Jisabhu 8 - O Mikanda Ikola

O kuximana Unjimu

¹ Abha manhi unjimu ki uala ku dikola lua vulu muene; o kuijiia kua muẋima ue ki kuala kubhana mbimbi iê?

² Ni bhu thala ia milundu, ni ku mbanduʼa njila, ni bhu jiphambu u u sanga.

³ Ni bhu mbanduʼa mabhitu a diembu, ni bhu muelu ua mbanza, ni bhu mielu iaʼnzo, u tenda u tona,

⁴ enu mu athu, enuʼenu ngala ku mi kolela! Dizui diami ngi di lungisa mu ku handekela anʼa athu.

⁵ Enu mu ilalu, di longienu ki kala o kudimuka; enu mu ioua, Sotenu muẋima ua unjimu.

⁶ Ivenu, mukonda nga-nda ku tanga ima ia uhete; o mizumbu iami ia-nda kujikuka mu ku zuela ima ia iuka.

⁷ Mbata dikanu diami di tanga o kidi, mizumbu iami ia di-zemba ni uzuelelu ua kubhuma.

⁸ Maka moso ma dikanu diami, u ma sanga mu uiukilu uê; se u ma tekula, ku sange-mu ngó ibhengele mba kubhuma.

⁹ Uoso u ma batekela kiambote, usanga kuma, maka ma kidi; oso a di longo ia a ejiia, a a mona kuiuka.

¹⁰ Xikinenu ulongelu uami, ki mu xikine phalata; kuma o kuijiia kota, o ulu ua fina uòtungule, ndenge.

¹¹ Kuma unjimu kota, o madiiamande ndenge; ima ioso inda o muthu ki i soka ni unjimu.

¹² Eme, ngi Unjimu, nga tungu bhuamoxi ni kudimuka, eme nga bongo phangu ni ndunge.

¹³ Uoma ua Jihova, o kueha kia ibha; nga di zemba ni ukumbu, ni izala, ni uendelu uaiibha, ni dikanu dizuela isunji.

¹⁴ O phangu ni ndongo, ni unjimu ua kidi, u i sanga kokuami; eme ngi kilunji, ni undanda eme ngene na-u.

¹⁵ O jisobha ki u a mona kutuminʼokio, ni ilamba kioso kia iukisa o milonga, eme-muène na Unjimu ngala ku a bha-kiu.

¹⁶ O ilamba ni atumini, eme nga a bhana o kutumina, kumoxi ni afundixi oso mu ngongo.

¹⁷ Nga zola oso a ngi zola, a di meneka mu ku ngi sota a ngi sanga muene.

¹⁸ Ni jimbongo ni kijingu, ioso iii eme ngene na-iu; ngala muene katé ni umvama unanga ni kuiuka.

¹⁹ Kibundu kiami eme kota mu kuta, o ulu ua fina ndenge, né a u zunzila kuebhiʼoko; jimbote jami eme kota, phalata ia kutungula, ndenge.

²⁰ Ngi batesa muthu mu njila ia kuiuka, ngi mu endesa muʼaxaxi ka jihoka ja kutetuluka.

²¹ Phala ngi lunduise makamba mami o jimbote ji nangenena, ni ngʼizalese o jingonga jâ ni jimbongo.

Unjimu ki u moneka dimatekenu

²² Jihova ua ngi bhanga tunde bhu diandekelu dia jinjila jê, munhá ngó uila ibhangelu iê ka i iudika luua, eme a ngi diangela ku ioso ia bhange.

²³ Tunde dia tunde, eme a ngi unda ni maji, tunde ku dimatekenu kioso ngoho oxi ka i andeka luua ku i umba.

²⁴ Ki kua kexi luua makôlo kioso kia ngi vuala eme, ki kua kexi luua majiia ezala ni menha.

²⁵ Milundu ki ia muene luua kidiki, ki kua kexi luua tu-thuthulundu, muene mua ngi vuala eme.

²⁶ Oxi iene ka i bhangele luua, mba mikáu, mba ngó dimatekenu dia fufutila ioso-ioso iai mundu.

²⁷ Muene kioso kia kexi ku polondala maúlu, eme kiá bhobho; kia kexi mu xinda o kikondoluese ku mizumbu ia mukiukuluku.

²⁸ Ni kia kexi ku xikika o matuta bhulu, kia fikidila o majiia ma mukiukuluku,

²⁹ ni kia xindila musanza ua kalunga o mbambe, phale menha mê ki ma somboke o mbambe iê; ni kioso kia kubu o madiesesa maʼxi,

³⁰ eme-phe nga kexi-nê kumoxi bhenhobho, ngi dixibulu diê; kizuua ni kizuua ngi kala ngi minangu iê, ngi kuata kusannguluka ni kukemba bhu pholo iê ithangana ioso.

³¹ Oxi-phe kioso ki ia tungu kiá, ngi kuata ku di kenha ku thandu dia xi ia kutunga ni kusoma, ngi kala ni malau mami muʼaxaxi ka anʼa athu.

³² Kiki-phe enu, mu ana, ngʼivenu, kuma azediua ió oso aiuka o ijila iami, anga a kaiela mu jinjila jami.

³³ Ividilenu kia mi longa, mu dimuke, ki mu di tune-kiu.

³⁴ Uoso muthu u ngi bhana mátui muene ua zediua, anga uia ni ku ngi xikamena bhu mielu iami kizuua ni kizuua; hé ukuata ku kingila bhu mielu bhuoso bhu ngi bokuena.

³⁵ Mbata uoso ua ngi sange eme, ua sange muenhu; ni Jihova muene ue u mu lendukila, kuma u mu bhanga favolo.

³⁶ Maji uoso u ngi ta kituxi, ua kakula o muenhu uê muene; kuma ene oso a ngi zemba eme, andala kalunga, ala mu kenga kúfua.