Jipoxolo 9 - O Mikanda Ikola

Saúlu u biluka kua Jezú mu njila ia Damásku

¹ Saúlu-phe hanji a zumina jixibulu ja Ngana, ni ku a kusa, ni ku a jibha. Anga u bhixila kua nganga ia dikota,

² u mu bhinga mikanda ia kuia na-iu ku malombe mua mu sambela o Jijudé mu Damásku, phala ni mikanda iii, ki a sanga-ku athu a tokala ku uendelu iú, mba mala mba ahatu, u a bheka mu Jeluzaleme ku mikilo.

³ O kia kala mu kuenda, ua zukama kiá mu Damásku, u tukumuka kua mu telakela mukengeji u tunda mu diulu.

⁴ Muene ua di bhale bhoxi, anga u ivua dizui dia mu ambela, dixi: Saúlu, Saúlu, eme ualù ngi zukutisila-hi?

⁵ Kuala muène: Eie nanhi, Ngana? Uixi: Eme Jezú, ualu ngi zukutisa! Maji uala kutala ngó hadi, mu kubhana jipondapé ku jisongo.

⁶ Muene-phe ni kuteketa ni kudiuana, uixi: Ngana ua mesena ngi bhanga kiebhi? Ngana u mu ambela, uixi: Balumuka-phe, u bhixile mu mbonge, mueneʼomo a kà ku jimbuila kioso ki u bhinga kubhanga.

⁷ Bheniobho athu ala kuenda ni Saúlu emana ni kimbuua, kia kuzuela ka ki mono. Kuma evu o mutendu, maji ka mono muthu.

⁸ Saúlu anga u balumuka bhoxi; o kia tona mesu, kala kumona kima. Anga a mu kuata mu lukuaku, a mu batesa katé mu Damásku.

⁹ Anga u bhanga izuua itatu ku ufofo, o mu izuua ioso iii u jila kudia ni kunua.

¹⁰ Mu Damásku-phe mu kala xibulu ia Jezú, dijina diê Ananiia, Ngana anga u mu ixana ku nzoji uixi: Ananiia! Muène uetaia, uixi: Emʼ iú Ngana.

¹¹ Kuala Ngana: Balumuka, uie mu luua i exana Luua Iaiuka, kʼ onzo ia Juda, u ibhule-ku muthu dijina diê Saúlu, mukua Talasu. Kienʼiki iú samba,

¹² o mu kusamba ua mono muthu dijina diê Ananiia, u bokona, hé u mu tula maku phala ku mu tonesa o mesu.

¹³ Ananiia-phe u kumbulula, uixi: Ngana, muthu ió nga mu ivu ku mundu; athu é angene mu Jeluzaleme ua a bhange usueia uavulu.

¹⁴ O kiki ua mu kuiza kunu ku Damásku mukonda ua tambula kusuina ku jinganga ja makota, kua kukuta oso a bheza mu dijina dié.

¹⁵ Maji Ngana u ambela Ananiia, uixi: Katuka ngó! Kuma muène mukua sedivisu iami, Eme nga mu solo phala kubheka o dijina diami ku akua jixi jengi, ni ku jisobha, ni ku anʼ a Izalaiele.

¹⁶ Eme-muène ngi mu longesa o jiphaxi javulu ja bhingi kuila muène u ji bhita mukonda dia dijina diami.

¹⁷ Ananiia anga u katuka, hé u bokona mʼonzo ia Juda, o kia tula maku ku thandu dia Saúlu, uixi: Phangeʼ ami Saúlu, o Ngana ietu Jezú ua ku tukulukila mu njila ia Damásku mu uejiia, muène ua ngi tumu ku ku tonesa o mesu, phala uende ni kumona dingi luamukuâ, u izale ue ni Nzumbi Ikôla.

¹⁸ Kithanganʼ okio ku mesu ma Saúlu kua lauka kala ibheletete, anga u mona dingi. Bhenhobho u balumuka, anga a mu batizala.

¹⁹ Bhenhobho, kia tambula kudia, mu mukutu muiza dingi nguzu, kala kia kexi. Saúlu anga u bhanga izuua ni jixibulu mu Damásku.

Saúlu a mu lungulukila kuala o Jijudé

²⁰ Muene kithanganʼ okio, mu malombe ma Jijudé, u kuata kulonga o Njimbu ia Jezú, kuma: Muène Monʼ a Nzambi!

²¹ Oso a mu ivua jinga anga a diuana, exi: Ki muenʼiú mu Jeluzaleme ua jibha-mu ni kuhama oso bheza mu dijina didi dia Jezú? O kunu ki kiene kia mu bheka, kuta athu iá ku mikolo, nʼaie-nâ ku jinganga ja makota?

