Jisabhu 21 - O Mikanda Ikola

¹ Muẋima ua sobha, bhu lukuaku lua Jihova, mukuâ ni milombo ia menha; kuoso kua solo muene, kuene kua u lungisa.

² Muthu kia tala o jinjila jê joso, u ji mona kuila ja uabha muene; maji Jihova u solokota muene katé bhua suku o miẋima.

³ Kubatula o milonga mu kidi ni kufundisa athu sè katungu, kia beta ku uabhela Jihova, ku mu bhakuila jisata, ndenge.

⁴ Mesu a di tudika ni muẋima ua di zangeleka, kituxi; katé ni ikalakalu ia athu abhumu ue, kituxi.

⁵ Mukua muanu, o ixinganeku iê i bhangela kuvudisa nzungule ia jimbote; maji o ixinganeku ia mukua dimuámua ni lusolo-lusolo, i mu xila ngó uadiama.

⁶ Ku kalakela o kulunda umvama u tunda mu kutanga makutu, kingoho; oso-phe a ki jijila a-lu kenga kalunga.

⁷ Ungumba ua isuéia, hádia ua-nda ku a jima ene o mbutu; mbata a di tunu kukumbidila o kidi.

⁸ Njila ia muthu, mu kusekala kuê, ienda ibhengèle ioso; maji o ua zedʼió, kikalakalu kiê kifuama muene.

⁹ Kota o kutunga ubheka bhu hota ia mbanjidilu iaʼnzo, ki ngʼindi o kutunga ni muhatu u tangelela kiavulu, mu inzo ia zanze kiambote.

¹⁰ O muẋima ua mukua phulu, uinda kubhanga o phulu iene; o kia mona mukuâ, u sanga ki mu ibhila.

¹¹ O seletete mukua kusebha, kioso kia bonga o kaxitiku, kieneʼokio-phe ki bhangesa kuila o kiximba u biluka njimu; kuma o njimu-phe kia mu longa o kikombo, ki mu tetulukila lusolo.

¹² Muthu ua mbote, u tongolola onzo ia kisuéia anga u sunga-bhu kilunji, kia mona o isuéia ala ku a langumuina bhoxi.

¹³ Uoso u xita o mȧtui mê ki dikola ngadiama, muene ue hinu u dikola, maji ka-nda ku mu ivua.

¹⁴ Ujitu ua ku bhela bhu hota, uximbakatesa o njinda; o diminhinu dia kombuesa bhu homba, di batamesa o nzaia.

¹⁵ Muiuki, o kusanguluka kuê u ku sanga mu kubhanga ima ia iuka; maji oso a bhanga kiaiibha, o kuiibha kuâ, kuia ni ku a sasumukisa.

¹⁶ Muthu uoso u xisa o njila ia kilunji, nʼa kala mu ku bungana ngó, ua kà nhohena bhu kilômbo kia madifundu.

¹⁷ Uoso ua uabhela kúdia kivema ni kungozala, hinu ku mu iza uadiama; o uoso ua uabhela o vinhu ni maji, bhuene bhua suka kuma ka tena dingi ku di bhanga nʼa kala ni jimbongo.

¹⁸ Mukua-phulu ufua bhu kididi kia muthu ua iuka; o kidiangu ufua bhu kididi kia muthu uemana muẋima nzanza.

¹⁹ Sembele kutunga ku ubheka mu tutu mua kambe athu, ki ngʼindi kukala ni muhetu mukua kuhoia uthathamana kiavulu.

²⁰ Umvama uinda o muthu, u u sanga mʼonzo ia njimu, ni maji ue u a sanga momo; maji o dilaji-phe, né ua mono jimbongo, ʼkala jene joso u ji dié.

²¹ Uoso u kaiela o uiukilu, nʼa jijila kubhanga o mbote, ua-nda kobonga muenhu, ni kulunga ni kijingo.

²² Njimu ua soko-bho kubokona mu mbonge ia mazonda, anga u i tolola, he u lundumuina bhoxi o imbaka ia ukuenze uoso ua di fiiala ene.

²³ Muthu uoso u langa o dikanu diê nʼa koteka o dimi diê, ió muenhu uê ua u kondeka ku kikote ni lamba.

²⁴ Mukua ukumbu, ua di zangeleka, a mu luka mukua kasekelu mukonda mukua kusekalesa akuâ.

²⁵ Musònde kima ki mu zunzumuna, o hânji jê, mukonda maku mê ka xikina ku kalakala.

²⁶ Mukua luimbi, kumbi dioso di mu bhuila ngó ni kuhamena o ima ni luimbi luê, maji u lembua-ku; o muthu ua iuka-phe ku kieha kiê, u bhana muene kiavulu ka jijila kima.

²⁷ Sata ia akua kubhuma, kisinji kua Nzambi; kuambe dingi-phe ki a i bheka ni muẋima ua kubhanga phulu!

²⁸ Mbangi i tanga makutu, ió hádia ua kà fua; uoso-phe uividila kidi kioso, o kieza ku maka-phe utenda u tona ka tena ku mu êlesa.

²⁹ Kisuéia pholo iê u i kolesa muene ngé; maji o muthu uemana nzanza-phe, njila iê u i tongesa muene kiambote.

³⁰ Jihova ku tena ku mu dimukina, ku tena ku mu bhanga ndunge, ku tena ue ku mu ta kikutu kia ufue.

³¹ O kabalu a ka polondala muene, mbé o kizuua kia kʼèza o ita; maji o ki dʼiza-bhu, o kutolola kikale ku tunda kua Jihova.