Jisabhu 6 - O Mikanda Ikola

Kutambula fiiasa kiluezu

¹ Monʼami, se ua kexila mukuenu ku pholo ia kudia dikongo, se muthu uengi eie ua mu sununuina o lukuaku lué.

² Eie-phe ua di-suikika mu uanda ua kizuelu kia tundu mu kanu dié, ua di kutu ku maka mé.

³ Inda, monʼami bhanga-phe kiki u sukunuke; mukonda eie ua di bhale kiá bhu lukuaku lua mukuenu muenhó,

⁴ mesuʼé kua ehele kuia ku kilu, o ibhebhetelu ié ku i ehele kunhoha.

⁵ Di sukunune, mukua ni mbambi bhu lukuaku lua dinhanga, uila muene kala njila ia sutunuka bhu lukuaku lua mutedi a mibhetu.

⁶ Eie u musonde, ndé kà di kunde ni xixikinha; tongolola kiambote o jinjila jê, u dimuke.

⁷ Sumbala ka moneka dikota, ka moneka fixiiadi, kene ni sobha,

⁸ hanji-phe, bhu mvula u huka kúdia kuê; o bhu thembu ia kumuna, muene ue u bhongolola idima hé u bhaka.

⁹ Eie-phe, na musonde, tata, u zeka katé bhebhi? Ola kuẋi i ua kà phaphumuka ku kilu kié?

¹⁰ O ki ua mu kuila kindala ku kilu, kindala eiʼu koxilla, kindala eiʼu bunjika maku bhu thulu phala ku zeka-ku hanji.

¹¹ Ua-nda ku tukumuka uadiama ua kuiza kala muii, o jiphaxi ja ku tula kala kiiala kia maneka.

O kubhanga phulu kiaiibha

¹² O muthu uala ni Kadiaphemba, uezala ni ituxi, uenda ni usemenhi mu kanu diê.

¹³ U bhalula ni mesu, uzuela ni inama, u bhanga ijimbuete ni milembu.

¹⁴ Mu muẋima mua mu tungu usuéia, mu ithangana ioso ufunha jindunge jaiibha, uenda ni kukuna jimvunda mu jinvunda.

¹⁵ Kienhiki utukumuka kibuika kia mu tula, anga ki mu buikisa ni lusolo katé kia jikinina, ni kubalumuka dingi ka tena.

¹⁶ Ima isamanu iii Jihova ua di zemba na-iu, o kia sambuadi-phe kua muene kisunji:

¹⁷ o mesu ma tala ni izala, o dimi di tanga makutu, o maku ma zunza manhinga ma muthu ua kambe kikuma,

¹⁸ muẋima u funha ixinganeku ia bolo, inama i sakalala mu kulenga phala kubhanga phulu,

¹⁹ o mbangi ia mangonha itanga makutu, ni mukua kuzokesa jiphange u kuna jimvunda muʼaxaxe kâ.

Munzangala a mu tendelela kulenga muhatu ua kiuaia

²⁰ Eie monʼami aiuka o kitumu kia tatʼenu, o ngonge ia mamʼenu-phe ku i ehe.

²¹ Imʼiii kutila-iu muene ku muẋima ué, u xalele na-iu mu thembu joso; nhenga-na-iu mu xingu ié.

²² O ki uia mu kunhunga, iene i ku endesa; kioso ki u zeka, iene i ku langa; o ki u phaphumuka ku kilu, ienda ni ku ku zuelesa.

²³ Kuma kitumu kandeia, o ngonge mukengeji; o kubazela kua ku ku iukisa, iene o njila ia muenhu.

²⁴ Phala ku ku langa, u bhuluke ku muhatu uaiibha, ni ku maka ma touala ma ku bhomba na-u kuala muhatu uengi.

²⁵ Uuabhelu ua pholo iê ki u ku sendule mu muẋima ué; muene kia kuata ku ku talesa, mesu mê kana ku a ehela ku ku diangula.

²⁶ Mbata muhatu ua kidianzunga, u ku xisa bhu ditala dia ku kuata kubhinga kambolo; kuma o ndumbu ia muhatu, u seia o muenhu uoso ua beta kuta kiambote.

²⁷ Mbé muthu utena kusueka túbhia bhu homba, anga izuatu iê i kamba kujikata?

²⁸ Inga muthu u tena kuendela kulu dia makala ma uama, nʼa kamba kuẋomoka inama?

²⁹ Kiene-phe kibhita ni uoso u di-bonga ni mukaji a mukuá; kà kamba kikuma, uoso ngó u mu tuta lukuaku.

³⁰ Muiii, kia nomuena kudila ngó o nzaia iê ia mu kuata, ka mu tembula.

³¹ Maji, se a mu sange, ua-nda kufuta lusambuadi; soua ioso ia dibhata diê iia-mu.

³² Maji o uoso u ta phanda ni muhatu, ua kambe kilunji; kuma mu ku ki bhanga, ua-lu jikinisa o muenhu uê.

³³ U tambula kibetu, u bonga malebhu; o môndo uê ki ua kà bhua.

³⁴ Kuma o diiala diê, kia-nda kuila ua fuluka ni difuba, mu kizuua kia kuvutula o phonzo, ka-nda kutena ku mu loloka.

³⁵ Né uedi, ngi futa kima kiahi, muene ka xikina; né ua mu vudixila maujitu, muene ka xikina ku ma tambula.