Jisabhu 11 - O Mikanda Ikola

¹ Pezu ia kupezala ni mangonha Jihova ia mu ibhila kiavulu; maji o nzongo-phe ia kuzonga mu kidi, iene ku mu uabhela kinéne.

² Bhuoso bhua tuama ukumbu, hádia bhu kaiela ue dilebhu; maji oso a di tululula, ene adimuka.

³ O kidi kia athu aiuka, kiene kia kà endesa; maji o uendelu ua lusebu, u bhekela atondadi kusekala.

⁴ Jimbongo ki ji tena kubhandulula ngana iê bhu kumbi dia njinda; maji o kuiuka ku kudila muthu ku kalunga.

⁵ O kuiuka kua muthu ua mbote, ku mu iukixila o njila iê; mukua phulu-phe uséia uê uene u mu dia.

⁶ Mujitu, ki mu bhulula o kuiuka kuê; ati-a-ituxi-phe a a kuatela mu kubhuma kuâ.

⁷ Mukua phulu se uafu, kudielela kuê kuoso kua suku; mukua mangonha-phe kudielela kuê, kudi-fula.

⁸ Muthu ua iuka ene ku mu bhulula ku kibhidi ni ku dilamba; mukua phulu-phe anga u bhingana-bhu.

⁹ Muthu uaiibha ni mangonha, u sendumuna mukuá ni dikanu diê; aiuka-phe mukonda dia kutongoloka kuâ, a kà bhulaka.

¹⁰ Ki sangulukisa sanzala, o uuabhelu ua athu ambote a tungu-mu; akua phulu né afua, mundu u kola kikoue.

¹¹ Diembu di zangalala mukonda dia akua kidi a tungu-mu ala ku dizediuisa; maji ki sendumuna diembu, ki tunda ku kabódio ka akua-phulu.

¹² Muthu uoso uia ni kuila kia tala mukuá ki kima, ua kambe kilunji; maji o ua tetulukʼó, u di xibha ni muelu hudí.

¹³ Ndaxi ia maka utungununa kikutu; maji o mukua muẋima ua kitongola-phe, kikutu u ki kondeka muene.

¹⁴ Bhua kambe o phangu ni ndongo, mundu u lalumuka; maji bhuala o nzungule ia jindongixi, mundu a tunga a soma.

¹⁵ Uoso u di xikina úlemba ua muthu ka mu ijiia, muenhó hádia ki nu talesa hadi; maji uoso u dituna úlemba, utunga usoma.

¹⁶ Muhatu ua nheṗhuka, kijingu kiê kia kalé, mukuâ ni mala ma suína nu kukalakala, kia lunda o jimbongo.

¹⁷ Muthu ua mbote, u bhanga mbote ku muenhu uê; maji o kingumba kú diiala katé ni mukutu uê u u talesa hadi.

¹⁸ Mukua-phulu kia kalakala, kima kia bhanga ki ki tundu mbote; uoso-phe u kuna jimbutu ja kutetuluka, ua xikamena futu ia kidi.

¹⁹ O kubhanga kia iuka, iene o njila iia ku muenhu; maji uoso u uabhela phulu, ua-lu di kengela kalunga.

²⁰ Athu a kala ni xidi ia muẋima. Jihova a mu ibhila kiavulu; oso-phe emana nzanza mu uendelu uâ, ene ku mu uabhela kinéne.

²¹ Kisuéia né-mbe maku mê ua ma koteka bhu muẋima, hanji kà kamba mulonga; maji o mbutu ia athu a iuka, ia kà bhulaka.

²² Mukuâ ni nela ia ulu ku muzulu ua ngulu, kiene kia di fuangana ni muhatu ua uabha o pholo, nʼa kambe o kilunji.

²³ Athu ambote vondadi iâ o kubhanga mbote iene, akua phulu-phe axikamena ngoho njinda ia Nzambi.

²⁴ Sai-ku amoxi a bhana kiavulu, maji hanji-phe o jimbongo jâ jiia ni ku di-bandekeza; amukuá-phe asombuesa o unjenje, anga a bonga uíndua.

²⁵ Muenhu ua muthu ua uabhela ku uanena akuá, u mona mbote; kuma uoso u tekela, muene ue a mu tekela.

²⁶ Muthu uoso nguaiê kusumbisa o mbutu jê, mundu a mu ta mázui; maji mukua kusenga o idima iê, ku mútue uê dibesá dia kalʼé.

²⁷ Muthu uoso u sakalala mu ku kengela akuá o mbote, uala ku di kengela kavumbi; uoso-phe u kengela akuá o phulu, muene ua mu di kengelaiu.

²⁸ Muthu uoso u di fiiala jimbongo jê, ua-nda kusenguluka hé u di bhala; athu aiuka-phe abuingita kala kimuẋi kiala ni jithangu ja uisu.

²⁹ Muthu uoso u ta mualala ni kuzukutisa o dibhata diê muène, bhu mu subhuka ngó kitembu; kioua-phe muene o ngamba ia njimu.

³⁰ Muthu uambote, ibundu iê i di fuangana ni muxi ua muenhu; uoso u sungila kokuê o mienhu ia athu, muene njimu.

³¹ Se muthu uaiuka u mona phaxi ni lamba mu ngongo, kuambe dingi o mukua-phulu ni mukua-ituxi.