Jisálamu 109 - O Mikanda Ikola

Kusamba Mukonda dia Jinguma Jaiibha Kinéne

Ua Mesene Ngimba, Mukumbi ua Davidi.

¹ Kana kudixibha, u Nzambi ia diximanu diami!

² Kuma o dikanu dia kiiala kiabhumu, dikanu dia mukua makutu, dia jikuka mu ku ngi zuela kiaiibha; a ngi tatela ima ki nga i bhange.

³ Ene a ngi kondo ni maka a unguma, a ngi balukila ni ku ngi lua, sé ngo kikuma.

⁴ Mu ku a zola, ene-phe a ngi kanena ni unguma; eme-phe ngi kala mu a sambela.

⁵ Mu mbote i nga a bhange, ene a ngi vutuila phulu; ua a zolo, ene a mu zembe.

⁶ Muenhó, mu tele kisuéia ku pholo, phala a mu longe; bhu kale mutatedi u mu imanena ku madilu.

⁷ Kioso kia fúnda, a mu mone kuêla; o kudionda kuê ngó ku kale kituxi.

⁸ Izuua iê, a i fikise; kididi kiê bhu kale muthu uengi a ki tambule.

⁹ Anʼê a kale jihukunhi, o muhatuʼê mutudi.

¹⁰ Anʼê a kale anhungani a hatu, ende ni, kubhinga jimola; o dibhata diê di kale ngùndu, ene ende ni kunhunganena ku makanga.

¹¹ Mukua kúdia mangonha a mu bhûnde ima ioso iala-na-iu, akua makanga a mu bhûnde ima ioso ia kalakala.

¹² Ki bhu kale muthu u mu kuatela henda; mba bhu kala muthu u xinganeka anʼê ala mu uhukunhu.

¹³ Muiji uê u batuke muene, ubhue-ku; ku mona ni ku mulaula a a jimune o majina mu ingo ia vumu.

¹⁴ Jihova ende ni kuxinganeka jinga muene o kubhukumuka kua jitata jê; o kituxi kia manhʼâ ka ki jimune, lémbua!

¹⁵ O ikuma iâ i kale jinge muene ku mesu a Jihova, phala ende ni kuvuza o ijimbuete ia dilembalesu diâ, ia xi mu ngongo.

¹⁶ Mukonda o muene ue ka xikina kukuatela henda; ni ngadiama ni phulungu ua mu zukutisa jinga muene, mukua kikote kia muẋima u mu bhondeleka muene, phala ku mu jibha.

¹⁷ O kuxinga jindaka, uene o mukumbi uê; kiki muene a lebhuke ue! o kubhana dibesá ki kua mu ijidila, dibesá-phe dia mu lenge!

¹⁸ U ta mázui kala kiene o kizuatu kiê kia zuata; ma mu bokone-phe ku muẋima uê-muène kala menha, ma mu bhixile muene ku ifuba kala maji.

¹⁹ O mázui ma mu kale kiá kala dibeka diê dia di futu; ele muene kala phonda iê iene kukuta mu mbunda.

²⁰ Nganhu iâ i kale kienhiki, ia tambula kua Jihova, oso ene ku ngi zembʼó, hé a ngi tatela ima iaiibha ku muenhu uami.

²¹ Kala-phe u dilemba diami, eie Ngana, Jihova, mukonda dia jihenda ja dijina dié; ngi kudile, Ngana, mukonda kulenduka kué kua uabha.

²² Mukonda ngi ngadiama, ngi phulungu, a ngi kuama katé ni muẋima moxi.

²³ Nga soko ni kizúzumbi kia ngoloxi, kia lebhela kiá kuié; ngi takujuka ngó kala dihoho diia mu tudila dikanga.

²⁴ Mukonda dia kujila kúdia, jiphuna jala ku ngi teketa ni nzala; o mukutu uami ua muia ni kubhela.

²⁵ Ki ngalʼiki ene a ngi bhanga kasekelu; ela a ngi mona, a kubuakesa ku mítue.

²⁶ Ngi kuatekese-phe eie u Jihova, u Nzambi iami! ngi bhulule mu jihenda jé javulu, ji uene na-ju!

²⁷ Mbé a ki mone kuma lukuaku lué luene lua kalakala; nʼa kʼijiie kuma eie u Jihova ua ki bhange.

²⁸ Ene a te-â o jihasa, kabasa eie u ngi zediuisa; oso ala mu ngi balumukina, jisonhi ja-nda ku a kuata; maji o selevende ié, u kala mu tana.

²⁹ Ene oso a ngi balukilʼó, a zuate kujingunuka, jisonhi jâ ji a vungine kala dibeka dia di futu.

³⁰ Eme-phe, ngi sakidila jinga Jihova, ngi suina muene o dízui; ngi mu ximana muene mu kaẋi ka mundu.

³¹ Kuma ua tate-ó, muene u mu imanena ku madilu; mu ku mu bhulula kua ió andala ku mu êlesa, mbé nʼa mu jibha.