Jisálamu 118 - O Mikanda Ikola

Kusakidila Ngana Nzambi Uene Mu Bhesa Kikóue Ku Athuʼê

¹ Sakidilenu Jihova, kuma muene mukua mbote; mukonda jihenda jê ki jene kúbhua.

² Izalaiele a ki ambe dingi, kuila o jihenda jê ki jene kúbhua.

³ Dibhata dia Alá a ki ambe dingi, kuila o jihenda jê ki jene kúbhua.

⁴ Oso ala ni uôma ua Jihova a ki ambe ue dingi, kuma jihenda jê ki jene kúbhua.

⁵ Bhu kíbhidi bhu nga kexile, nga dikola kua Jihova; Jihova uetaia, ua ngi bheka bhu kididi kiadisanze.

⁶ Jihova uala bhu mbandu iami, ki ngi kala dingi ni uóma; hé kima, muthu u ngi bhanga-hi?

⁷ Jihova uala bhu mbandu iami, kumoxi ni iá ala ku ngi kuatekesa; nga-nda kumona kia ngi bhanga o jivondadi kua ió a ngi zembe.

⁸ Kota kudielela kua Jihova, kana kudielela ku muthu.

⁹ Kota kudielela kua Jihova, kana kudielela o ilamba mu ngongo.

¹⁰ Akua jixi a ngi kondolokele, ni ku ngi salumukina; maji mu dijina dia Jihova-phe nga a batela bhoxi.

¹¹ A ngi salumukina muene a tona, ni ku ngi kondoloka; maji mu dijina dia Jihova-phe nga a batela muene bhoxi.

¹² A ngi salumukina kala jinhuki; maji a jimi kala túbhia tu uamena mu minha; kuma mu dijina dia Jihova nga a batela muene bhoxi.

¹³ Eie ua ngi nenguna muene ni nguzu phala ku ngi bhalesa; maji Jihova phe ua ngi kuatekesa.

¹⁴ Jihova muene nguzu iami, muene mukumbi uami; mukonda muene ua ngi bhulula.

¹⁵ Ivenu! ku jifundu ja athu aiuka kuala dízui dia kukola kikóue; kuma lukuaku lua Jihova lua bhange undanda!

¹⁶ Lukuaku lua Jihova lua di leka, lukuaku lua Jihova lua bhange undanda!

¹⁷ Ki ngi fu dingi, ngi laia muene; hé nga kà jimbuila athu kioso ki kalakala Jihova.

¹⁸ Jihova ua ngi bhe muene kaxtiku kavulu; maji ka ngʼehelela ni ngi fue.

¹⁹ Ngi jikuidienu o mabhitu a kuiuka, a kutula o mazelele, ngi bokuene bhobho, nga kà sakidile Jihova.

²⁰ Iá ene o mabhitu a Jihova; kikale athu aiuka, ene ngó a kà bokuena-bhu.

²¹ Ngi ku sakidila muene, kuma eie ua ngʼitaia; ua di bhange kiá u mubhuludi uami.

²² O ditadi dia ditunu jimesene ja kutunga, dia di bhange diene o mútue ua kuatesa bhu thungi.

²³ Kienhiki, Jihova ua ki bhange, ki kia dʼijiia ngó; ku mesu mʼetu-phe kisunji!

²⁴ Kizuua kia leluʼiki Jihova ua ki tungula; phala tu sanguluke, tu tumbujuke ni ngalasa, mu kizuua kienhiki.

²⁵ Tu bhulule, u Jihova, tua ku diondo, tu bhane kiá o kubhanduluka, tua ku diondo u Jihova.

²⁶ A tane-ku ió uoso uiza mu dijina dia Jihova; tu sange Ngana! Tua mi menekena tunde mʼonzo ia Jihova mumu.

²⁷ Jihova muene Nzambi ietu, ua tu bhana o mukengeji; sata ia fesa kutenu-iu mikolo, mu i bheke katé bhu jimbinga ja kalatódio.

²⁸ Eie-eie u Nzambi iami, eme ngi ku sakidila jinga muene; eie-eie u Nzambi iami, eme ngi ku jîngisa jinga.

²⁹ Enu mundu sakidilenu Jihova, kuma muene mukua mbote; mukonda jihenda jê ki jene kúbhua.