lekelela eie ene ka i suu.

¹⁵⁶ Jihenda jé, u Jihova, javulu kinéne; ngi bhane muenhu uobhe mu kutetuluka kué.

¹⁵⁷ Avulu muene alu ngi zukutisa, ni iá a ngi zembe; maji eme o umbangi ué-phe, uene hanji u nga kaiela, ki nga u lueza.

¹⁵⁸ Ki nga mono ió a dianguka, eme kia ngi iibhila muene; mukonda ene ka mu kualuka o maka mé!

¹⁵⁹ Eme-phe ngi tale, kuma ioso i ua tendelela, eme ia ngi uabhela muene; u Jihova, ngi bhane muenhu mu kulenduka kué.

¹⁶⁰ Tunde ku dimatekenu katé ku dizubhilu, maka mé kiene o kidi; kioso ki ua tetulula eie, muxinda bhu ndanji, ka ki lungulula dingi.

Sin

Sin

¹⁶¹ Ilamba ia ngi zuididika sé kikuma; maji ku muẋima uami-phe, ngala ni uoma ua maka mé.

¹⁶² Nga sanguluka mu kuívua o maka mé, kala muthu ua bongo mbole ia dikota.

¹⁶³ O kubhuma kua ngi iibhila, ku suke muene koko! maji o ngonge ié-phe nga i zolo muene.

¹⁶⁴ Lusambuadi ku kizuua ngi kala mu ku ku ximana, mukonda dia kuxinganeka o kuiuka kua mabatiulu mé mambote.

¹⁶⁵ Kutululúka kuavulu ku kala kua ió oso a zola o ngonge ié; phala ene, kana-ku kima ki tena ku a diangula.

¹⁶⁶ U Jihova, nga dielela o kubhuluka ku tunda ko kué; o itumu ié, ngene ku i kumbidila muene.

¹⁶⁷ O muenhu uami uene mu kualuka o umbangi ué; kuma uene u nga bhindamena kiavulu.

¹⁶⁸ Ijila ié nga i kuata muene kumoxi ni ma-umbangi mé; mukonda o jinjila jami joso, ja tukuluka ku mesu mé.

Tau

Tau

¹⁶⁹ Kudikola kuami, Jihova, ku ku bhixila bhu pholo ié; ngi bhane kutongoloka kala ki ua ki tanga.

¹⁷⁰ O kusamba kuami, ko kué muene ku nga dionda; ngi kudile bhu kíbhidi kala ki uambe, Ngana.

¹⁷¹ Mizumbu iami i kale mu ku ku imbila; mukonda eie ua ngi longo o jiphangu jé.

¹⁷² Dimi diami di kuate mukumbi uê ua kuimba; kuma o itumu ié ioso ia kidi ni kulunga.

¹⁷³ Lukuaku lué luize mu ku ngi kuatekesa, kuma eme nga solo muene o ijila ié i ua xindi.

¹⁷⁴ O kubhuluka kué, u Jihova, nga ku kuatela o hânji; mu ngonge ié muene mua ngi kala o kuzediua kuami.

¹⁷⁵ Muenhu uami u laie, u kale mu ku ku ximana eie; o kutetulula kué ku ngi kuatekese.

¹⁷⁶ Ku nga tundu nga jimbila kala mbudi; selevende ié Ngana, mu sote; kuma o itumu ié ki nga i jimbi kana.