Jisálamu 114 - O Mikanda Ikola

O Isunji Kia Tundu Izalaiele Mu Ijito

¹ Kia tunda Izalaiele mu Ijito, ni dibhata dia Jakobo, mu matumbu a dingula;

² Juda ua di bhange muiji uê ukôla, o Izalaiele kilômbo kiê.

³ Kalunga kioso ki ka mono, ka mu lenge o pholo; menha ma Njolodá ma vutuka kua tundu.

⁴ Milundu ia petajaka ni ngalasa kala ilumbe ia jimbudi, tuthuthulundu tua tonoka kala tuana tua ibhaku.

⁵ Ihi kia ku kuata, u kalunga ka lenge? ni eie u Njolodá, ua vutuka o menha kua tundu?

⁶ Mu milundu mua petajaka kala ilumbe ia jimbudi? mu tuthuthulundu mua tonoka kala tuana tua ibhaku?

⁷ Teketa muene u ixi ia kimi, bhua ku tukulukila muene Ngana, bhu ua mono o pholo ia Nzambi ia Jakobo.

⁸ Ua tenene kuila, o ndanji i kituka dijiia, o ditadi diakolo di di bhanga otho ia ngiji.