Jisabhu 13 - O Mikanda Ikola

¹ Mona ua tetuluka, uívua ki mu bazela tatʼâ; maji o semenhi-phe, kene kuívua kia mu bazela.

² Muthu uádia ku mbote i tunda ku kibundu kia dikanu diê; maji o muenhu-phe ua ibalukutu, kúdia kuâ, kikote.

³ Uoso u langa dimi diê, muenhu uê ua u kondeka; uoso-phe uzuela kiavulu, muenhu uê ua u jibha.

⁴ Muẋima ua musonde, uinda ngó maji ka mono kima; akua kukalakala makidikidi-phe, u sanga a neta.

⁵ Muthu uaiuka, maka ma makutu u di zemba-nâ; mukua-phulu-phe ukuma, mbata u di bhekela sonhi.

⁶ Muthu uaiuka, o kuiuka kuê kuene ku mu kondeka mu uendelu uê; mukuaituxi-phe, o phulu iê iene i mu sendumuna.

⁷ Sai-ku athu a di-bhanga kala jimvuama, mbé kala ni kima; sai-ku ue-phe a di-bhanga kala jingadiama, maji mbongo jâ jivula.

⁸ Kidikulu kia muenhu ua muthu, o jimbongo jê; ngadiama-phe, ua kambe kia ku di kula, tendʼê, lémbue.

⁹ Mukengeji ua athu aiuka u bhetula muẋima, kuma u muika kinéne; maji o kandeia-phe ka akua-phulu, ka xikamena ku ka jima.

¹⁰ Ukumbu-phe u bheka ngó jimvunda; athu-phe a tetulukʼó, a bhanga ioso ni unjimu.

¹¹ Umvuama u tunda mu kubhongolola ngoho kioso-kioso, ki u nange kubhita; uoso-phe ututumba ni kuongeka kamuanu-kamuanu, soua iê iia ni ku di-bandekeza.

¹² Kudielela kua kokoloka, ku sukisa o muẋima; maji o kiendi o muẋima, kuila kia bhixila, ki di-bhanga muxi ua muenhu.

¹³ Uoso u tènda o phangu ia mu bhana, u jikinina; uoso-phe u xila ngonge, ubhanduluka.

¹⁴ Ulongelu ua muthu uejiia, u di bhanga fixi ia muenhu; mbé o kubhangesa muthu kuebha o mibhetu ia kalunga.

¹⁵ Kutetuluka kua kidi, ku bongesa ujitu; maji o njila-phe iá ió a dianguka, i talesa hadi, (kuma i muesa lamba).

¹⁶ Muthu uadimuka, o ima ia bhanga u i endesa kiambote; maji o Semenhi-phe, uaneka o usemenhi uê.

¹⁷ Kisuéia kia phunga, mua bhita u xisa divuua; maji o kilolo-phe kia fiiele, o kua bhita, u bheka kudisanza.

¹⁸ Uoso ka xikina ku mu bazela, uaxikamena uadiama ni usuéia; maji uoso-phe u suua kia mu bazela, uaxikamena kijingo.

¹⁹ O kima kiendi o muẋima se ki di bhanga, muenhu uetu u sanguluka; maji o ku di batuka ni phulu, kiene o kima kiaiibhila o maioua.

²⁰ Uoso uenda ni jinjimu, u biluka njimu; uoso-phe u kala kamba dia ku kaiela o ioua, kanange kukituka kala ene.

²¹ Akua-ituxi, o hadi iâ iakalé, kuma i a kaiejela muene; athu aiuka-phe, a kà tambula futu ia jimbote ni kubhanduluka.

²² Muthu uambote-phe, uxia undundu ku ana ni ku aláula; maji umvuama ua mukua-ituxi, uòlunde phala ni u xialela ku ió uaiuka.

²³ Jingadiama, ku thonga iâ, a bhongolola idima ianzungule; sai-phe athu, mukonda dia kuhungana kuâ, a di talesa hadi i a bhitula o muenhu.

²⁴ Uoso ukamba kusasa o mona ni mbangala, ua mu zembe; uoso-phe ua zola monʼê, ka kambe ku mu beta bhu kithangana kia tokala.

²⁵ Muthu uambote, udia anga nhu uê uikuta; maji o divumu-phe dia akua phulu, di dia ngó ki dʼikuta.