Jisabhu 27 - O Mikanda Ikola

¹ Ku te nzabala ia kizuua kia mungu, mbata ioso ia-nda kuiza na-iu o kizuua kia mungu eie kua ijiia.

² Ehela muthu uengi a ku ximane, maji o dikanu dié-eʼmuene, kana; muthu ua tundu dikanga a ki zuele, maji o mizumbu ié, kana.

³ Ditadi di nema, o museke u di jika; maji o njinda ia kiôua, mu kunema, kiiadiʼokio ndenge.

⁴ Njinda kifumbe, o kuthathamana ku bhanga kiaiibha; maji nanhi u tena ku di fikidila bhuala o difuba?

⁵ Sembele o kubazela kua di aneka bhu pholo ia mundu, dikue o henda iala ngó mu kasuekele.

⁶ Jifidila ji tu kuama o dikamba, ji di bhanga ijimbuete ia jihenda; maji o jibeju ja ku tu nzobola ku nguma, ji bheka kiluezu, kuma ji tu nganala.

⁷ Muenhu ua muthu se uekuta, kixila kia uiki u ki diata-diatela muene bhoxi; maji o mukua nzala-phe, ni kia lulu u ki mona kutouala.

⁸ Muthu kiʼaxa o dibhata diê anga uia ni kunhunga, usoka ni njila ia xisa o kikalanga kiê hé i kuata ngó kuzelela.

⁹ Mukua ni maji ni ima ia mazumba ki i tanesa o muẋima, kiene ue o kaiula ka dikamba ki ka tanesa o haxi ia kate.

¹⁰ Kumbi di ku kuata ngongo, kamba diê ku mu landuke, ni kamba dia tatʼenu ku mu xe, uixi kale ngiia mʼonzo ia phangʼiami, mokonda: Kota o dikamba dia ku kala bhua zukama, kuindi o phange iala dikanga.

¹¹ Dimuka monʼami, u tanese o muẋima uami, phala ngi kale ni kia ku vutuila oso a ngi tembula.

¹² Mukonda o njimu kiluezu u ki muena mu kanga, anga u suamʼê kiá; maji o jisemenhi-phe alundujuka ngó, katé kia bonga o divuua.

¹³ Muthu kia di xikina ulemba ua muthu uengi, eie-phe mu tambule o kizuatu; o uoso uemanena muhatu uengi, eie mu tambule kikunji.

¹⁴ Uoso u ximana kamba diê ni dízui dia zanguka, ni ku mu tundila muene mu kimenemene muná ni ku ximana, kiókio a mu kita na-kiu mázui.

¹⁵ Mukua ni isukusuku i kuata ku miâmia bhu kumbi dia mvula ia muzumbi, kiene ue kia soko ni muhatu ua uabhela kutangelela kiavulu.

¹⁶ Uoso u bhangela o ku mu fudisa, u soka mukuâ ni iú uala kusota ku koteka o kitembu mba kukoteka maji bhu lukuaku.

¹⁷ Felu ni felu i zuika mukuá, kiene ue kamba ni kamba a di bhetula miẋima.

¹⁸ Uoso uinga mufiku, ku mufiku udia-ku ibundu iê; uoso ue uxibhidila ngana iê, u tambula ujitu.

¹⁹ Kala o pholo ia muthu ki i di monekena mu kutala mu menha, kiene ue o muẋima ua muthu ki u di monekena kua muthu ni mukuá.

²⁰ Ni kalunga ni dibuikilu, kene kuikuta; ni mesu ma muthu ue kiene, kene kuila: Bhenhabha kuabhu hanji, bhua ngi soko.

²¹ Phalata a i tunguila bhu dizunzilu, o ulu a u tunguila mu túbhia tua muzukuta; o muthu-phe a mu tunguila bhu kaẋi ni kia mu ximana kuala akuá.

²² O kiôua né uedi u mu zuka ni muixi mu kinu, bhua moxi ni masa mʼòsuange, o uôua uê ki u mueha.

²³ Sota kujiia kioso kiala o jimbudi jé; ta muẋima ku ibhaku.

²⁴ Mukonda o jimbongo ki jene kuxalelà-ku; manhi o kitundu kiene kuxalela kutunda muiji kuiza muiji?

²⁵ Ki fuáfua o iangu, anga o sabhelela i moneka, suá-phe kiá o iangu ku milundu.

²⁶ Jimbudi ja tuana jene jiia ku kizuatu kiê, o jihombo ja isutu phala kusumba mikáu.

²⁷ Lete ia jihombo-phe ia-nda kusoka phala huta ié-eie ni ia dibhata dié, ni huta ia kudikila tuhetu tué.