Jisálamu 103 - O Mikanda Ikola

Kuximana O Henda la Nzambi

Mukumbi ua Davidi.

¹ Tanesa, Jihova, muẋima uami; ioso ia ngi kala moxi, i tanese dijina diê dikola.

² Tanesa, Jihova, muẋima uami, mbote jê joso ki ji ku jimbe.

³ Muene u ku loloka ituxi ié ioso; hé u saka mahaxi mé moso;

⁴ u kula muenhu ué mu diela; hé u ku zuika kiadi ni henda kala kitundu.

⁵ U ku bhana kúdia ndumba ia jimbote, katé undenge ué ueza dingi kala ua holokoko.

⁶ Jihova mukua kubatula milonga, u fúndisa kiambote oso a a bhikisa.

⁷ Jinjila jê ua jidikiza Mozé, ni ikalakalu iê ku anʼa Izalaiele.

⁸ Jihova ua lenduka, mukua kisambu, u kokoloka o kutema, o jihenda jê ji vula.

⁹ Muene ka jijila kubazela, kene mu kuila u ku tatela phonzo.

¹⁰ Ka tu bhanga kala kia fuama mu ikuma ietu, ka tu kaxtikala kala kia tokala ituxi ietu.

¹¹ Mukonda kia di leka maúlu ku thandu dia xi, kiene kia soko jihenda jê ja kuatela ió oso a mu kala ni uoma.

¹² Tunde kuthundʼèlele katé ku mazanga, mukuâ ni dikanga dia texe o ikuma ietu.

¹³ Kala tata, anʼê u a kuatela henda, kiene ue Jihova u kuatela henda oso a mu kala ni uoma.

¹⁴ Mbata uejiia kioso kia tu sokejeka, u lembalala kuma tuala tu mavu.

¹⁵ Kuma muthu izuua iê mukua ni iangu; kala kitulu mu iangu, kiene ue kia fuafua.

¹⁶ Kitembue kʼila ki bhita-ku, kia lela, kia buila; ni kididi kia kexe ka kʼijiia dingi.

¹⁷ Maji o henda ia Jihova-phe, ku i tunda, ku i ia, ki iene thembu; ia xalela ku thandu dia akua uoma uê; o ku kumbidila kuê ni ku mululu ni ku mulaula.

¹⁸ Ala na-kiu ió a kuata kualuka o kikutu kiê, ni iá a xinganeka o ijila iê nʼa i tumaka.

¹⁹ Jihova, kialu kiê kia ungana ua ki xikika mu diulu, o utuminu uê ua bhiti kuene kuoso.

²⁰ Tanesenu Jihova, mu ji-anjo jê; mu mazonda, mua xikamena muene ku mi tuma, muène mu tumaka izuua ioso o dízui diê.

²¹ Tanesenu Jihova, mu ilombo iê ioso; enu mu akua mbèle iê, mu bhanga ima ioso ia mu uabhela muene.

²² Tanesenu Jihova, enu mu ikalakalu iê ioso, ku ididi ioso ia utuminu uê; tanesa Jihova muẋima uami.