Jisabhu 25 - O Mikanda Ikola

Jisabhu ja mukuá ja Solomá; mu thembu ia sobha Ezekiia kiene kia ji tungula ia a ji bhange kadivulu

¹ Jiji, jisabhu ue ja Solomá, athu a ji kopiiala mu thembu ia Ezekiia, sobha ia Juda, uixi:

² Kijingo kia Nzambi o ku kola kikutu mu kukondeka ima ioso; kijingophe kia jingana, o ku solokota ima ioso ia tokala kuijiia.

³ Kia di leka o maúlo, kia zongo o ixi, kiene ue kia zongo o muẋima ua jingana u bhonza kuijiia ioso iala-mu.

⁴ Phalata dianga ku i kenza o makololo, nʼa i zunze kiua phala itunde kitutu kia ujitu.

⁵ Sobha, dianga ku mu sondoluela o kiiala kia bhumu kiala bhu mbandu iê, phala o kiandu kia utuminu uê ki di fikidile mu ufundisilu ua kidi.

⁶ Kana ku di zangeleka bhu pholo ia Muenexi; Kana ue ku di ta bhu ditala dia athu a makota.

⁷ Mukonda sembele a ku idi: Banda bhabha; ki ki soko ni ku ku tulula hé a ku tununa bhu pholo ia mundu ni ia sobha ua mu mono kiá ni mesu mé.

⁸ Kana kusakamena kuia mu kufunda dimanda, sumba bhu bhuila o maka, eie u lémbua kia ku bhanga, mu kuila mukuenu ua ku belesa kiá.

⁹ Di tetulule ni mukuenu muene, ku mu xe bhoxi anga ua kà mu tanga ndunda kuengi, hé u mu tungununa.

¹⁰ Sumba uoso ua muʼambelʼó u ku bhekela kíbhidi ki ku xalesa mu dilebhu.

¹¹ Mukonda kima se u ki zuela bhu thembu iê ia tokala, kila kala jimasá ja ulu bhu mabandeja ma phalata.

¹² Mukua ni ki kala o jibixa ja ulu, ni jinzenzela ja ulu ua fina, kiene ue kia soko o kubazela kua njimu mu dítui dia uabhela o kubatekela.

¹³ Kala ki kala o utalalu ua neve mu tembu ia ku muna idima, kiene ue kia soko ni phunga ia fiiele kua ió oso a mu tuma; mukonda uximbakatesa muenhu ua jingana jê.

¹⁴ Kala ki kala o matuta ahatu a takujuka ngó ni kitembu, sè kubheka mvula ia kima, kiene ue kia soko ni muthu u di ta jinzabala, ni kudielelesa mukuá ujitu uene ka mu bhana-u.

¹⁵ Kilamba u fundisa o milonga, utetuluka ngó kia ku mona o ku xididika kué; mukonda o dimi dia lenduka kiambote, di bula o ifuba.

¹⁶ Eie ua bongo uiki? Dia-phe ngó uoso ua ku soko; o ki uila u ta-ku, u ku kuma, anga u u lusa ni uene.

¹⁷ Kinama kié katula-kiu, ku nhungine kiavulu mʼonzo ia mukuenu, mukonda kindala ka nange ku di kuma nʼeie, hé u ku iibhila kiá, anga u ku zemba.

¹⁸ Muthu uoso u tatela mukuá umbangi ua makutu, ua di bhange nzûndu, ni xibhata, mukua ni musongo uatu.

¹⁹ Kudielela dikamba dia miẋima iiadi, mu thembu ia kubhindama, kia soko ni kudielela kixinji kia dizu, mba kudielela kinama kia sokomoka.

²⁰ Muthu ua tate mu muẋima, o ku mu tela mimbu ia ngalasa, mukua ni muthu u zula izuatu iê bhu kumbi dia mbambi, mukua ni ku ta vindangele mu jifidila.

²¹ Nguma ié se ua mu mono ni nzala, mu bhane kúdia, a die; se ua mu mono ni dinhota, mu bhane menha anue;

²² mbata mu ku bhanga kiki, ua mu longela makala mauama ku thandu dia mútue uê; eie-phe Jihova hinu u ku futa-kiu.

²³ Kitembu ki tunda ku suku, kiza ni ku xinjikila mvula; o dimi di tanga iaiibha, di bhekela pholo ia funduluka ni njinda.

²⁴ Sembele ku tunga ubheka mu hota ia mbanjidilu iaʼnzu; ki ngʼindi ku tunga mu sabhalalu ni muhatu u tangelela kiavulu.

²⁵ O ngolokela ja mbote ji tunda kʼoxi ia dikanga, ja soko mukua ni menha ma talala kiambote mu kanu, ku dinhota dia muthu uaiokojoka.

²⁶ Muthu ua iuka kia mu longa o kuiibha kuala o kisuéia, uila kala fixi ia vunzuluka, u di bhanga kala ndunga iala ni menha a sotama.

²⁷ Muthu kudia uiki ua vulu, ki kia uabha; kiene ue o muthu ku di mona kijingu kié muène, ki ki bheka kijingu.

²⁸ Muthu se ua lémbua ku di tumina o jihânhi jê, u di fangana ni mbonge ia lundumuna imbaka, iii ia xalela ngoho.