Jisálamu 101 - O Mikanda Ikola

Kia Fuama o Sobha Iambote

Mukumbi ua Davidi.

¹ Ni kulenduka ni kufundisa mu kidi ngi ku ta ku mukumbi; eie-muène u Jihova ngi ku imbila jinga jisálamu.

² Ngi sota kuenda jinga ni kilunji mu njila iaiuka; nga ku indi kiavulu, u ngi sanga kumbi kuẋi bhu ngala? Ngenda jinga monzo iami ni muẋima ua ujitu.

³ Ki ngi kala ni kima kia ufusa ku mesu mami; imbamba i bhanga ió adianguka, nguami na-iu! Né i sota ku ngi naminina, ngi i kukumuna.

⁴ Muẋima uadianguka nguami na-u; o ima iaiibha ki ngandala ngó ku ijiia.

⁵ Uoso uenda ni kabódio ka kutatela mukuâ, ió eme ngi mu jima o mbutu; o uala ni ukumbu ua mesu ni izala ia muẋima, ki ngi mu ehela.

⁶ Mesu ami a kala jinga mu sota o jifiiele mu ngongo, ene u ngi kala-nâ; uoso uenda ni muẋima ua ujitu ió muene u ngi sedivila jinga.

⁷ Uoso mukua kunganala ió ki ngi kala-nê monzo iami; o makua kutanga makutu, bhu mesu mami kà tena kuimana-bhu.

⁸ Izuua ioso kabasa kuaki, ngi sota kubhuisa mu ngongo oso a bhukumuka; phala ati a ituxi oso a bhue-mu mu mbanza ia Jihova.