Jisabhu 31 - O Mikanda Ikola

Kaiula ni milongi ia longesa manhʼâ sobha Kemuuele kua monʼê

¹ Maka ma sobha Lemuuele, ua tokala ku Masá, ma mu longo manhʼâ ni ku mu tendelela, uixi:

² Eie Lemuuele, tata, monʼami ua phande-kumbi, nga ku ambela kiebhize? Kiebhi-ze monʼami? Kiebhi-ze tata, mona nga ku vuala mu mala diami? Kiebhi-ze, monʼami ua jiplomesa?

³ Ahatu-ze ku a handamene, kana ku a zangela o nguzu ia unzangala ué, mauendelu mê kana ku ma lungisa ku ahatu ió ene mu kutexikisa o jisobha.

⁴ Lumuuele, tata, jingana ki kia a fuama o kúnua vinhu, anʼa jingana ala kutumina ki kia a fuama o kusola makunua ma kodiuisa.

⁵ Phala ki kibhite kuila ela anua, a jimba o kitumu anga a selula o kidi kia tokala kulungisa o jiphulungu.

⁶ Kúnua ku kodiuisa bhanenu-ku ió oso a xikamena kiá o kufua, o vinhu bhanenu-iu oso ala mu kikote kia muẋima.

⁷ Mbé anue, phala ajimbe o uadiama uâ, sembele o hadi iâ ka i lembalala dingi.

⁸ Jikula o dikanu diê mu kubhângela o dibubu ualembua kuzuela, ni ió oso ka moneka dingi muthu.

⁹ Jikula muene o dikanu dié, u batule milonga mu kidi; o jingadiama ni oso a bhindama, eie batuila-u o milonga iâ mu kidi.

O Muhatu uambote

¹⁰ Muhatu ua mbote, uala ni kilunji, mukuahi u tena ku mu sanga? muenhó ua beta kota mu kuta o suilu, o matadi avulu a phelu ja nzaji, ndenge.

¹¹ Muẋima ua munumiʼê ua nhohena kua muene; muhatu iú, soua ki ia mu kamba dingi.

¹² Muhatu iú, izuua ioso ia muenhu uê, ubhanga mbote mu mbote kua muadi uê, phulu kana.

¹³ Usota lâ, ni linho, anga u kuata kukalakala ni maku mê, ni vondadi ioso.

¹⁴ Uila kala naviiu ia jingenji; kúdia kuê, ua kà ku takana dikanga.

¹⁵ Usuku hanji, muene uabalumuka kiá, iu uanena kiá akua dibhata diê o kúdia; abhikʼê a ahatu iu u a uanena kiá kia kubhanga.

¹⁶ U tongolola o kitaka, anga u ki sumba muene; uphapha mulenga ni nganhu ioso ia tundu mu kukalakala kua maku mê.

¹⁷ U di ẋiẋika o miongo ni ukuenze, u suinisa o maku mê.

¹⁸ O uenji uê ua ta, u uila muene suií, uixi: Iú ua fika, o uene ue ua uabha; o kandeia kê mʼusuku ki ka tena kujima.

¹⁹ U kuata ni maku mê ku nzelele, o makànda ma maku mê ma kuata muene ku muhongo ua nzelele.

²⁰ Ni lukuaku luê, u tambuisa uoso ua tate; o phulungu ua bhindama, u mu bhana muene, ka mu kotekela o maku mê, kana.

²¹ O mbàmbi ia neve, ki i mu kuata uoma, kuma akua mbèle iê oso muene endela mu izuatu iòfolale.

²² Muene u di tungila jithanga jê ja muhota; o izuatu iê, ia linho ia fina ni purpura.

²³ Muadi uê a mu ijiia bhu nangu dia mundu ni bhu mabhitu a imbaka ia mbonge, kioso kia xikama kumoxi ni adiakime aʼxi.

²⁴ U tunga milele ia linho ia fina, anga u i sumbisa, o jingenji bhu kibangu u a bhana jiphonda.

²⁵ Ni kuhandamana ni kukunzama iene o izuatu iê ia di zakela na-iu; uolela kia tala o thembu iala kuiza-ku ku pholo, ka kala ni uoma ua izuua ia hádia.

²⁶ Kia jikula dikanu, u zuela ni uhete; o dimi diê, diejidila kulenduka.

²⁷ U tongesa kiambote kioso kia mu kuenda o dibhata diê; ka xikina kúdia kudia ku tunda ku usonde.

²⁸ Anʼê ela a balumuka, a mu ixana, exi: Mamanhi ua zediua; kiomuène ue munumiʼê, uila u balumuka, u mu tanesa, uixi:

²⁹ Ahatu avuluʼâ ene mu kubhanga ima ia ujitu; maji eie ene oso ua a tundu.

³⁰ Kisangu-sangu ki nganala o muthu, o kuuabha ue kua mukutu kingoho; maji o muhatu-phe u kala ni uoma ua Jihova, ió muene a mu ximana.

³¹ Ku kibundu kia kalakala maku mé mu bhanienu-ku, o ikalakalu iê i mu ximane bhu mielu ia mbonge bhuala athu oso.