Jisabhu 7 - O Mikanda Ikola

¹ Eie monʼami, tata, aiuka maka mami, ijila iami kondeka-iu moxi dia muẋima ué.

² Ijila iami, aiuka na-iu muene, u mone muenhu; ngonge iami, kondeka-iu kala o anʼa mesu mé.

³ Kutila ijila iami ku milembu ié, soneka-iu ue ku dibaia dia muẋima ué.

⁴ Tangela o Unjimu, kuamba: Eie u phangʼiami ia muhatu; o Kusunguluka ne mu ambele, uixi: Eie u ndandu iami.

⁵ Enhá ende ni ku ku inga, mbé ki u mona mukajiʼa mukuenu, ni kʼiza muhatu uengi ni ku ku zeia ni maka mê.

⁶ Mbata kioso ki ngʼemanene bhu njanena iaʼnzo iami, hé ngi kuata ku zonguela mu mazungu mê,

⁷ nga mono muʼaxaxe ka ilalu, hé ngi tongolola bhuʼaxaxii ka minzangala, mukuenze umoxi, ua kambe kilunji.

⁸ Iu bhita mu nzunga katé bhu thungi, ulunga mu njila iia kʼonzo iê;

⁹ kuma kua fulamana kiá, ngoloxi kiá muene, kumbi dia koloka, ngoloxi ia lémbe kiá, o kuma kua vundu muene bui, kitombe kia usuku.

¹⁰ Ngi mona-phe muhatu iu tunda iuná, uala kuia ku mu kauidila, ni ukembu ua kiuaia, masunga ua ma te kiá ku muẋima uê.

¹¹ Muhatu muenhú, ulolo u vula, ni jimvunda; mʼonzo iê kene dingi ku nanga-mu, o inama iê ia nanga ngó ni kuenda.

¹² Kindala ua tundu, iú mu nzunga, iú bhu kitanda, uzombela kuku, uila koko, iú bhu thungi ni kuzongojola.

¹³ Ua di-bongo-nê, hé u mu bhana beju; ni pholo ia kambe o sonhi, uixi:

¹⁴ Lelu ngala ni jisata ja paze ku bhata; kuma lelu ngi kumbidila o jihasa jami ji nga di hambelela.

¹⁵ Kiene ki ngʼejiia ku ku kauidila, ni ku sota o pholo ié ni makidikidi, eme-phe nga ku bongo muene!

¹⁶ Hama iami nga i zadiʼê kiá, nga i te muene kidivunga kia muhota ni thanga ia kubolodala, ni malasola ma linho ia fina, ia tundu ku Ejitu.

¹⁷ Hama ioso muene eme nga i sangela ni uasu ua dizumba, ni uxila, ni kanela.

¹⁸ Zá-phe, tua kà sungile ni ku di fembesa usuku uoso katé kuákie; tu te hanji dibasa dietu, henda jetu jibhue.

¹⁹ Mbata munumeʼami, ku bhata kalaku; uende njila ia dikanga;

²⁰ Bhu maku uambata kasaku kʼezala kitadi; ió kuiza kuê, mbeji ki ia thethamʼiki, kikale ifua muene!

²¹ Ua mu bhombo muene kienhiki ni ʼkumba dia maka, ua mu sèndula ni mizumbu iê katé kia mu tolola.

²² Muene-phe hê uia ni ku mu kaiela mukuâ ni ngombe iia bhu dijibhilu mu ku i jibha; uia kala mbambi ia mu lengela kúfua mu uanda, mba ngulungu, ia fu bhu mubhetu.

²³ Uia muene ni kuenda katé kia mu asa o musongo mu izavu, kala njila i lengela o kuia mu fua bhu ngoji, ka kʼijiia kuila a mu kotekela mubhetu u mu dia o muenhu.

²⁴ Kiki-phe, eie monʼami, ngi bhane mátui, maka ma tunda mu kanu diami bhaka-nâ ku muẋima.

²⁵ Muẋima ué ki u di-texile ku jinjila jê-muène; ku kuate ku nhunganena mu tuhoka tua muhatu ió.

²⁶ Mukonda muene uabhalesa iu ua bûba kiá mundu ua nzungule, avulu muene a buikisa muhatu ió ku undumbu uê.

²⁷ Onzo iê kifua iene o ikoka iia mu kina, hé isombokela ni ku kulumuka muene katé mu bombo dia kalunga.