Jisabhu 14 - O Mikanda Ikola

¹ Muhatu ua njimu, u tunga o inzo iê; maji o kioua-phe kia muhatu, mueniʼê u i bula ni maku mê.

² Uoso uenda ni muẋima ua iuka, muene ua mu xila Jihova; uoso-phe uenda mu njila ja kubhengalala, ió ka suu Nzambi.

³ O mbangala i beta o kiôua, o ukumbu u tunda mu kanu diê-muène; maji o njimu mizumbu iê iene i mu kondeka kiambote.

⁴ Bhua kambe o jingombe, u sanga mu kidilu mua xala ngoho; maji ku undanda ua ngombe, athu abhongolola idima ianzungule.

⁵ Mbangi ia kidi, ki i tena kuta makutu; mbangi-phe ia mangonha, u tanga makutu mu makutu.

⁶ Semenhi u sota unjimu, maji uene ka di-mono na-u; maji o makua-kilunji-phe ku di longa uene o mukumbi uê.

⁷ Kioua mu sondoloke, mukonda ku mizumbu iê o maka a unjimu kua a sange-ku.

⁸ Muthu ua dimuka, unjimu uê o ku tongolola kiambote o njila iê; maji o usemenhi ua maioua-phe, o kunganala.

⁹ Ioua o kituxi a ki kembela; maji o muʼaxaxe ka jifiiele muala kubhanduluka.

¹⁰ Ki kata miẋima ua muthu, muene ngó u kʼijiia; o ki u sanguluka ue, muthu bhu mbandu u tokoka ku di bunda mu kusanguluka kuê.

¹¹ Dibhata dia akua-mundu, dia xikamena kusekala; balaka-phe ia jifiiele, hádia ku pholo itunga-isoma.

¹² Sai njila, muthu u i mona kuiuka; maji o ku dizubhilu diê-phe, ikoka ia kalunga.

¹³ Muẋima, né-mbe hanji mu kuolela muene, ukata; Kuma sai bhabha, o kusanguluka zubhilu diê malamba.

¹⁴ Muthu uaiibha o muẋima, njila jê hádia ja-nda ku mu kuma; maji o muthu uambote-phe, ka xikina ku uabhela o ífua iê.

¹⁵ Kilalu maka oso a zuela kuala athu, muene u a xikina; maji ió ua sunguluka-phe, u zonga kiambote kioso kienda.

¹⁶ Njimu mukua-uoma, o kiaiibha u ki lenga; kioua-phe u di-vunza, u dimona uzonda, u fika kuila ua tungu ua somo.

¹⁷ Muthu u thathamana lusolo, u zanga ima; o mukua ilunji ia mudiangu, athu a mu kuma.

¹⁸ O jisemenhi, hádia a tambula undundu ua kusebuluka; maji o jinjimu-phe, a kà zakela itundu ia kuijiia.

¹⁹ Athu aiibha a kà toloka bhu pholo ia athu a mbote; o isuéia-phe a kà tolokela bhu mielu ia iá oso aiuka.

²⁰ Ngadiama a mu zemba, katé ni ku jindandu jê kuene; maji o mvuama-phe, makamba a vula.

²¹ Uoso u sebulula mukuá, uate kituxi; uoso-phe u kuatela henda kua iú ua tate, u bonga kuzediua.

²² Mbé oso a bhanga kiaiibha, ka mu zanga muene? Oso-phe a bhanga kiaiuka, kua a xikamena mbote ni kidi.

²³ O kututumba kuoso muene ni kukalakala kubhekela, kubhanduluka; maji o kuzuela-phe kuahatu, ku xisa mu uadiama.

²⁴ O jimbongo kiene o kijinga kia jinjimu jala ni kuijiia; o lusebu lua iôua-phe, uoua mu uoua ngó.

²⁵ Mbangi i tanga o kidi, u kudila o mienhu; maji o u sabhula makutu, ió kifumbe.

²⁶ Muthu mu kuxila Jihova mua mu kala kidielelesu kia kolokota; ni anʼê a sanga jinga disuamenu mua muene.

²⁷ O uoma ua Jihova iene o fixi ia muenhu, mbé o kubhangesa muthu kuebha o mibhetu ia kalunga.

²⁸ Kijingo kia sobha, ki tunda mu kuvula o mundu; kuma o kilamba kia kambe o mundu uavulu, ki sekala.

²⁹ Muthu u kokoloka o kutema, ió muene o hete ia dikota; uoso-phe ka nange kuthathamana, ió uoua uê u dianeka.

³⁰ Muẋima ua batama, ubhekela kudisanza mu mukutu; maji o dixinga-phe, di bolesa ifuba.

³¹ Uoso u sondemeka o ngadiama, uala kulokalala Mubhangi uê; uoso-phe u bindumina o hukunhu, ua jingisa uoso ua mu bhanga.

³² Kisuéia, o usuéia uê uene ua-nda ku mu kakula; maji o muthu Uaiuka-phe, katé ni mu kúfua kuê, hanji sai kia dielela.

³³ Unjimu unhohena mu muẋima ua mukua-kilunji; maji mu thulu ia maioua, ki mu suama kima.

³⁴ O kubhanga kiaiuka, kujingisa o ifuẋi; maji o ituxi-phe, i bheka kusekala ku mundu.

³⁵ Muenexi ua di-uabhela ni selevende ia sunguluka; maji o njinda iê-phe i landula uoso o semenhi u bhanga ima i kuatesa jisonhi.