Jisabhu 5 - O Mikanda Ikola

Muhatu ua kidianzunga mu lenge

¹ Monʼami, tongolola kiambote o unjimu uami, o dítue dié dʼividile o ulongelu uami ua kuijiia.

² Nda u kaiele kioso ki ngala ku ku dimuna; o mizumbu ié i lunde o kuijiia.

³ Mukonda o mizumbu ia muhatu uengi, i zunzumuka ixila ia uiki, o mu kanu diê mu belesela muene kiambote, maji ndenge.

⁴ Maji o dizubhilu diê dʼila lokoso, di lula muene kala kingululu, di toma ku muenhu kala xibhata ia mazu aiadi.

⁵ Inama iê i kulumuka muʼalunga; O uendelu uê u lenguluka kubheka muthu mu inferno.

⁶ O njila iia ku muenhu muene ka i xinganeka; jinjila jê u ji tesa jihonda, katé ki u tokoka ku ji tongolola mba ja lungu kuebhi.

⁷ Kiki-phe enu mu ana, ngʼivienu kunu, maka ma dikanu diami ki mu a lueze.

⁸ Muhatu u kala kiki, eie mu sondoloke, eʼkana ku bhixila bhu muelu uaʼnzu iê.

⁹ Phala o jimbongo jé ku ji bhane ngoho ku akuenu, o mivu ié ki i di bote bhu maku a kisuéia.

¹⁰ Phala ki ki bhite kuila mbote jé ji bhandulula ngó athu engi; o ikalakalu i ua talela hadi, ki i bokone mu bhata dia muthu uengi.

¹¹ Eie anga dizubhilu dié dikala dia ku kumba, kioso o jixitu ku mukutu ué ki ji kuata ku di huha ni hadi,

¹² uixi-phe: Tamanu nga bhele mátui! Kokolo diami dia ku kamba kuívua kia ngi bazela jinga!

¹³ Jimesene jami kia ngi longa jinga, dízui diâ ki nga di suuile; jindongixi jami, tata, né ngó ku a bhana mátui, lémbua!

¹⁴ Sumbala mu ku zanga kuoso mundu muene ua kexi ku ngi jinguluka, ngi kala muene bhu kionge.

¹⁵ Nuá-phe menha ma kixima ki ua kande é-muène; ni ma jihungulule ji fuáfua bhu fixi ié.

¹⁶ Kifua jifiẋi jé jenda ni kubhubhila ngó mu kanga, o jihonga ja menha mé ji kungulukila muene ngó kuoso-kuoso, mu jinzunga?

¹⁷ Ji kale-phe ngó jé é muène, ki ji kale ja kisangela ni athu engi.

¹⁸ Bhʼotho ié bhu kale kuzediua! Eie enda ni ku sanguluka jinga ni muhatuʼé ua tundunâ undenge.

¹⁹ Jithulu jê ku soke mu thembu joso; a ku uabhele kala mukaji a mbambi, a ku sangulukise ni uuabhelu uê kala ua kasexi! O henda iê iende ni ku ku sunga izuua ioso katé ku hádia ni hadia.

²⁰ Monʼami, tata, phalʼahi u kala mu kusenduka ni luimbi lua muhatu uengi, anga u nhohena dingi bhu jihata ja muhatu ka ku tokala?

²¹ Mbata mauendelu ma muthu-phe mene ku mesu ma Jihova; muene ukala mu kutongesa muoso mu bhita o muthu.

²² O muthu ua bhumu-ze, ikuma iê iene ia-nda ku mu kuika; a mu kuta muene ni mikolo ia ituxi iê-muène.

²³ Ua kà fua muene mukonda dia kukamba kuívua kioso kia mu bazela jinga, ua kà jimbidila mukonda dia ulaji uavulu kinéne.