Jisabhu 18 - O Mikanda Ikola

¹ Muthu ki muiza kubhanga o jivondadi, jê, u baluka; o unjimu ua kidiʼó, u sola kúlua na-u.

² Kiôua ua di zemba ni kubatekela o diba; muene uinda ngó ku di londekeza o uôua uê, ua mu kala mu muẋima.

³ Muthu ua bhumu o kienda, lusebu lu mu kaiela; ki ku tunda o dilebhu, ku kaiela o sonhi.

⁴ Hete ia diiala, o maka mê mukua ni ngiji iazongo; o fixi ia unjimu, mukua ni dibhubha dia menha.

⁵ Ki kiauabha o kusuua kisuéia mu kufunda milonga, phala ku kundula o muthu ua iuka.

⁶ Mizumbu ia semenhi i mu sotela jimvunda, o dikanu diê di mu kengela kibetu.

⁷ Kiôua kalunga ka mu dia o muenhu, ka tunda ku dikanu diê-muène; o mizumbu iê, diene o dibhèbhe di zumbula o muenhu uê.

⁸ Maka ma mbombo-kumbodi, mukua ni dikoka dia touala, a somboluela katé mu mídia.

⁹ Mukua usudi, mu ukalakalelu uê, ua soko ni nzangi.

¹⁰ Dijina dia Jihova mukua ni mbonge ia matala ia di jikidila; muthu uoso ua iuka, kuene kua lengela, anga a mu bhaka kididi kia kondama.

¹¹ Mukua itadi, jombongo jê u ji kita mbonge ia ku mu fikidila; phala muene, kifua kimbaka kia lebha kitala.

¹² Muẋima ua muthu u di zangelaka, ua-lu sota kibhalu; uinda o kijingu, u dianga o kubatama.

¹³ Ku vutula kua lusolo, kuila ioso kiluua u ivua, ió uôua ni ku di bhekela sonhi; kota o kudianga kuividila.

¹⁴ Muthu ki mu bhetula mu kukata, o muẋima uê-muène; maji se muẋima ua budika, mukuahii u tena ku u bhetula?

¹⁵ Muẋima ua hete, u sota o kuijiia; mátui ma jinjimu, ma sota kutongolola.

¹⁶ Muthu, bhu pholo ia jingana, u kuata ujitu bhu maku, uene u ku xitunuina o njila, anga u kubheka-bhu.

¹⁷ Muthu kia kuata ku diba diê, u di mona kulunga; katé mukuá uiza anga u mu fula.

¹⁸ Athu kia di kuata jiphata, ata-bhu-phe Sorte; iene i batula o phata, iene i uanena mazonda.

¹⁹ O kubhomba phange ua luuala ku beta kubhonza, ku tambula o mbonge ia imbaka ndenge; o jinzaia ja kuzoka-zoka ja soka ni jisabhi ja felu ku dizemba.

²⁰ Izuelu i tunda mu kanu dia muthu, i di bhanga kifua kibundu kikutisa o mala mê; u di dikila ni kioso ki tubhula o mizumbu iê.

²¹ Ni kúfua ni muenhu, ima iiadiʼii ia tunga ku uzonda ua dimi; oso-phe a zola o dimi, hádia a diaula-ku ku kibundu kiê.

²² Uoso u bonga muhatu ua mbote, ua bongo kima kia ujitu; muthu ió Ngana ua mu bhange favolo.

²³ Ngadiama kia zuela, u dionda; maji o mvuama-phe, u vutula ni mikalu.

²⁴ Muthu u vula makamba, ua-lu di sotela kukakuka; maji sai-phe dikamba di beta kota, o phange ndenge.