Jisálamu 115 - O Mikanda Ikola

O Ujitu Uafuama Ngó Nzambi

¹ Etʼuetu kana, u Jihova, etʼuetu kana; eie-ku a ku tumbula o dijina ni fuma, mukonda dia henda ié ni kidi kié.

² Phalahi ki bhinga matumbu a kèla, Nzambi iâ iú kuebhi?

³ Etu Nzambi ietu-phe uene mu diulu; mukua kubhanga ioso iandala.

⁴ Iteka ia ene phalata ni ulu, ima ia kalakala athu ku maku.

⁵ Ikala ni makanu, maji i kamba kuzuela; mesu sai, maji ki i tena kumona.

⁶ Ikala ni mátui, maji i kamba kuívua; mazulu sai, maji ki i tena kuívua dizumba;

⁷ Ikala ni maku, maji ki i kuata kimbamba; inama sai, maji ki i tena kuenda; mba bhu xingu iâ bhu tunda ngó dízui dioso-dioso, lémbua!

⁸ Ki kala o iteka iene, ki kala oso a i bhanga; ki kala ue ene oso a i dielela.

⁹ Eie Izalaiele, dielela kua Jihova; muene dikuatekesu diâ, ngubu iâ.

¹⁰ Enu dibhata dia Alá, dielelenu kua Jihova; muene dikuatekesu diâ, ngubu iâ.

¹¹ Enu mu akua uôma ua Jihova, dielelenu kua Jihova; muene dikuatekesu diâ, ngubu iâ.

¹² Jihova ua tu te dingi muẋima; u tu benzela; u benzela dibhata dia Izalaiele; u benzela dibhata dia Alá.

¹³ U benzela oso akua uôma ua Jihova, ni jindenge ni makota.

¹⁴ Jihova a mi sokolole dingi kiavulu, ni enu ni anʼenu.

¹⁵ A mi zediuise kuala Jihova, ua bhanga o diulu ni ixi.

¹⁶ Diulu, diulu diangene dia Jihova, maji o ixi-phe, ua i bhana anʼa athu.

¹⁷ Madifundu kene kuximana Jihova, mba athu oso a jikinina mu dikuluma.

¹⁸ Maji etu-phe tu tumbula Jihova, tunde kiki katé ku mivu ki ià-bhua. Ximanenu Jihova, (Haleluia).