Jisabhu 23 - O Mikanda Ikola

¹ Kioso ki u xikama ku meza mu kúdia ni nguvulu, kuata kilunji u tongolole kiambote uoso uala-nê bhu pholo ié.

² Tula o phoko bhu dikelengu dié, nda u batule o kisola kié, se uene u ngandixi.

³ Màkudia mê eie ki u ma mona kuuabhʼokio, ki ma ku kuate luimbi; mbata makudia ma mangonha.

⁴ Kana ku di huha kiavulu mu kusota ku kala u mvuama; kilunji kié kioso ku ki te mu kusoto ngó umvama inda katula-ku o muẋima.

⁵ Kifua mesu mé ma jijila kutalesa ima ia kingoho? jimbongo-ze jene ni mabhabha, jituka kala holokoko anga ji di leka bhulu.

⁶ Muthu se ua mono kala uala ku ku toka diesu, eie-phe kana kudia ku mbolo iê, o makudia mê ma toualʼomo, ki ma ku kuate luimbi.

⁷ Mbata muenhó kioso kia banza mu muẋima uê kiene muene kiala; oko u kuila; Dia-ze, nua-ze; maji o muẋima uê ua mu kala unguma.

⁸ Eie-phe ua-nda kuila o ki uadi ua ki lusu, o maka mê ma mbote mu ua mu tela, ma di boto.

⁹ Mátui ma kiôua ku ma zangele maka mé, mbata o kuzuela kué kuoso kua unjimu muene u ku tobhesʼé.

¹⁰ Kana ku sondolola o jimbambe jʼokulu, kana ku ta kinama kié mu mikáu iangene ia tokala anʼa di-fundu.

¹¹ Kuma o mukudi uâ-ene Dizonda; muene u a zokela o mvunda, eie anga u tala hadi.

¹² Muẋima ué u kaiele kioso kia ku longa, o mátui mé lungisa-nâ ku makʼa unjimu.

¹³ Mona enda muene ni ku mu bazela, né-mbe u mu bha jimbangala, muene ká-nda kúfua lémbue.

¹⁴ Eie u mu beta ni mbangala, o mu kubhanga kiki, ua mu vutula kuʼalunga kueji kuia.

¹⁵ Eie monʼami, muẋima ué se u di longa o unjimu iú, o muẋima uami uandu sanguluka, éue, muẋima uami muene u sanguluka.

¹⁶ O ki ngʼivua muene kuila o mizumbu ié ia zuela ima ia uhete, ni anʼa-sonhi moxi diami a kala ni ngalasa.

¹⁷ Muẋima ué ki u kale ni dixinga dia akua ituxi; inda kumbi dioso dia kambamba suua ngó kuxila Jihova.

¹⁸ Kuma kienhiki ki ku bhesa dizubhilu dia mbote; o kudielela kué ki ku kala kua ku di fula.

O vinho

¹⁹ Monʼami, ívua kunu, u dimuke; o muẋima ué u lunge mu njila.

²⁰ Ku kale mu kisangela kia jihólua ja vinhu, mba u di bunda kumoxi ni jingandixi ja kudia xitu.

²¹ Kuma o hôlua ni ngandixi, hinu a kà kuzuka mu uadiama; o kuzeka kilu kiavulu, kuendesa muthu mu makoza.

²² Eie monʼa-kime, tatʼenu ua ku vuala enda ni ku muivua jinga, o mamʼenu-phe kieza mu kukuka, kana ku mu ehelela.

²³ Sumba o kidi, kana ku ki sumbisa; inda uila ni unjimu, ni ku di kondeka eʼmuene kiambote, hé u ta-ku ni masunga.

²⁴ Kuma ngalasa i di bandekeza kiavulu kua muthu ua vuala o muiuki; o uoso ua vuala o hete iejiia kiavulu, ió kuene kiá o kutana kuê.

²⁵ O Tatʼenu ni mamʼenu a tane-ku, ió uoso ua ku bhandulukile a sanguluke.

O muhatu ua kidianzunga

²⁶ Monʼami ngi bhane o muẋima ué, o mesu mé mʼende ni kuuabhela jinga o jinjila jami.

²⁷ Kuma o muhatu ua kidianzunga ua di bhanga kala diela dia zongo, muhatu ka ku tokala ua soko ni kixima kia bhoto o mizumbu.

²⁸ Muenhú ue u zomba o maiala kala kifumbe, uia ni kubatuila mu njila hé u kuata o kuzongojola, anga muʼaxaxe ka mala u kala mu vudisa-mu athu a kamba o kukala ni ufiiele.

O vinhu dingi ni uhólua u kodiuisa

²⁹ Mukua-hi u di kola-kola ni kudila dikokolo? Mukuahi u bhita, ni jingongo? Mukuahi u bhânga-bhânga jimvunda? Mukuahi u kala ngó mu tangelela? Mukuahi uizala ni jifidila ja ku di kuama-kuama ngó? Mukuahi u kusuka o mesu?

³⁰ Ima iii ia fuama ngoho, ió oso ene kulandukila bhuoso bhu a sanga o vinhu, ni akua kusota o makunua ma kodiuisa mʼofungise.

³¹ Vinhu ku i tale ki u i mona o ku kusuka, ki ila mu kopho nguí, anga i thuthuma kifulu hé i kenzuluka kimuanu.

³² Ku ia kà suka koko, inumata kala nhoka, ialala mukua ni kita-sèle.

³³ Mesu mé ma-nda kutonginina kiá ahatu angene, anga muẋima ué u tanga isunji.

³⁴ Ua-nda kuila kala muthu uai ku kilu mu kaẋi ka musanza ua kalunga, uila kala muthu kilu kia mu kuatela ku sungu ia muxi ua mvela ia naviiu.

³⁵ Anga u kuata kuila, uixi: Kua ngi bhela jimbangala ki ngʼevu-ku; a ngi beta muene, maji né ngó kuxiximʼé! Nga-nda kuphaphumuka-phe kithangana kuẋi? phala o uhólua ngiie dingi ku u sota.