Jisálamu 11 - O Mikanda Ikola

Kudielela o Ubatuilu ua Nzambi

Ua Mesene Ngimba. Mukumbi ua Davidi.

¹ Kua Jihova kuene ku nga lengela! Enu-phe muala ku ngʼila kiebhi, tuka lusolo kala kanjila, uà kale ku milundu kuná?

² Ku ki mono? kisueia-ze ua zenga kiá o uta ua mufula, ua iudika kiá musongo, ua u te kiá ku ngoji phala muthu ua iuka muẋima a mu ase mu usuku.

³ Se madisesa oso ala ku a bula-bhu, o muthu ua kidi-phe u bhanga kiebhi?

⁴ Jihova-phe uala hanji mu Tembulu ie ikôla; Jihova kiandu kiê kia xikama ku diulu; mesuʼê a tono muene ni kengelela, o ibhebhetela iê iala mù tonginina kiambote anʼatu mu ngongo.

⁵ Jihova u tungula athu, ni iá a mu xila ni iá a bhumu; uoso-phe ua bhumu, uandala ituxi, muene u di zemba-nê.

⁶ Enhó a bhumu hinu u a nokesa mvula ia makala ku thandu diâ, ni túbhia ni xofidi, kumoxi ni kitembu kia kibhungu kia dikota; ene o mahitula a a lungila mu nganza iâ;

⁷ Kuma Jihova uaiuka, uinda ioso i kala ia kuiuka; oso emana miẋima nzanza, ene ngó a kà monà pholo iê.