Jisabhu 28 - O Mikanda Ikola

¹ Isuéia a di ta ku lusolo, nè-mbe ua a landemeka ka moneka; maji o athu oso a iuka-phe, a di fikidila kala hoje ia munzangala.

² O ixi, mukonda dia ikuma iâ, utuminu uê u vula jingana; maji kioso-phe ki uiza bhu maku ma muthu umoxi uadimuka, uala ni kilunji, utuminu uê u nangenena.

³ Ngadiama ku ulamba, kia huha o jiphulungu, u difua ni mvula ia kibhungu i jibha jimbutu, mʼoxi hé muiza nzala.

⁴ Oso a xisa bhu mbandu, kioso kia xindi o kitumu, kifua a ximana o isuéia; oso-phe a lunda o kitumu ni ku ki bhanga, isuéia ala kuzoka na-iu.

⁵ Athu a bhumu, o uendelu ua ngonge ia kuiuka, ki utena ku a jimbulukila; maji oso-phe a sota Jihova, ima ioso ia tetulukila kiambote.

⁶ Ngadiama, ua kambe mangonha, uala kota ku ujitu; muthu uabhumu, né-mbe u kala mvuama, ndenge.

⁷ Uoso uaiuka o ngonge, muene njimu ia mona; maji o kamba dia jingandixi, ubheka jisonhi kua tatʼâ.

⁸ Uoso u sokolola o jimbongo jê mu ku vualesa kitadi kia sobhesa, ni kubhunda-bhunda ngó akuâ, ua-nda ku ji bhongoluela ió uoso uene mu kala ni henda ia ngadiama.

⁹ Uoso o mátui mê u ma landukisa, nguaiê kubatekela mu kuividila o ngonge, katé ngó ni musambu uê, u kituka kisunji kiaiibha kua Ngana!

¹⁰ Muthu uoso u bhangesa kuila athu a iuka u a luezesa anga a kutuka njila iaiibha, muene-ku ua-nda kúfua mu diêla diê dia kande; maji athu aiukʼó, o mbote a i lundula muene.

¹¹ O muthu kia kala mvama, ku muẋima uê u di mona kudimuka; maji o ngadiama uala ni kilunji uejiia ku mu tungununa.

¹² Athu aiuka kia bonga ditala dia ujitu, bhu kala kutana kua nzungule; maji o isuéia-phe, se a i tudika, athu bhu kaia kusuama-suama.

¹³ Muthu uoso u vunga o ikuma iê, katena kubhanduluka; maji muthu uoso-phe ikuma iê u i fisala, anga u i ambula, ió hinu a mu kuatela henda.

¹⁴ Ua zediua o muthu uoso uenda ni uoma ua Ngana mu thembu joso; maji uoso-phe u ẋiẋidisa o muẋima uê, ió ua xikamena kulaukila mu kikote.

¹⁵ Mukua-phulu kia tambula ukota ua kutumina o muiji ua jingadiama, u di bhanga mukua ni hoji i nanga ni kuzuma, mba mukuâ ni kitôto kia di zekele nzala.

¹⁶ Sobha kia kamba kutetuluka, u vudisa ungumba; maji o sobha ia kambe luimbi lua kitadi, kulaia kuê kuia muene bhua lebha.

¹⁷ Muthu se uabhangele ufumbe ua kujibha mukuá, o manhinga ma iú a mu jibha anga ma mu oseka, uila o lengʼé katé mu kina, tuleé; aie, ki bhu kale muthu u mu kudila.

¹⁸ Muthu uoso uenda ni muẋima ua iuka, hinu ua kà bhuluka; maji o ua kuata-phe mauendelu ma bhangalala, kà nanga kúfua mu dikungu.

¹⁹ Uoso u dima o mavu mê, udia anga uikuta; maji uoso-phe u landukila o imonha, uadiama hinu u mu vudila.

²⁰ Muthu u kala ni kitongola, hinu u bonga mabesá ma nzungule; maji uoso-phe u di sukila kuta jimbongo mu lusolo, kindala u bonga milonga.

²¹ O kuxila athu mukonda ngó dia jipholo, ki kiauabha; kuma mukua katungu ka athu, ua soko-bho kuta kituxi, mukonda ngó dia kakibhasu ka mbolo.

²² Muthu kia kala ni diesu diaiibha, dia luimbi, u di ta mazalu mu kuata jimbongo; ka kʼijiia-phe kuila uadiama ua mu kinga ku pholo ku aia.

²³ Uoso u bazela muthu, o ku pholo kuaia, a beta ku mu zola; kuindi o mukua kubhomba ni dimi dia kukuata ngó káfua ku pholo.

²⁴ Muthu uoso u nhana tatʼâ, mba mamʼâ, anga uila, uixi: Ki kituxi, mukonda mʼonzo ietu etu-ene, muenhó kijibhanganga, kuma uasoko ni kifumbe.

²⁵ Mukua luimbi, mvunda ja mu vula; uoso-phe ua dielela kua Jihova, uia ni kuneta kiengi, kuma a kà mu dikila jinga.

²⁶ Muthu uoso ua dielela o muẋima uê-muène, kiôua; muthu uoso-phe uenda ni masunga, ka sukamena.

²⁷ Uoso u bhana o nagadiama, muene ka kà tala hadi ni uadiama; uoso-phe u jika ku mesu, hádia ua kà Iala hadi ni mázui.

²⁸ O isuéia kioso ki i banda bhu ditala dia dikota, athu a suama; enhó-phe kuila abuika kiá, athu a iuka kiene kiua kiaia ni kusokoloka.