Jisabhu 16 - O Mikanda Ikola

¹ Ima ioso i xinganeka o muẋima, i tunda ku muthu; maji o kuvutula kua kidi kua hundu ia dikanu-phe, ku tunda kua Jihova.

² Muthu kia tala o jinjila jê joso, uila ja zele muene; maji o Jihova-phe, muene mukua kuzonga miẋima bhu longa dia pezu.

³ Ikalakalu ié ioso bhakula-iu kua Jihova, muene u ku xikikila ima ioso i u kana kubhanga.

⁴ Jihova ima ioso ua i iudikila ni dizubhilu diê dia i tokala; katé ni mukua phulu, o bhuilu diê o kizuua kia jingongo.

⁵ Muthu uoso ua di zangeleka mu muẋima, u di bhanga kisunji kua Jihova; né-mbe maku mê u ma bunjika bhu thulu, sai hanji mulonga uê kua Nzambi.

⁶ Bhuala o henda anga bhu kala ue o kidi, kituxi ki jima; maji athu kuebha o ituxi, ki kale ngó ku uoma ua Jihova.

⁷ Mauendelu ma mathu se ma uabhela Jihova, muene-phe u mu bhangesa kuila katé ni jinguma jê, atunganê ku paze.

⁸ Kota kia tolo kia tundu ku kidi; dikue o jinzungule ja itula ia di lungu ni mangonha.

⁹ O muẋima ua muthu, u xinda o njila iê ia kuenda; maji Jihova muene u mu tesa díkanda diambote.

¹⁰ Muenexi kuzuela kuê kuoso, kifua muzambu uene-nau; o kieza mu kubatula o dimanda, dikanu diê ki di lueza, kana.

¹¹ Ni pezu ia kidi, ni balasa ia kidi, itunda kua Jihova; matadi moso ma jipezu ja kutela uenji, Jihova muene ua ma tumu.

¹² Kima kia kisunji o jisobha kubhanga ima ia kubhuma; mbata o kubatula mu kidi, kuene kuxikika o utuminu ni kiandu kia jisobha.

¹³ Jisobha bhuoso bhua sanga mizumbu i batula mu kidi, ene a sanguluka; Kuma sobha kamba dia ió uoso u zuela ima ia lungu mu njila.

¹⁴ O kuthathamana kua sobha, mukua ni mukunji ua kalunga; maji o muthu-phe ua sunguluka, ua soko-bho ku mu ximbakatesa.

¹⁵ Pholo ia Muenexi se i ku tala ni ngalasa, eie u bonga muenhu; o kiadi kiê, mukua ni dituta dia mvula ia isanga bhu kasamanu.

¹⁶ Kota ku di longa o unjimu, dikue kufuna o ulu; o kudilonga ue kilunji kota, phalata ndenge.

¹⁷ Kikoka kia athu aiuka (emana miẋima nzanza), o kulenga kubhanga kiaiibha; uoso uedi kuma muenhu ngi u kondeka, aʼluke o uendelu uê.

¹⁸ O izala iene mu tuama, anga kukaiela o kusenguluka; o kudizangeleka kua muẋima kuene mu diangela, anga kukaiela kiua o kibhalu.

¹⁹ Muthu sembele-ze o kukala ni muẋima ua batama, bhuamoxi ni ió oso a lenduka; dikue kuuana o mbole ia kubhunda ni akua izala.

²⁰ Muthu uoso u batekela kiambote o maka, ua-nda kusanga kubhanduluka; o uoso-phe u dielela Jihova, ió kuzediua kuê.

²¹ Muthu uoso uejidila ku muẋima, ió a muila uadimuka; o uzuela kiatouala, u zubhisa akuâ o kudilonga.

²² Oso a bonga kilunji, a bongo ndunga ia muenhu; maji ioua-phe, o uoua uene u a talesa o hadi.

²³ Muẋima ua muthu uadimuka, uene ulonga o dikanu diê, anga u mu bandekeza uhete ua kuzuela mu mizumbu iê.

²⁴ Maka ma kilendu, kixila kia uemba; ma toualesa muenhu, anga mʼelukisa ifuba.

²⁵ Sai njila muthu u i fika kuiuka, maji o bhuilu diê-phe, iene o ikoka ia kalunga.

²⁶ Muthu u kalakala, u kalakela mbote iê-muène, oko ki mu suinisa, o dikanu diê diia ni ku mu bhinga.

²⁷ Monʼa kadiaphemba u kanda o phulu iene; o ku mizumbu iê u sanga kua bambuka kala túbhia.

²⁸ Thulukutu u zokesa akuâ; mukua kabaka u muanga makamba a di zolo kinéne.

²⁹ Kingualulu u zela mukuá, anga u mu bheka mu njila iaiibha.

³⁰ Muthu uaiibha kieza kufunha o isunji, ku mesu u badikinha-ku; uila u di kokota ku mizumbu-phe, phulu ua i bhange kiá.

³¹ Jimvi kitundu kia ujitu, se uala na-ju mu njila ia kuiuka.

³² Muthu u xididika uala kota, kindanda ndenge; o utolola muẋima uê uala kota, uatolola mbonge ndenge.

³³ Kibhuku ki buila bhu jihata, maji Jihova muene u ki muena o phangu ia ku ku lungisa-kiu.