Jisálamu 104 - O Mikanda Ikola

O Kuximana Nzambi Ua Bhange Ioso

¹ Tanesa, Jihova, muẋima uami, Jihova, Nzambi iami, eie ua di jingisa kiavulu; ua zuata ujitu ni ungana.

² Ua di te mukengeji kala divunga; ua futununa o maúlu kala dibeka dia balaka.

³ O mixi ia inzo ié ia thandu, ua i tula mu menha; o matuta dikalu dié; uendela ku mabhabha ma kitembu.

⁴ Muene, jiphunga jê ja katula, o milenge; o makuenze mê, milengo ia túbhia.

⁵ Ua tena kutula madisesa maʼxi katé ia kuata, ki i xikina ku i lundumuna.

⁶ Iú ua futu-ku menha mazongo kala kizuatu, menha ma bhitile ni ku thandu dia milundu.

⁷ O ki ua a tumu dingi, a lenge; evu ngó o dízui dia kinuminu kié, exi etu tu texe-ú.

⁸ Milundu anga i zanguka, makôlo a kuzuka, katé menha ma lengela mu kididi kioso ki ua a iudikila.

⁹ Ua a xindi ni mbambe iâ, ka tena ku i somboka; ka tena dingi kubobesa mikáu ku kanga.

¹⁰ Ua te ni ithu i fuafua menha mu jihonga; o jingiji ji kungulukila mu milundu.

¹¹ Kuene ku ua bhana kúnua o jixitu joso mu iangu; ni jijumendu ja mukáu ji bhuisa-bhu dinhota diâ.

¹² Mu jimbandu ni jinjila ji bhita bhulu, muene mu bhata diâ; ji didila jimbimbi jâ mu jithangu.

¹³ Ku jinzo jê ja thandu, kuene ku sonoka menha ku milundu; phala mu ngongo muizale ibundu ia tundu mu kukalakala kué.

¹⁴ U sabhukisa iangu ia kúdia kua ibhaku, ni idima i sedivila muthu phala a katule kúdia kuê mu mavu;

¹⁵ ni vinhu phala muẋima ua muthu u sanguluke, ni maji phala pholo iê i lelame, ni musa phala a kale ni nguzu mu mukutu.

¹⁶ Miẋi ia Jihova iezala sumu, miẋi ia muxitu ua Libano ia phaphe muene;

¹⁷ jinjila kuene kua tungila ikalanga iâ; dibànda-phe u tungila ku muxi ua faia.

¹⁸ Milundu ia di leka dilengelu dia jihoha, mu jindanji ngenda ia jisèle.

¹⁹ Ua iudika mbeje, i tungule o jithembu; o dikumbi diejiia kithangana kiê kia kutula.

²⁰ U bheka-ku usuku ni kuvunda kuê, iama anga i tunda mu isasa ni kuzomba.

²¹ Jindumbe ja jihoji, mu kusota mbole, anga jenda ni kuzuma, a mu bhinga kúdia kuâ, kua Nzambi.

²² Kumbi ki di tunda, ene a vutuka, a koloka mu jingenda jâ, anga a zeka.

²³ Muthu-phe u tunda mú kuata o thonga iê, u kalakala katé mu ngoloxi.

²⁴ Eie, tata, u Jihova, ikalakalu ié kuvula kuahi! Iene ioso ua i bhange ni uhete, o mu ngongo muezala ni jimbongo jé!

²⁵ Kunhá kalunga ké, kakulu, ka zongo, mualu zouela imbamba iavulu, ni iama iòfele ni ia makota.

²⁶ Muene mu endela jinaviiu; ni kibaleia ua mu bhanga phala a tonokene muenhomo.

²⁷ Ene oso-â eie-muène a ku kinga, ku a uanena kúdia kuâ mu thembu ia tokala.

²⁸ Kioso Eie ki u a bhana, a nona; ki u kotonona o lukuaku lué, ekuta ima iambote.

²⁹ Ki u sueka pholo ié, a tata; ki ua a tambula o kubhuima, afua; kindala a biluka mavu.

³⁰ Eie-phe kioso ki u a tumikisa ngó o Nzumbi ié, jixitu jiza dingi; kienhiki mu ngongo mueza dingi mienhu iengi, ngongo anga i fukuluka dingi kiengi.

³¹ Fuma ia Jihova i nangenene kienhiki! Jihova a sanguluke mu ikalakalu iê!

³² Ua bhingi se oxi u i zongola, i teketa; milundu u i bhabha, i fuafua dixi.

³³ Kioso ki ngala kulaia, ngenda ni kuimbila Jihova; ngi ximana Nzambi iami, katé bhua kà suka muenhu uami.

³⁴ O kubanza kuami kua muẋima kua muene, ku kale kua kusanguluka; ngi sangulukila jinga kua Jihova.

³⁵ Akua ituxi ende ni kubhua-mu mu ngongo, a bhukumuka a jime o mbutu. Tanesa, Jihova, muẋima uami! Haleluia!