Jisálamu 102 - O Mikanda Ikola

Kubhinga Henda Ia Nzambi

Musambu ua phulungu mu kubhondalala kuê, u kuata ku di tenda kua Jihova.

¹ Ngʼivue musambu uami, u Jihova, kudikola kuami ku bhixile ko kué.

² Kana ku ngi suekela o pholo ié, mu kumbi diami dia kutata; bheteka o dítui dié kokuami, kioso ki ngi ku ixana u ngʼivue muene lusolo.

³ Kuma izuua iami iala kúbhua mukuâ ni dixi, o ifuba iami iala mu jila kala luhuinhi lua uama bhu jiku.

⁴ Muẋima uami ua xoueta, ua lela muene kala iangu; ni kúdia ngó o kadikoka kami kua ngi jimbi kiá.

⁵ Mukonda dia kuenda ni kukema, kikonda kia ngi naminina ni kiene ku ifuba.

⁶ Nga soko ni kingungu-a-xitu ku mukáu; nga di bhange kala kihutukudia mu jingûndu.

⁷ Ngi fula o kilu mu usuku, ngi kuata ku di ngunguina kala kanjila kala ku thandu diaʼnzo,

⁸ Jinguma jami ala ku ngi sekalesa kumbi dioso; oso a ngi luualelʼó a-lu-ia ni ku ngi bha malebhu.

⁹ Ngadi o uthókua kala mbolo, o ki ngi nua, mu di lunga ni masoxi.

¹⁰ Kifua nga ku iibhila kiá, ua ngi zembe kiá mukonda dia njinda ié; kuma eie uedi kala ua ngi zangumuna, eie ua ngi texe.

¹¹ Izuua iami kifua kizuzúmbia kia ngoloxi, kialebhela kiá kuié; eme-muène nga kukuta kala iangu.

¹² Eie-phe, u Jihova, u nangenena katé ku hádia ni hádia; kuma thembu ieza-bhu, ia ku mu xinganeka, ua bhixila kiá bhu thembu i ua mu xindi.

¹³ Sai bhuoso hinu bhu u balumukina, mù kuata henda ia Ziione; kuma thembu ieza-bhu ia ku mu xinganeka, ua bhixila kiá bhu thembu i ua mu xindi.

¹⁴ Mukonda, etu tu selevende jé, ni matadi mé ma tu kate, ni mavu mé henda ia tu kuata.

¹⁵ Athu mu jixi kiene kia kà kala ni uoma ua dijina dia Jihova, o jisobha ja mu ngongo anga jenda ni ku ku bhana o fuma.

¹⁶ Kioso kia mona Jihova ua tungu dingi Ziione, ua tukulula dingi o kubenha kuê;

¹⁷ Ua suu kiá o kusamba kua jihukunhu; kala mu kudituna dingi o ku di tenda kuâ.

¹⁸ Kima kiki kia bhingi ku ki soneka, phala ki xale musêndu ku alulu ni ku alaula; athu kiluua ngó a a bhanga, hádia a ximana Jihova.

¹⁹ Mukonda tunde ku ditala dia mbanza iê, muene ua zongola; Jihova ku diulu, ua talesa mu ngongo;

²⁰ phala evue o mikemu ia ió a a kuika; mbé o kujituna oso a xikamena ku a jibha.

²¹ Phala athu a tumbule o fuma ia Jihova mu Ziione, ni diximanu diê mu Jeluzaleme;

²² kioso kia kà bhongoloka o mundu ua di muange, ni ilômbo ioso phala kubhikila Jihova.

²³ Nzambi ua ngi sosolola nguzu iami mu njila mu ngejila; o izuua iami ua i selula, ki ia-nda kutena dingi.

²⁴ Ngixi-phe Nzambi iami, tata, kana ku ngʼambata luua, mukonda izuua iami ia suku hanji ngó mu kaẋi; kuma eie o mivu ié ki i tebhunuka, katé ku miji ioso.

²⁵ Eie tunde mʼokulu, eie ua tunga o disesa diaʼxi; o maúlu ufunu ua maku mé.

²⁶ Hádia ene a budika, eie-phe hanji u nangenena; a kà kuka muene kala kizuatu, ki bhinga ku ki zula, ua kà a futa-futa muene kala dikoza dia dibeka.

²⁷ Eie-phe kiene ki uene kiene; o mivu ié ki i moneka bhu ia suku.

²⁸ Anʼa selevende jé a kala bhua kondama, a tunga, a soma, o mbutu iâ ki ia kà bhua bhu pholo ié.