Jisabhu 12 - O Mikanda Ikola

¹ Muthu uoso ua uabhela o ku mu longa, ió muene o dikamba dia kuijiia; maji o mukua ku di zangala kia mu bazela, ió-phe kioua kia hatu.

² Muthu uambote u enda jinga ni kavumbi ka Jihova; maji Jihova u êlesa uoso mukua ilunji ia dianguka.

³ Muthu ka tena ku di kuatenena ni ikalakalu iaiibha; maji o lundanji lua athu aiuka, bhuoso bhu lua di kubu, kene ku lu sondolola.

⁴ Muhatu uala ni ujitu u di bhanga kitundu ku mútue ua muadi uê; maji o muhatu u bhanga ima ia jisonhi, u di bhanga mukua ni utúlua mu ifuba ia munumiʼê.

⁵ Athu a iuka, ni ixinganeku iâ iezala kidi ni kilunji; maji o jiphangu-phe ja athu a bhumu, jʼezala mangonha moso.

⁶ Maka ma athu a bhumu, ma kana ngó kubatamena manhinga ma akuá; maji o dikanu-phe dia athu aiuka, diene dia a bhulula.

⁷ Athu a bhumu, hádia a kà a lalumuna, ka kà moneka dingi; maji o dibhata-phe dia athu a iuka, dinangenena.

⁸ Muthu kioso kia soko o unjimu uê, kiene ue kia ká mu tumbula; maji o semenhi ia muẋima-phe, athu oso a mu sebulula.

⁹ Kota o muthu ua di tululula, hé uenda ni kubhanga o kikalakalu kiê; kuindi ió ua di zangeleka muene, maji ua lémbua bhua kúdia.

¹⁰ Muiuki uinga o muenhu ua ibhaku iê; maji o muẋima ua athu abhumu-phe, uezala usuéia.

¹¹ Uoso u dima o mukáu uê, u kala ni kúdia kuê kua nzungule; uoso-phe u kaiela o ima ia kingoho, ió ua kambe kilunji.

¹² Muẋima ua muthu ua bhumu, uinda ngoho phulu mu phulu ni ku dikengela o kufua mu uanda ua akua phulu; lundanji-phe lua athu a iuka lu ima muene o kimbundu kia kuiuka kuâ.

¹³ Mukua-phulu, itondalu ia mizumbu iê, iene o mikolo iê ia di-kuta na-iu; maji o muthu uaiuka, ubhulaka ku iluezu.

¹⁴ Muthu uene ku di dikila ni mbote i tunda ku ibundu ia uzuelelu ua dikanu diê-muene; o ioso muthu ia bhanga ni maku mê, hádia a mu vutuila-iu.

¹⁵ Kioua uendelu uê-muène u u mona kuiuka; maji uoso uividila kiambote o ku mu longa, muene muthu ua dimuka.

¹⁶ Diilaji, bhuoso bhua mu thathamesa, njinda iê lelu muene i di-monekena; mukua kilunji-phe, ubatekela, anga uila kala kʼevu kima.

¹⁷ Uoso u tanga o kidi, u tukulula o kulunga; maji o mbangi ia mangonha, u tanga nzungule ia makutu.

¹⁸ Sai athu, uzuelela uâ u toma ku miẋima kala jiphondo ja xibhata; dimi-phe dia jihete ja kuzuela, di bheka kudisanza.

¹⁹ Mizumbu ia kidi, itunga i soma; dimi-phe di tanga makutu, dinanga ngó kathangana.

²⁰ Akua kufunha ilunji iaiibha, mu muẋima mua a tunga ngoho mangonha moso; maji akua kulongesa o kutululuka ni kubatama, ene a tunga ni kusanguluka.

²¹ Kana divuua di tula ku muthu ua iuka; maji akua phulu-phe u sanga ezala ni kikote.

²² Mizumbu i tanga makutu, ia di fuangana kisunji kua Jihova; maji oso a kumbidila o kidi, ene a mu uabhela muene.

²³ Muthu ua dimuka, ka xikina kutanga o kuijiia kuê; maji o muẋima-phe ua ioua, uenda ni ku di tanga o uoua uene.

²⁴ Lukuaku lu kalakala makidikidi, luene lu tumina; maji o jisemenhi-phe, ji xikamena ngó kufuta lubhaku.

²⁵ O kubhindama kua muẋima, kuene mu kubhelesa o muthu; maji mbimbi ia mbote, i mu sanguluisa.

²⁶ Muthu ua iuka, u di bhanga musonguedi u tuamenena ku pholo ia mukuá; maji o uendelu ua akua phulu-phe, u texikisa.

²⁷ Musonde, o xitu iê ia unhanga, u lémbua ku i oha; maji o kuhandamana-phe, uene o ujitu uonéne ua muthu.

²⁸ Mu kukaiela kuiuka, muene muala o muenhu; kuma mu njila ja kuiuka, ki mueniʼê kalunga.