Jisálamu 112 - O Mikanda Ikola

0 Kuzediua kua Muthu Uaiuka

¹ Haleluia! Ua lungu o muthu ió uene ni uoma ua Jihova, ua bhindamena kuijiia kiambote o ijila iê,

² Anʼê a kala mazonda mu ngongo, muiji ua ió emana o mixima nzanza, u zediua.

³ Mʼonzo iê mu kala kubhanduluka, mu kala jimbongo; o kuiuka kuê kuemana kua di fikidila muene katé ku hádia.

⁴ O muthu uaiuka, ni mu kitombe kúkia mukengeji uê; u kala mukua ujitu, mukua henda, mukua kiadi.

⁵ U mona mbote, muthu u kala mukua kiadi, u bhandulula akuá; imbamba iê ioso u i endesa ni kutetuluka.

⁶ Muthu ió uemana kididi, ka mu lundumuna; u xia dijina, a mu lembalala jinga o kuiuka kuê.

⁷ Ka kala ni uoma ua ku mu tudila njimbu iaiibha; kuma muẋima uê ua di fikidila ni kudielela Jihova.

⁸ Muẋima uê ua kuata bhu kididi, ka kala ngó ni hele; ua kinga ku mu bhanga jivondadi, kua ió oso a mu hamena.

⁹ Kʼemina, maji u bhana, u uanena o jingadiama; ka kuata sonhi, o mútue uê u bhetuka muene ni kijingo.

¹⁰ O kisuéia-phe u ki mona mesu, hé ki mu iibhila; hinu u kokota mazu, u botomokena bhobho; kuma o vondadi-phe ia kisuéia hádia a i kakula.