Jisálamu 107 - O Mikanda Ikola

DIVULU V ( Jisálamu 107—150 ) Nzambi Muene Ubhulula Mu Makutata Moso

¹ Ximanenu Jihova, o mbote iê iene mu bhanga; mukonda o jihenda jê ki jene kúbhua.

² Oso a a kula kuala Jihova, a mu tumbule, ió oso a a kula bhu maku a nguma.

³ Ni iâ muene a bhongolola ni ku a takana ku jixi, ku thunda ni ku mazanga, ku suku ni ku sulu.

⁴ Kuma enhá mu kikangalakata mua texikile, anga a kala mù bunganena mu jinjila ja hatu; dibhata dia tungu o muthu ka di mono.

⁵ Nzala ia a te, o dinhota dia a kuata, o muenhu uâ moxi ua-lu sota kubhua-mu.

⁶ Bhenhobho a dikola kua Jihova mu lamba diâ, muene hé u a kudila mu kubhondalala kuâ.

⁷ Hé u a songuela mu njila ia iuka, katé kia bhiẋila-nâ ku mabhata kua tungu athu, mu sanzala mua fuama ene kukala.

⁸ Tamano-phe a ximana jinga Jihova, ni kuxinganeka jimbote jê, ni madiuanu oso ene mù bhanga ku anʼathu mu ngongo!

⁹ Kuma o muẋima ua dinhota, u u bhanga o jivondadi; o muẋima ua nzala, u u ikutisa ni ima iambote.

¹⁰ Sai ni iá a xikamene muʼavundu, mu kizenji kia kalunga, kuma a a kuika mu kikote ni jifelu,

¹¹ Mukonda a kitukila o maka ma Nzambi, Suke-ku kia a longo kilunji, nguauâ ku mu ívua.

¹² Kiene kia bhekela o ku a tolola muẋima ni ubhika; o kia di bhukana, a dibale, u a kudila a mu tokoka.

¹³ Bhenhobho a dikola kua Jihova mu lamba diâ, muene hé u a kudila mu kubhondalala kuâ.

¹⁴ Muene u a katula mua vundu ni mu kizenji kia kalunga, malubhambu ma a kutile, u a batujula.

¹⁵ Tamano-phe a ximana jinga Jihova, ni kuxinganeka jimbote jê, ni madiuanu oso ene mù bhanga ku anʼathu mu ngongo!

¹⁶ Kuma o mabhitu a utadi uakolo, ua ma bulu-ê, o jifelu ja a jikile, ua ji bukujula.

¹⁷ Sai amoxi-mu, mukonda dia kudianguka kuâ, a kala ni mahaxi, a kata muene, a tala hadi.

¹⁸ Kúdia kuoso kua a ludila, kʼandala dingi; kuma a zukama mu bòmbo dia kalunga.

¹⁹ Bhenhobho a dikola kua Jihova mu lamba diâ; muene-phe u a kudila mu kubhondala kuâ.

²⁰ U tuma o kizuelu kiê, hé u a saka, u vutula o muenhu uâ, phala ki u di bote mu kina.

²¹ Tamano-phe a ximana jinga Jihova, ni kuxinganeka jimbote jê, ni madiuanu oso ene mù bhanga ku anʼathu mu ngongo!

²² A mu satele jisata ja kusakidila, o ikalakalu iê a i tumbule ni kuimba ni kusanguluka.

²³ Oso ene mu kutuka muʼalunga mu jinaviiu, hé a tela o mauenji ku musanza ua kulu ua menha;

²⁴ Enhá ala jimbangi ja ikalakalu ia Jihova, ni misanu iê ku thandu dia menha mazongo.

²⁵ Kuma u tuma, hé u bheka-ku o kitembue kia suína, anga ki balumuna o mabhuku mê.

²⁶ A banda kala a mu-ia ku diulu, hé a kulumuka kala a mu laukila mu imakungu ia makota! O miẋima iâ ia bhotomoka mukonda dia hele ni uoma ua imʼiii.

²⁷ A kala ni munhunga, a bhendujuka kala jihólua, jindunge jâ joso ja a muangana.

²⁸ Bhenhobho a dikola kua Jihova mu lamba diâ, muene-phe u a kudila mu kubhondala kuâ.

²⁹ U bhangesa kuila o kibhungu ki batama, o mabhuku mê hé ma di xibha.

³⁰ Ene-phe a tana-ku, mukonda kua tululuka; kindala a kuaka bhu ndundu bhuala kuinda, muene ua a bheka bhu ditabhu dia muẋima uâ.

³¹ Tamano-phe a ximana jinga Jihova, ni kuxinganeka jimbote jê, ni madiuanu oso ene mu bhanga ku anʼathu mu ngongo!

³² A mu tange o fuma bhu kionge kia mundu, a mu tumbule bhua xikama adiakimi, o ikulakaji.

³³ Muene jihonga ja menha ua ji kitula mukáu ua kisekele, o bhu otho ia ngiji bhueza mavu a kukuta.

³⁴ Ixi ia vudile kuima, ua i bhange phându ia môngua, mukonda dia kubhukumuka kua athuʼê a tungu-mu.

³⁵ Bhuamukuá, o mukáu ua kisekele u u kitula izanga ia menha, o ku mavu akukuta, ku fuáfua jingiji.

³⁶ U bhangesa iá akua nzala, a iudika-bhu sanzala bhenhobho, hé a tunga, a soma muene.

³⁷ A dima mábhia, a phapha mivide, anga a katula-mu mákudia mandumba.

³⁸ Ku dibesá diê, a di sokolola muene kiavulu; o ibhaku iâ, ki i tebhunuka, lémbue!

³⁹ Maji bhuamukuá a sosoloka dingi, a tunuka muene, mbebhu o ku a bhondeleka, ni uíndua, ni lamba.

⁴⁰ Anʼa jingana u a lunduluila kabaxa, anga u a bhangesa kubungana, mu kikangalakata mua kambe o njila.

⁴¹ Maji-phe o phulungu u mu katula mu lusebu, hé u mu tudika ditala dia ujitu, u mu sokolola o muiji kala kilunga kia ibhaku.

⁴² Emana nzanza kia ki mona, a sanzuka ni ngalasa; maji o ku mbandu joso isuéia a a jika makanu.

⁴³ Uoso ua tongoloka muẋima a xinganeke o imʼiii, ende ni kubatekela kiambote o jihenda ja Jihova.