Jisabhu 30 - O Mikanda Ikola

Izuelo ia Angulo

¹ Maka ma Angulo, monʼa Jake; maka ma mesene. Muthu muenhó anga uambela Ithiiele, ni Ukale, uixi:

² O kutanga kidi, eme nga beta kutobha athu oso ndenge; kilunji kia muthu ki ngala na-kiu.

³ Ngedi ki nga di longo unjimu, o Muthu Ukôla ki nga mu tongolola.

⁴ Mukuahi ua bandele kiá ku diulu iu ua tuluka? Mukuahi ua koteka o kitembu bhu maku mê? Mukuahi ua kutila menha bhu kizuatu kiê? Mukuahi ua xikika o jihota joso jaʼxi? Dijina diê nanhi, mba o dijina dia monʼê nanhi, se eie ua mu ijiia.

⁵ Mbata o maka moso ma Nzambi, ma zela, ma kidi; mene o ngubu ixitila oso a mu dielela muene.

⁶ Ku bandekeze-phe kama ku maka mê, muene ua vula ku ku bazela, anga u ku mona u mukua makutu.

⁷ Ima iiadi nga ku bhingi: kiosuʼiki kiluua ngifua, ku ngʼimine-iu:

⁸ ngixi o ukumbu ngi sandule-u, ni kuzuela kua kutanga makutu; kana ku ngi bhana uadiama, kana ue ku ngi bhana umvama; inda ngi bhane ngó o kúdia kuoso kua tokala ku ngi soka.

⁹ Nga lengesa kuila o ki ngizala, ni jimbote ja ndumba, nga vula ku ku dituna kiá eie, hé ngiia, ngixi: O Jihova muene nanhi? O ki ngi kala ngi ngadiama ia ngadiádia, ngavula kunhana, kifua nga lebhukisa o dijina dia Nzambi.

¹⁰ Mubhika kana ku mu tatela bhu pholo ia ngana iê, muene ua vula ku kuta mázui, eie anga u tala o hadi.

¹¹ Sai-ku muiji ua athu a lebhula tatʼâ, o manhʼâ a tokoka ku mu tanga o mbote.

¹² Sai-ko muiji ua athu u di mona kuzela ku mesu mê-muène, o uene-phe nuka a u sukuile o dixidilu diê.

¹³ Sai-ko muiji ua athu, o mesu mâ manama bhulu, ibhebhetelu iâ a i tudika bhuluʼobho!

¹⁴ Sai-ku muiji, ala ni maju mukua ni jixibhata, o jingandelu jâ kala jiphoko, phala kujikinisa o jiphulungu kulu dia mundu, ni akua-hadi a bhondalala kiá muʼaxaxi ka anʼathu.

¹⁵ O dizaia uene ni anʼê aiadi, enhá: Bhana, Bhana! Sai ima itatu ki iene kuikuta mba iuana muene, ki iene kuila: Kuabhu kiá!

¹⁶ O mbila; o divumu dia mbaku; o mavu kene kuikuta ni menha; ni túbhia; enhá kene kuila exi: Kuabhu kiá!

¹⁷ Muthu uoso mesu mê ma kala mu bhanga kasekelu kua tatʼâ, o mamʼâ ka xikina ku mu tumaka, muthu ió ilombelombe ia honga hinu i mu lokola-nâ, anga anʼa jiholokoko a ma dia.

¹⁸ Sai-ku ima itatu ia mu ngi di uanesa, o kia kauana ki nga kʼijiia:

¹⁹ O njila ia holokoko bhulu; o njila ia nhoka bhu ndangi; o njila ia naviiu muʼaxaxi ka kizanga kia kalunga; o njila ia diiala ni monʼa kilumba, ki a di endesa.

²⁰ Kiene ue o njila ia muhatu mukua jiphanda; muene uila udia, u kondona ku dikanu diê, uixi-phe: Emeʼamʼiú, ki nga teʼami kituxi.

²¹ Sai-ku ima itatu ibhangesa oxi ku di vunza, o kia kauana oxi ki itena kusoka na-kiu:

²² kia mubhika ku kala ku usobha ua kutumina; kia kiôua ku kala ni kúdia kua di xala;

²³ kia muhatu a mu senge anga u sakana dingi; ni kia mubhika ua muhatu ku kala muene o mulundudi ua ngana iê ia muhatu.

²⁴ Sai-ku ima iuana iofelefele mu kutola kulu dia mundu, maji o kudimuka-phe kuahi ngó;

²⁵ jixixikinha, muiji ua kambe o nguzu, hanji-phe o bhu thembu ia mvula bhene kiá bhua bhongolola o makudia mâ;

²⁶ jisèle, muiji ua kubhuila muene, hanji-phe mabhata mâ a ma iudika muene ku matadi mu jindànji.

²⁷ Kihoho, ki kiene ni sobha, hanji-phe mu kutunda kuâ a di ta muene ku ibuka-ibuka.

²⁸ O nzengèdia u di kuatenena ni maku, maji hanji-phe, u tunga muene mu mazemba ma jingana ni jisobha.

²⁹ Sai-ku ima itatu o kuenda kuá kua di uabhela, tata! o kauana-phe u nama muene kiambote kiná!

³⁰ O hoje ua tunda o iama ioso ku nguzu, kuoso kua lunga pholo uia ngó, ki kuala kima ki xikina ku mu vutula-ku;

³¹ O kolombolo dia sanji, kiendela ku inama iiadi; o kisutu kia hombo ue; ni muenexi kia ẋinuka.

³² O ki ki kala eie ua bhange usuéia, ua di zangeleka, mba ua kana kima kiaiibha, bateka o dikanu dié ni lukuaku.

³³ Mukonda o kukama lete, kuzunza matheka; o kutukuta dizulu, kubhubhisa manhinga; o kutunha o njinda, ku vulumuna jimvunda.