Jisálamu 106 - O Mikanda Ikola

Izalaiele Ka Sakidila O Jihenda Ja Nzambi

¹ Haleluia! Sakidilenu Jihova; kuma muene mukua kubhanga mbote; mukonda o jihenda jê ki jene kúbhua.

² Nanhi u tena kutanga o ikalakalu ia undanda ua Jihova? Mba, nanhi utena o ku mu ximana nʼa zubha?

³ Azediua ió oso a kumbidila o kidi kia fuama; ni ió izuua ioso a bhanga o ima iaiuka.

⁴ Eme-phe, u Jihova, ngi xinganeke ni vondadi iambote kala ki uene kubhanga o mundu ué; ngi sange bhu ngala phala u ngi bhulule.

⁵ Phala eme ngi mone ue o kubhanduluka kua athu é angene, mbé ngi sangulukile kumoxi ni mundu ué; phala eme ue ngi zangalale ni undundu ué.

⁶ Ituxi tua i ta jinga kala o jitata jetu, tua bhange muene kuxibhaka ni kubhukumuka; tua bhange muene kiaiibha.

⁷ Jitata jetu ka tongolola kiambote, o madiuanu mé, mʼoxi ia Egito; ka xinganeka dingi o nzungule ia jihenda jé, maji a ku kuata phata, bhu ndundu ia kalunga, xi, bhene bhu Kalunga Kakusuka.

⁸ Maji kiene kimoxi, muene ua a bhulula mukonda dia dijina diê, phala o undanda uê a u ijiie;

⁹ Kalunga Kakusuka ua ka temena, ka kukuta; iú ua a bhitisa koxi a menha kala ku mukáu kuala.

¹⁰ Ua a kudila bhu lukuaku lua ió ua a kanena jinga; ua a tambula bhu maku a ngungu-a-nzumba.

¹¹ Menha a bhita ku thandu dia jinguma jâ; né muthu umoxi ngó ka subhuka-ku.

¹² Bhenhobho a xikana kiua o maka mê; anga emba hanji ni ku mu ximana.

¹³ Kindala-phe o ikalakalu iê ia a jimbiʼê kiá; nguauâ dingi kubhinga o kaiula kê.

¹⁴ A kala ni luimbi luavulu mu kikangalakata, Nzambi a mu kuatesa phata mu ixi ia kisékele.

¹⁵ Muene anga u a bhana kia Seme o vondadi iâ, maji ua a bhana ue kukonzama kua mixima iâ moxi.

¹⁶ A kala ni difutu dia Mozé bhu kilombo, ni dia Alá, o muthu uangene ua Jihova.

¹⁷ Mavu anga a jikuka, hé a minha Datana, o dianda dia Abilamo a a lambela mu dikungu.

¹⁸ Kua uama túbhia mu junda ia mundu uâ; a bhukumukʼó auka ku mulengo.

¹⁹ Anga a iudika kangombe ka ulu ku mulundu ua Holebe, hé a bheza o kiteka kia utadi uóuiẋike.

²⁰ A xia ió ukôla, ua a bhana kijingo, a kôlesa o kidifua kia ngombe, mukua kúdia iangu.

²¹ Nzambi, Mubhuludi uâ, a mu jimbi; Ió ua bhange o ima ia matunda mu Ijito;

²² ni madiuanu mʼoxi ia Hame, ima ia undanda muene i kuata uoma, bhu ndundu ia Kalunga Kakusuka.

²³ Kia mu bhangesa kuila, uixi: Ngʼa buikisa; ua a bhana o muenhu Mozé, muthu uangene, uemana bhu kaẋi ni ku a diondela, katé o njinda iê ua i lungulula iela muengi, iu ua fudisa o ku a buikisa.

²⁴ Ixi iauabha ia edikiza anga a i nongena, nguauâ kuxikana o kizuelu kiê.

²⁵ A hina-hina ngó ni kulongolola mu jifundu jâ muala; o kuívua dízui dia Jihova, a ditunu.

²⁶ Muene anga u loka ni kuzangula lukuaku, uixi: Ngʼa a buidisila mumu, mu kikangalakata,

²⁷ uixi anʼenu hinu ngʼa sebulula muʼaxaxi ka matumbu, ngʼa muanga-muanga mu jixi joso.

²⁸ Anga aia dingi mu ku di ta kua Bahale-Piiole; hé a dia o jisata ja satela o iteka iafu.

²⁹ Mu kienhiki, a mu kuatesa njinda ni imbamba iâ ioso ia bhange; katé kueza dingi kibuika kia dibhebhu muʼaxaxi kâ.

³⁰ Bhenhobho bhua zanguka Finehase, anga u kumbidila o kidi; kibuika anga ki sukama, ki bhua-ku muene.

³¹ Anga a mu lungisa, exi ua kumbidila muene, hé u xala ni kikutu kia unganga unangenena.

³² Anga a mu lokalalʼâ dingi, bhu menha ma Medibah, katé ni Mozé kua mu iza uíndua mukonda dia êne;

³³ mukonda a mu thathamesa o muẋima moxi, anga ni mizumbu iê u zuela lusolo, ki kiene kia tokala.

³⁴ Mu kuiza-ku ue, o matumbu ka a buidisa, kala kia a tumine Jihova;

³⁵ maji a di lungu-nâ mu umatumbu uâ, anga a di longa o ifua iâ iaiibha.

³⁶ A bheza o iteka iâ, ia di bhange mubhetu, anga a fua mu múkala uâ.

³⁷ Ni anʼâ a mala ni anʼâ ahatu a a satela uâ ku madimonho.

³⁸ Iá a ẋamujuna manhinga, sé ngó kikuma, o manhinga ma anʼâ ene, ni a mala ni a ahatu; anʼâ a a satela muene o iteka ia Kanana, o ixi anga a i ta o lúfuku lua manhinga.

³⁹ Kienhiki kia di bolesa ni imbamba iâ, a di bhange jindumbu mui ibhangelu iâ.

⁴⁰ Kia bhangesa o njinda ia Jihova kuuama kala túbhia, kia tala ku povo iê; ni undundu uê ua mu kuata fokoso.

⁴¹ Anga u a thelekala bhu maku a matumbu; oso a a zembe, a kala mu ku a tumina,

⁴² Jinguma enda ni ku a bhikisa, ene hé a toloka, a belesela bhu maku ma jinguma jâ.

⁴³ Luavulu muene Ngana ua a kudila; maji ene-phe kene kunanga mu kuxibhaka, enda ni kutunuka mu kudianguka kuâ,

⁴⁴ Kiene kimoxi, muene u a suua mu kubhondalala kuâ, se ua a evu ia dikola kua muene.

⁴⁵ U xinganeka o kikutu kiê, hé u diela mukonda dia jihenda jê javulu.

⁴⁶ U bhangesa kuila ni ió oso a a kutu, a ambata ku a balakala, a a kala ni henda ku jinguma jâ.

⁴⁷ Tu bhulule, tata, u Jihova, Nzambi ietu, u tu bhongolole dingi ku matumbu ku tua di muangena, phala tu sakidile dingi o dijina dié, tu kole kikóue kia ku ku ximana eie.

⁴⁸ A tane-ku, Jihova, Nzambi ia Izalaiele, tunde dia tunde katé kua kʼàia; mundu uoso etaie, Amene! Haleluia.