Jisálamu 105 - O Mikanda Ikola

O Ikalakalu Ia Madiuanu Ia Bhange Jihova Kua Izalaiele

¹ Sakidilenu Jihova, hingilenu o dijina diê; kolenu ku mundu o ikalakalu iê.

² Mu imbidienu, imbenu ni ku mu ximana; tenu maka ma imbamba iê ia madiuanu.

³ Di fiiadienu o dijina diê dikola; muẋima uâ u tane, oso bhindamena kuijiia Jihova.

⁴ Sotenu Jihova, ni nguzu iê; Sotenu izuua ioso o pholo iê, sé ngó kufula.

⁵ Xinganekenu o madiuanu mê ma bhanga jinga; ni isuma iê, ni kuzuela kuê mu batula o milonga,

⁶ Enu, mu alulu a Mbalahamu, selevende iê, enu mu anʼa Jakobo, a mi sola.

⁷ Muene, muene Jihova, Nzambi ietu; muene uenu batula o maka mu ngongo ioso.

⁸ Kikutu kiê nuka ki mu jimba katé ku hádia ni hádia; o kizuelu kiê ua ki tendelela ni ku midi ia miji.

⁹ Kiene kia kikutu kia ta ni Mbalahamu, ni mulôko uê ua lokela Izake,

¹⁰ Anga u ki tonena dingi kua Jakobo, kí kia xala kijila, ni kua Izalaiele mu kikutu ki nangenena,

¹¹ Uixi: Eie-muène ngi ku bhana o ixi ia Kanana, nga ku batuila-iu, i kale undundu ué.

¹² Kiosuʼokio o mala a muiji uâ kʼa kidi luua; xi, a tolo muene, ala ngó jinzuángiza mʼoxi muenhomo.

¹³ Kia mu nhungana hanji, a xia diembu eza diembu; a tunda kua sobha iú, a sambuka ku akua ʼxi iengi.

¹⁴ Muene kehela muthu ku a bhanga phulu; ua bazela makota a jingana mukonda diâ-ene,

¹⁵ Uixi: Athu ami ngʼa undu ni maji, kana ku a kuata; o jipolofeta jami, ki mu ji kuame.

¹⁶ Uexana o nzala, hé iiza hanji mʼoxi; o kúdia kua kexe mu kudia ua a katula-ku.

¹⁷ Ua tuamekesa diiala bhu pholo iâ; muene Zuze, a mu sumbixile mu ubhika.

¹⁸ Inama iê a i kuama mu ditaka; o jifelu ja jingidinhá ja mu bokona ku muẋima moxi.

¹⁹ Katé kia bhixila bhu thembu ia mu lekelela, kizuelu kia Jihova kia mu bhake ku polova.

²⁰ Muenexi anga u mu tuma, hé u mu ehesa; Langala-ngongo, muene ua mu jituisa.

²¹ U mu ta ku pholo mù tumina o dibhata diê; muene u tambula konda ia jimbongo jê joso.

²² Phala makota ma athu a a kute, se uandala, o jitata ku mbanza, a ji longe kilunji.

²³ Izalaiele anga u kulumuka mu Ejito; Jakobo u di bhanga nzuángiza mʼoxi ia Hame.

²⁴ Muene anga u sokolola kiavulu o muiji uê, hé u a bhana kukala ni nguzu, o jinguma jâ ndenge.

²⁵ U a lungulula o muẋima phala mundu uê a u zembe, a kala ni kudimuka kua kutununa o jiselevende jê.

²⁶ U katula Mozé, selevende iê ua mu tungula, kumoxi ni Alá a mu bhana kukala-nê.

²⁷ A tubhula mabhebhu muʼaxaxi kâ, edikiza isuma mʼoxi ia Hame.

²⁸ Ua tumikisa-ku kitombe, ixi anga i bokona mua vundu; maji ene ka xikina kuívua-phe o kizuelu kiê.

²⁹ Menha â anga u a kitula manhinga, kienhiki jimbiji jâ anga ji fua.

³⁰ Mazote anga ma di vuala mʼoxi iâ ioso, katé ni mu zemba dia muenexi, a bokona.

³¹ U zuela, anga mu iza matuta ma jihamue, ni jina katé kua suku o mabhata mâ moso.

³² Bhu kididi kia mvula, u a bhana matadi; mu lekajaka túbhia mʼoxi iâ iene ioso.

³³ Ni mivide iâ, ni mifiku, ua i beta-beta: miẋi ioso mʼoxi iâ, ia bukujuka.

³⁴ U zuela dingi, anga muiza kabôtua; ni kihoho ki ki ẋikina ku ki kuata konda.

³⁵ Anga ki dia o idima ioso mʼoxi iâ, ibundu i tunda mu mavu, bhoxi i bhua-bhu.

³⁶ U jibha ana oso a phandekumbi mʼoxi iâ, ene ana a dianga, a nguzu iâ ioso.

³⁷ Mundu uê katé kia a katula mʼoxi muenhomo, ambata muene phalata ni ulu; mu miji iâ ioso ki muala diiala dia kate, mba dia kambe nguzu.

³⁸ A kua Ejito kia a uabhela, kia a mono kuia; kuma o uoma uâ, ua tula ku thandu.

³⁹ U futununa dituta, dia a bhana kilembeketa, ni túbhia tua a muikina mu usuku.

⁴⁰ Ene kia mu bhingi, u a bhekela tungumbe; u a ekutisa ni mbolo ia diulu.

⁴¹ Ua jikula mu ndanji, hé mu fuáfua o menha; mu jihonga jakukuta anga mu kunguluka jingiji.

⁴² Kuma kizuelu kiê kikôla ua ki te muẋima; ni Mbalahamu, dia selevende iê.

⁴³ Kala kiki, uendesa mundu uê ni ngalasa ioso, anʼê angene enda ni kuta nzongo ia kikóue.

⁴⁴ Jixi ja matumbu anga u a bhana-ju ene; athu engi a kalakala, ene a a bhingana;

⁴⁵ phala o itumu iê a i kuate muene, o ijila iê a i tumake. Haleluia!