Jisabhu 10 - O Mikanda Ikola

Ixima ia tokala ku maba-maba

¹ Jisabhu ja Solomá. Mona ua dimuka u bheka kusanguluka kua tatʼâ; maji mona-phe kia kala dilaji dia hatu, u bheka lamba diahi ngó kua mamʼâ!

² Jimbongo ja kubhuma jene mu di bota; maji o kuiuka ku kudila muthu ku kalunga.

³ Jihova kene kuila muthu ua iuka u mu ehelela mu nzala; maji o luimbi lua mukua ituxi u lu vutula kuema.

⁴ Uoso u kalakala ni lukuaku lua usonde, u kala ngadiama; maji o lukuaku lua akua midimu-phe lu bhekela umvuama.

⁵ Uoso u muna bhu mvula, muenhó njimu ia mona; maji mukua kuzeka bhu thembu ia kubhongolola, mona u kuatesa jisonhi.

⁶ Mabesá ma tula ku mútue ua muthu uaiuka; maji o dikanu dia athu a bhumu diezala ni usuéia.

⁷ Delembalelu dia muthu uaiuka di kala dibesá, maji o majina a isuéia-phe a kà di bhanga kala kima kia bolo.

⁸ O muthu ua dimukina ku muẋima, u tambula ijila; maji o kiôua kiatu mu kanu, ua-nda kudibhala mukonda dia dikanu diê.

⁹ Uoso uenda ni muẋima uazele, ió ua di-fikidila mu kuenda kuê; uoso-phe uselula o uendelu uê, ua-nda ku di monekena.

¹⁰ Mukua kubhalula ni mesu, u bhekesa jindolo ku muẋima; maji o mukua utalelu ua iuka, u bhekesa kudisanza.

¹¹ Dikanu dia muthu ua iuka, ndunga ia muenhu; dikanu-phe dia athu a bhumu dia sueka uséia.

¹² Luma lu balumuna jimvunda; maji o henda iavungina o itondalu ioso.

¹³ Unjimu u u sanga ku mizumbu ia mukua kilunji; maji o mbangala ia xikamena kubeta mu kunda dia muthu ua kambe kilunji.

¹⁴ O Jinjimu, a-kondeka o unjimu uâ; maji o dikanu dia kioua-phe mukua ni nzendu ia kusekala.

¹⁵ O mvuama, jimbongo jê, iene o mbonge iê ia kusuamena; kalunga ka dia jingadiama-phe, o uadiama uâ uene.

¹⁶ Kima ki bhanga o muthu uaiuka ki bhekela muenhu; maji o nganhu ia kisuéia i vuala kituxi.

¹⁷ Uoso u xikina kia mu longa, uala mu njila ia muenhu; maji uoso u tènda kia mu bazela, unhungana jinga ngó.

¹⁸ Uoso u kondeka o luma ni ku di-uabhesa ku mizumbu, mukua makutu; uoso-phe uenda ni kabódio, kioua.

¹⁹ Mu kuzuela kua vulu, ki mu kambe kutondala; o ua di xibidila-phe uala njimu, ki kioua.

²⁰ Dimi dia muthu ua iuka-phe mukua ni phalata iótungule; muẋima-phe ua isuéia ki uate kima.

²¹ Mizumbu ia muthu ua iuka, i dikila mundu; o ioua-phe, mukonda dia kukamba kilunji, afua.

²² Dibesá dia Ngana diene di muesa jimbongo; o umvuama u tunda kua muene ki u bheka dilamba.

²³ Muthu uaiibha, kutonoka kuê o kubhanga kiaiibha; mukua kilunji-phe, minangu iê, o ku di-longa unjimu.

²⁴ Mukua-phulu kima kioso ki mu kuata uoma, kiene ki mudia; muthu ua iuka-phe Nzambi u mu bhana kioso kiendi o muẋima uê.

²⁵ Mukua phulu uia nzaká, kala ki somboka o kitembu kia kibhungu; maji o muthu ua iuka, ua kalelà-ku kala a mu tunga bhu ndanji.

²⁶ Mukua ni mvindangele ki ia dizemba ni mazu, o dixi ki dia di-zemba ni mesu, kiene ue o musonde kia dizemba ni oso aia ni ku mu tuma.

²⁷ Uoma ua Jihova uia ni kubandekeza ku izuua; maji o mivu-phe ia akua phulu a ká i lengululuisa.

²⁸ O kudielela kua athu a iuka, kubheka kusanguluka; akua phulu-phe kudielela kuâ, kua kà jimuka muene loló!

²⁹ Njila ia Jihova iene o mbonge ia dilengelu phala oso emana muẋima nzanza, maji phala ati-a ituxi ia di bhange kibuika.

³⁰ Muthu ua iuka ka tena ku mu sendumuna, akua phulu-phe ka tena kutunga mu ngongo.

³¹ Dikanu dia muthu ua iuka, di sokolola unjimu; dimi-phe dia kisuéia, dia xikamena ku di batula.

³² Mizumbu ia muthu ua iuka, iezala ni ima iambote; dikanu-phe dia isuéia, diezala phulu mu phulu.