²² Saúlu-phe u suina dingi kiavulu mu kuzuela ni kutena. O Jijudé ja akua Damásku anga u ji belesa ku maka, mukonda muène ua edikiza ima iavulu kama Jezú muène Kristu kidi, katé Jijudé a lémbua kuzuela.

²³ Kia zubha kubhita izuua iavulu, Jijudé ji di bhongolola ku kikutu, anga a mu kanena ku mu jibha.

²⁴ Saúlu anga uivua o ndunge iâ. Mukonda ene a kexi mu kulangidila o mielu ioso ia mbonge, ni mu usuku ni mu muanha, phala mu kutunda a mu jibhe.

²⁵ Kizuua kimoxi, jixibulu jê-phe a mu bheka mu usuku ku thandu dia kimbaka, anga a mu tulula mu musete ni mikolo.

Saúlu u bhixila mu Jeluzaleme, anga uia ku Talasu

²⁶ Saúlu anga uia, o kia zubha kubiẋila mu Jeluzaleme, u sota ku di banda ku jixibulu, maji ene oso-phe a mu kala ni uôma, mbata ketaia kuila muene ue uala kiá xibulu ia Jezú.

²⁷ Barnabé-phe uiza ku mu kuatekesa, anga u mu bheka ku Jipoxolo. Muene anga u a jimbuila kioso Ngana kia tukulukila Saúlu mu njila, iú ua zuelanê. U a kundila ue kuma Saúlu muene, mu Damásku ua tangele maka mu dijina dia Jezú ni kubhua-uoma.

²⁸ Kia bhiti kiki, Saúlu u kala-nâ mu Jeluzaleme, anga u kala mu ku di kunda-nâ ku mbandu joso, ubhua uôma ni kutanga maka mu dijina dia Jezú.

²⁹ Jijudé ja akua Ngelexa anga u zuela-nâ, a kuata jiphata, maji ene-phe a sota ndunge ia ku mu jibha.

³⁰ Jiphange-phe kia zubha ku kʼ ijiia, Saúlu a mu bheka ku Sezaleia, o koko anga a mu sulula kuia ku Talasu.

³¹ Uila kiki o Ngeleja mu Judeia, ni mu Ngalileia, ni mu Samádia, anga i kala ku paze, i di tunga; i enda mu uôma ua Ngana, ni mu kutululuka kua Nzumbi Ikôla, anga i sokoloka.

Enda a mu saka

³² Anga ki bhita kuma, kia kala Phetele mu kunhunga ku mbandu joso, kizuua kimoxi u kulumuka ku akua Ngana a tungu mu Lida.

³³ Anga u sanga-mu muthu diiala dijina diê Eneia, ua bhange nake dia muvu bhoxi dia kukata, kuma ua kate kila.

³⁴ Phetele anga u mu ambela, uixi: Eneia, Jezú Kristu ua ku sake. Balumuka, u bhange o hama ié. Muène kithanganʼ okio u balumuka.

³⁵ Bhenhobho oso a tungu mu Lida, ni mu Salone, kia mono kiki, a biluka kua Ngana.

³⁶ Kiki ku Jopa ku kala xibulu ia muhatu dijina diê Tabita. (Mu Ngeleku ku di lombolola ela: Kasexi). Muhatu iú ua vula jimbote ni jimola jene kubhanga mu kukuatekesa o jingadiama.

³⁷ Anga ki bhita mu izuuʼ omo, kuma Kasexi u kata, hé ufua. O kia zubha ku mu sukula, a mu tula mʼ onzo ia thandu.

³⁸ Kuma bhu Lida bhua zukama ni bhu Jopa, jixibulu ki evu kuila Phetele iú bhobho, a tuma-ku mala aiadi ku mu dionda, exi: Kana kulaleka! Zá lusolo kunu ku Jopa!

³⁹ Phetele anga u katuka, uia-nâ. O kia zubha kutula, a mu bheka mʼ onzo ia thandu. Ahatu a atudi anga a mu kondoloka ni kudila, ni kuidikiza jimbinza ni izuatu iamukuâ, ia a tungila jinga Kasexi, kia kexile-nâ hanji ku muenhu.

⁴⁰ Phetele-phe ua tumu ku a tundisa ene oso, anga u fukama, u samba. Anga u lunguluka kuala o kimbi, uixi: Tabita, balumuka! Muêne anga u tona o mesu, o kia mono Phetele, u bhetuka, hé u xikama.

⁴¹ Phetele anga u mu bhana lukuaku, u mu balumuna. O kiexana akua Ngana oso ni atudi, u mu bhana kua ene ni muenhu.

⁴² Kienʼiki anga ki fumana mu Jopa ioso, athu avulu anga a xikana Ngana.

⁴³ Mu kukala, Phetele anga u bhanga izuua iavulu mu Jopa, ku bhata dia Ximá muteki a ibha.