Jisálamu 108 - O Mikanda Ikola

Nzambi Ubhana Kikóue Ku Mundu Uê

Muimbu ua Mukumbi ua Davidi.

¹ Muẋima uami ua di iudika, eie u Nzambi, muẋima uami ua di iudika! Ngi kuimbila, ngi kuimbila ku ku ximana ni vondadi ioso. Phaphumuka, eie muẋima uami!

² Phaphumuka eie kakoxi ni mbànza! Eme-muène ngi di meneka kuila kiluua ngó kúkia.

³ Muʼaxaxi ka madiembu, ngi ku sakidila, u Jihova; ngi ku ximana ni kuimba bhu pholo ia akua jixi jengi.

⁴ Kuma jihenda jé ja vulu, o ditala dia maúlu ndenge; o kidi kié kia somboka o matuta oso a di leka.

⁵ Zangalala, Ngana, u Nzambi, ku thandu dia maúlu, o fuma ié i tunde o fuma ioso mu ngongo.

⁶ Mukonda anʼé a jihenda a bhingi ku a kudila, tu bhulule ni lukuaku lué lua dilu, u tu vutuile.

⁷ Nzambi ua zuela mu kuzela kuê kukola; eme-phe ngi tana-ku! o ixi ia Xikeme ngi i uana, mukáu ua Sukote ngi u ta jimbambe,

⁸ Ngileiade uami eme, Manasa ue uami; Ifalaíme kijinga kiami kia ku ta ku mútue; o Juda mbasá iami ia ungana.

⁹ Muabhe kitutu kiami kia kudisukuila; mua Edomo muene mu nga tula o sabhatu iami; Fidíxia nga mu tolola, ngi mu kola kikóue.

¹⁰ Kilolo nanhi u ngi bheka mu mbonge iakolo? nanhi u ngi songuela mu kuia katé kua Edomo?

¹¹ Manhi kʼEie-muène, u Nzambi, ua tu ambudisa? Eie, Ngana Nzambi, manhi ufula kiá kubheka o ifuẋi ietu ku ita?

¹² Tu bande, Ngana, phala tu lende o jinguma; kuma o ku di banda kua athu, kingoho!

¹³ Mu nguzu ia Nzambi tu bhanga muene undanda; kuma muene u titidila o jinguma jetu bhoxi.