Jisabhu 26 - O Mikanda Ikola

¹ Neve, ki ia fuama bhu thembu ia mbànze, mvula ki ia fuama bhu thembu ia kumuna; kiene ue kimoxi o kijingo ki kia fuama ku dilaji.

² Njila i nhungina kima, phiáphia u tukila ue kima; o muthu ue ku mu ta o mázui nʼa mu kuata, kale bhu kala kikuma.

³ Xikote ia tokala monde mba kavualu, o mukolo mu mazulu ua tokala jumendu, o mbangala-phe ia tokala ku makunda ma athu oso a kamba kilunji.

⁴ Kiôua ku mu tambuijile kia tokala mu uôua uê-muène; nʼeie-phe ua vula ku di fangana-nê.

⁵ Vutuila o kiôua ni ku mu jimbuila o uôua uê; phala ka di mone unjimu ku mesu mê-muène.

⁶ Uoso u tumikisa o jinjimbu mu kanu dia kiôua, ua mu di batula o inama, ua mu bhuita kiluezu.

⁷ O Sabhu mu kanu dia maiôua, ia soko ni inama ia huhi-a-lènge; inhengena ngó, ki i moneka nguzu.

⁸ Kubhana kijingu ku kiôua mba ku mu menekena, kia sokuʼê ngó ni ku ta o ditadi dia diiamande, dia te kitadi kiavulu, bhu mbala-funda ia kutakuila.

⁹ Sabhu ikala mu kanu dia maiôua, idifua ni muinha u bokona bhu dikànda dia lukuaku lua hôlua.

¹⁰ Muthu uoso uixana o ioua ni idiangu kuiza ku sedivisu iê, phala ku mu kalakela, ua soko ni muthu u kuata misongo anga u kala mu kuasa ngó oso-oso a bhita njila iâ.

¹¹ Kiôua kia naminina o uôua uê, mukua ni ímbua ialukila o kúdia kuê kua lusele kiá.

¹² Eie ua mono muthu ua di fika njimu ku mesu mê muene? Muenhó, sembele o kiôua u mu dielela dikue muene.

¹³ O kimonha, uila: Mu njila muala hoje, mu nzunga mua batukila hoje!

¹⁴ Musonde u bilujuka ngó bhu hama iê, mukua ni kibilujuka o dibhitu mu masokokelu mê.

¹⁵ Musonde u vuua lukuaku luê bhu dilonga; o kieza mu kuta mu kanu uila kala kia mu iibila.

¹⁶ O Musonde ku muẋima uê kia di mona kuijiia, phala muene kota, sambuadi dia jihete ejiia kuvutula kiambote bhu maka, ku mesu mê ndenge,

¹⁷ O muthu uala kubhita njila iê, anga u di ta mu mvunda ia athu engi, ua soko mukuâ ni muthu u kuata ma mátui o ímbua iangene ia mu sombokʼê.

¹⁸ Ki kala o dilaji di takujula o iẋinji ia túbhia, ni misongo ibhekela kalunga,

¹⁹ kiene ki bhanga o muthu u dianga ka nganala mukuâ, anga uamba uixi: Nga ki bhangela kutonoka.

²⁰ Bhua kambe jihuinhi, túbhia ta jima; o bhua kambe mukua jimbuémbue; mvunda isuka.

²¹ Mukua ni makala ma bheka o mbàmbe, jihuinhi ji uika túbhia; kiene ue ki kala o ndaxi mu kubambula jimvunda.

²² Maka ma mukua jimbuémbue, ma di bhanga mukuâ ni dikoka dia touala, di somboluela katé mu mala.

²³ Mizumbu i fulujuka ni kutanga o henda, o ku muẋima anga ku tunda usuéia, ia difu ni kienga kia mavu kiò folale ni makololo a phalata.

²⁴ Muthu ua zemba mukuá, u di uabhesa ni muzumbu; maji o moxi a muẋima-phe, ua sueka mangonha.

²⁵ Muene kia ku zuelela ni mbimbi iê ia ẋanana kiambote, ku mu dielele; mukonda o mu thulu iê, mua di kondela sambuadi dia isunji iaiibha.

²⁶ Né hanji o luma luê u lu sueka kala muthu uambote, hádia usuéia uê ua-nda kutungunuka bhua tena o kionge.

²⁷ Muthu uoso u kanda diela, muene ua-nda kufua-mu; o uoso u mbolomona ditadi, muene dia-nda ku mu mbolomokena.

²⁸ Dimi di tanga makutu, di bhekela kuiibha kuavulu; o dikanu di uabhela kukuata ngó kafua-ku-pholo, di bhekela kusendumuka.