Jisálamu 10 - O Mikanda Ikola

O kibuika kia akua phulu

¹ Ua sukila-hi ngó mu kanga, eie Ngana, u Jihova? Ua di vunginaʼhi katé ni mesu, mu thembu ia jingongo kiki?

² Isuéia, mukonda dia izala, ala kukaia ngadiama ni ku mu seia; tamano a fue ene mu míkala ia tela akuʼâ.

³ Kuma kisuéia u ta nzabala ia kimbamba kia mu kala mu luimbi luê; mukua kúdia mangonha u tènda Jihova, u mu tobhesa ni malebhu.

⁴ O muthu uaiibha, mu kubhuma kua izale iê, uila uixi: U kʼibhula mukua-hi? Anga uia ni kubanza muene, uixi: Kana-ku Nzambi.

⁵ Mu jinjila jê joso uenda ni kuzediua izuua ioso; o kubatula kua eie, u Nzambi, kua mu kala dikanga bhulu, ki kua mu bhiti ngó ku mesuʼê; oso a sota ku mu fudisa, muene u njona, u xikulula.

⁶ Ku muẋima uê, uamba kuma: O bhabha ka tena dingi ku ngi sendumuna-bhu; nga tungu muene, ki ngi bhindama dingi, lémbue!

⁷ Mu kanu diê mua muizala ni jindaka, ni makutu ni kudimuka; o koxiʼa dimi diê kuezala mangonha ni kulokalala.

⁸ U baluka mu jisanzala kala kifumbe; muthu sé ngó kikuma u mu jibhila muene mu iangu. O mesu mê ala mu sota o jingadiama a lémbua kubhânga, akuetu!

⁹ U suama ni kubatamena akuá, u butama kala hoji mu kisasa; u butamena kukuata phulungu ni ku mu bhunda; o ngadiama u fua mu uanda uê, u mu kuata hé u mu ambata.

¹⁰ U di koteka, hé ubutama muene bhoxi, u endesa akuetu o jingadiama a lémbua kubhânga, katé kia a kuata ni iala iê.

¹¹ Anga u tanga ku muẋima uê, uixi: Nzambi iú kuebhi-ze? Muene ua jimbi-ku kiá, ua di futu o pholo iê, ka-nda ku ki mona.

¹² Balumuka, u Jihova! Eie u Nzambi, zenga o lukuaku lué; Jingadiama a bhindama, eie kana ku a jimba.

¹³ Phalahi kisuéia u kala mu tobhesa Nzambi, ni kuila ku muẋima uê, uixi: Ki kuiza kima?

¹⁴ Eie-phe ua ki mono; kuma u mukua kutala o ikalakalu ia athu ni malamba mâ moso; phala eie u ki kuate muene konda bhu maku mé; eie muene hinu u zuela ku mulonga uâ; kokué kuene ku di bhakula uoso ua lémbua kubhânga; eie muene u dilemba dia jihukunhi.

¹⁵ Bukula, Ngana, o lukuaku lua kisuéia ni lua mukua phulu; solokota muene o ituxi iâ katé ki u i zubha, hé u mona muene kuila ki ku xala dingi kima.

¹⁶ Jihova eie u muenexi, o ungana ué unangenena; matumbu a kambe kuijiia Nzambi ka kà kala mʼoxi ié.

¹⁷ Eie-phe Jihova, uevu kioso kiala kuinda abelesela; eie muene ua a sungu muẋima, mu kuditenda kuâ eie u a evua.

¹⁸ Eie u kala u dilemba dia jihukunhi ni abhika, phala o muthu ua tunda ku mavu, ka di kake dingi kinéne, anga uia ni kukuatesa uoma.