Jisálamu 116 - O Mikanda Ikola

Kusakidila Nzambi Mukonda dia Henda Iê

¹ Nga zolo Jihova, mukonda ua ngʼivu dízui diami ni kudionda kuami.

² Mbata ua ngi bhetamena dítui; kala kiki, ngi dikola jinga kua muene, kioso ki ngi laia ni muenhu.

³ Mikolo ia kalunga ia ngi bhidile, misusu ia kúfua ia ngi kuata; nga sange phaxi ni lamba!

⁴ Bhenhobho anga ngi dikola mu dijina dia Jihova, ngixi: U Jihova, tata, nga ku diondo, ngi bhulule o muenhu uami.

⁵ Jihova ua lenduka, u idikiza ujitu ni uthu; Nzambi ietu mukua henda.

⁶ Jihova uene mu langa ió atobho; nga bhondalalele kiá, maji ua ngi bhulula muene.

⁷ Tunda-ku, muẋima uami, uize u nhohe bhabha; kuma jimbote ja ku bhanga Jihova ja nzungule.

⁸ Kuma eie Jihova, ua ngi kudila o muenhu uami mu bòmbo dia kalunga, ua ngi kondona o masoxi mu mesu, ua fudisa o inama iami kuẋangumuka, mbé ki ngi di bhale.

⁹ Ngʼenda kiá bhu pholo ia Jihova, kʼulu dia mundu kunu, kua tunga athu a muenhu.

¹⁰ Eme nga xikana, kiene ki nga zuelela, sumbala nga tate;

¹¹ nga zuela-phe ngó lusolo, ngixi: Athu oso, mbé makutu!

¹² Kiki-phe ngi bhakula kima kiahi kua Jihova, mu mbote joso jene ku ngi bhanga?

¹³ Ngi kuata o dikáu dia kubhuluka, hé ngi hingila mu dijina dia Jihova.

¹⁴ Ngi futa jipolomesa jami, ji nga plometela kua Jihova, ngi ki bhanga muene bhu pholo ia mundu uê uoso.

¹⁵ O Kúfua kua muthu uê ua mu solo, ku mesu a Jihova phelo ia nzaji.

¹⁶ U Jihova, ni kidi kiene ngi selevende ié; ngi selevende ié, monʼa kahatu ké, eie-muène ua ngi jituna bhu ophi ia ubhika.

¹⁷ Ngi ku satela sata ia kusakidila, ngi hingila jinga mu dijina dia Jihova.

¹⁸ Ngi futa jinga jiplomesa jami, ji nga polometela kua Jihova, ngi ki bhanga muene bhu pholo ia mundu uê uoso;

¹⁹ Mu lumbu lua inzo iangene ia Jihova, mu kaẋi ké eie, u Jeluzaleme. Ximanenu Jihova.