Jisabhu 15 - O Mikanda Ikola

¹ Kuvutula kua kulenduka, kubhuisa jimvunda; maji o kuzuela kua kunonga, kubhekela njinda.

² O dimi dia jíngambi ja kuijiia, di uabhesa o unjimu; maji o dikanu-phe dia maioua, di lundulula ngó uoua mu uoua.

³ Mesu ma Jihova, mala mu ididi ioso, ni kukengelela athu aiibha ni athu ambote.

⁴ O dimi di zuela ni kilendu, di di bhanga muxi ua muenhu; maji o dimi-phe di lula mu kuzuela, di budikisa o muẋima.

⁵ Kioua ka xikina kuividila ki mu bazela tatʼâ; muthu-phe u suua kia mu héula, ió uadimuka.

⁶ Mʼonzo ia muthu uaiuka, muene mu dilundilu dia ima ionéne; maji o jimbote-phe ja mukua-phulu, jʼenda ni jingongo.

⁷ O mizumbu ia jinjimu, i lundulula kuijiia; maji o muẋima ua ioua-phe, ki kiene ki u bhanga.

⁸ Jihova ua di-zemba ni sata ia athu abhumu; maji ki mu uabhela muene, o kuividila musambu ua athu aiuka.

⁹ Njila ia muthu uabhumu, kua Jihova kisunji; maji muene-phe ua diuabhela ni uoso u kaiela o kuiuka.

¹⁰ Uoso ulueza o njila, o kibetu kiê kivula; uoso-phe kia mu tangela kʼevu, ua xikamena kúfua.

¹¹ Se ni ditungilu dia madifundu ni dibuikilu, kiiadi kiâene bhu pholo ia Jihova, kuambe dingi o miẋima ia anʼ athu?

¹² Semenhi ua di-zemba ni uoso u mu bazela; muene ka xikina kubhiẋila bhuoso bhuala o jinjimu.

¹³ O muẋima se ua tana, pholo ikemba kiengi; maji o ki kata muẋima, ni nzumbi ia muthu idisuuata.

¹⁴ O muẋima ua mukua-kilunji, u bhangela o kuijiia; dikanu-phe dia jisemenhi kúdia kuâ, o uoua uene.

¹⁵ Mukua-hadi izuua iê ioso ia lamba ngó; uoso-phe mukua muẋima uatana, ió muene mukua jifesa jakalʼé.

¹⁶ Kota kukala ni kiatolo, hé u kala ni uoma ua Jihova bhuamoxi; dikué nzungule ia umvuama, i kenanesa muẋima mʼoxi.

¹⁷ Sembele o kakúdia ka tumafe bhuala o henda, kuindi o ngombe ianete bhuala o luma.

¹⁸ Diiala di thathamana kiavulu, u vulumuna jimvunda; maji o ió mukua kuxididika-phe u bhuisa jimvunda.

¹⁹ Njila ia musonde mukua ni kikanzo kia minha ia kathathala; maji hoka-phe ia athu aiuka, u sanga ia babelela kiambote.

²⁰ Njimu ia mona, u sangulukisa tatʼâ; maji o semenhi, u kuatesa jisonhi kua mamʼâ.

²¹ Muthu na kambe kilunji, minangu iê o usemenhi; maji o mukua kilunji-phe, uenda ditonono mu uendelu uê.

²² Bhua kambe o kaiula phala kumona o phangu ni ndongo, mabanzelu moso ma kituka kingoho; maji bhuala o nzungule ia jindongixi, ndunge joso ji tunda ni kubhanduluka.

²³ Muthu kuijiia kuvutula kizuelu kiambote ni dikanu diê, ki mu sanguluisa; kuma o kizuelu kiene mu touala bhu thembu iê!

²⁴ Muthu ua dimuka, u bandela mu njila ia muenhu, mbé kufula kuboloka mu bombo dia madifundu, bhoxi.

²⁵ Jihova hinu ua-nda ku muanga onzo ia akua-izala; maji o jimbambe ja undundu ua mutudi ua muhatu u ji soma kiambote.

²⁶ Jindunge joso ji funha o muthu uabhumu, ji di bhanga isunji kua Jihova; maka-phe ma athu zele o muẋima, mene ku mu uabhela.

²⁷ Muthu uoso u fundamena o nganhu ia kudia mangonha, u titidisa dibhata diê; maji uoso u iibhila o mahitula, muene u kola o muenhu.

²⁸ Muẋima ua muthu uaiuka, Uxinganeka kioso kia tokala kukumbulula; dikanu-phe dia akua-phulu, di lukula nzungule ia jindaka.

²⁹ Jihova athu a bhuma ua sanduka dikanga; maji uividila o musambu ua athu aiuka.

³⁰ Kima kia tetuluka ku mesu, ki tanesa muẋima; o fuma se ia uabha, ni ifuba ineta.

³¹ Muthu uoso u xikina kubhana mátui mu kuividila o kubazela kua disanze, ió u tunga dibhata mu kaẋi kumoxi ni jinjimu.

³² Ua tènde o kibazu kia ku mu bazela, ua tènde o muenhu uê; maji uoso-phe u suua kia mu bazela, ió uanda kubonga kuijiia.

³³ Uoma ua Jihova kiene o kikômbo ki bheka o unjimu; uinda o kijingo u dianga kubatama.