Jipoxolo 7 - O Mikanda Ikola

O kufunda kua Xitevá

¹ Nganga ia dikota uibhula Xitevá, uixi: Imʼ iii iedi kiebhi? Ia kidi?

² Kuala Xitevá: Enu jiphange mu akuetu, ni enu mu jitata, ivenu: O Nzambi ia fuma, ua tukulukidile kukululuʼetu Mbalahamu, kia kexile mu Mezopotâmia, kuila kiluua a tunga mu Halane.

³ Nzambi anga u mu ambela, uixi: Tunda mʼoxi ié, ni mu jindandu jé, uize mʼoxi ioso i nga kà ku idikiza Eme.

⁴ Kieniokio muène a nga u tunda mʼoxi ia akua Kaladeia, hé u tunga mu Halane. Bhenhobho ki afu tatʼâ, Nzambi ua mu tauisa dingi katé mʼoxi iii i mu tungu leluʼidi.

⁵ Nzambi muène, Mbalahamu ka mu bhana-mu kibatu kia kulundula, né kia soko ngó kujika o dikanda diê dia dinama. Maji Nzambi anga u ta kikutu kia ku mu bhana-iu ku ivua, ni ku i bhana o mbutu iê ku i lundula. Sumbala Nzambi ki a te o kikutuʼiki, Mbalahamu ka moneka luua mona.

⁶ Nzambi anga u mu tangela kiki, kuma: Mbutu ié a kà kala mu inhunginu mʼoxi iengi, kuenioko a kà a bhikisa, ni ku a bhanga phulu mu hâma jiuana ja mivu.

⁷ Nzambi anga uila dingi, uixi: Akua ʼxi ioio-phe oso a kà a bhikisa, nga kà a bhana kaxtiku, eme ngi Nzambi, o ki ki zubha o kubhita, a kà tunda mʼoxi omo, hé a kéza ku ngi sedivila bhu kididi kiki.

⁸ Nzambi anga u bhana Mbalahamu o kikutu kia kusaia, mu umbangi ua ioso ia mu tangela. O mu kumbidila kikutuʼiki, Mbalahamu iú ua vuala monʼê Izake, anga u mu saia, ki ala ngó mu nake dia izuua. O Izake kia vuala Jakobo, ua mu saie ue. O Jakobo u vuala kuinhi dia kukululu ni kiiadi, hé u a bhanga kiòmuene.

⁹ O jikukululu kia kuata dixinga dia Zuze, a mu sumbisa mu Ijitu. Nzambi-phe u kala-nê,

¹⁰ Hé u mu kudila mu malamba mê moso. O Zuze kia tukuluka kua Falaó, Nzambi u mu muesa ujitu ni unjimu bhu pholo ia Falaó sobha ia Ijitu. O Falaó anga u mu bhanga nguvulu ia Ijitu, ni ia ku tumina dibhata diê dioso.

¹¹ Kieniokio-phe kukala nzala i bhita mʼoxi ioso ia Ijitu, ni ia Kaná, ni phaxi iavulu! Jitata jetu kà muene kudia.

¹² Mu kubhita thembu, Jakobo-phe ki evu kuila sai masa mu Ijitu, u katula jitata jetu njila iadianga.

¹³ Ku njila ia kaiadi Zuze u di tukulula ku jiphange jê, o Falaó anga uijiia o muiji ua Zuze.

¹⁴ Zuze anga u tuma kutakana tatʼâ Jakobo, ni ndandu jê joso, mbé eze mu Ijitu. Ene a kexi makuinhi sambuadi a mienhu ni kitanu.

¹⁵ Jakobo anga u kulumuka mu Ijitu, o muène anga u fila momo ni jitata jetu.

¹⁶ Imbi iâ anga a i ambata hé eza na-iu mu Xikeme. Anga a a funda mu mbila ia sumbile Mbalahamu, mu kitadi kia phalata kua anʼ a Hamolo, mu Xikeme.

¹⁷ Kia zukama-phe mu thembu ia Nzambi kukumbidila o kikutu kia tele ni mulôko bhu kaxi kê ni Mbalahamu, o mundu uetu u kula anga u sokoloka kiavulu mu Ijitu.

¹⁸ Hé a kala kieniokio katé ki eza-ku sobha iengi mu Ijitu, kejiia Zuze.

¹⁹ Sobha muenʼiú anga u dimukina muiji uetu, u bhanga jitata jetu usueia, hé u a bhangesa kutexi tuana tuâ, phala ka kole muenhu.

²⁰ O mu thembu ieneʼ oio, muene mua vuala Mozé, anga u kala mona ua uabha kiavulu. O jitata jê hé a mu sasa mbeji jitatu mʼ onzo.

²¹ Maji o kia mu texi, monʼ a Falaó, ua muhatu, u mu bonga, anga u mu sasa kuma monʼ ê.

²² Kieniokio Mozé anga a mu longa unjimu uoso ua akua Ijitu, anga u kala mesene mu ima ioso ia zuela, ia bhanga.

²³ Xitevá uambe dingi, uixi: O kia kala-phe mu kutenesa makuinhi a uana a muvu, kia mu iza ku muẋima o kuhindula phange jê, anʼ a Izalaiele.

²⁴ O kia sange-ku muthu ua tokala ku muiji uê ala ku mu bhanga usueia, u mu zokelela, u lungisa iú a mu mu bhikisa, mukua Ijitu u mu jibha.

²⁵ Mozé muene ua fikile kuma o phange jê a kʼijiia ue kuma Nzambi, ku lukuaku lua muène, uandu tuma ku a kudila; mbé ene-phe ka kʼ ijiia.

²⁶ Kukia ni kimene, u sanga dingi akua Izalaiele kiiadi ala kuzoka anga u sota ku a bheka ku paze, uixi: Enu jingana, muala mu jiphange, mu di bhangela-hi usueia?

²⁷ Iú-phe, ua kexi mu bhanga mukuâ o usueia, u mu baula, uixi: Eie nanhi ua ku bhange kukala u dikota dia ku tu fundisa etu?

²⁸ Kifua eie uandala u ngi jibha uila ki ua jibha mukua Ijitu mazá?

²⁹ Mozé anga u lenga ki evu o kizueluʼiki, hé u kala mutunganhi mʼoxi ia Midiiana. Kuenioko anga u vuala-ku anʼ aiadi.

³⁰ Kia zubha kubhanga-ku makuinhi a uana a muvu, kua mu tukulukila anju, mu mulengu ua túbhia tua mu uama mu kisasa, mu kikangalakata kia mulundu ua Sinai.

³¹ Mozé kia ki mono, ua di uana kisuma! O kia sota kuzukama-ku mu kutalesa kiambote, ku tunda dizui dia Ngana, uixi:

³² Eme ngi Nzambi ia jitata jenu, Nzambi ia Mbalahamu, ni Izake ni Jakobo. Mozé anga u teketa ni uôma, ka bhumina dingi kutalesa-ku.

³³ Bhenhobho Ngana u mu ambela, uixi: Zula o jisabhatu jé ku inama, kuma kididi ki uemana, mavu a kôla.

³⁴ Nga tongolola muene o phaxi ia mundu uami mu Ijitu, ngevu o kukema kuâ. Eme nga tuluka mu ku a kudila. Kiki eie nganda ku ku tuma ku Ijitu.

³⁵ Xitevá uamba dingi uixi: Mozé imoxi iii, a mu ditunine kuala anʼ a Izalaiele, exi: Eie nanhi ua ku bhange kukala u dikota dia ku tu fundisa etu? Muene Mozé a mu tumu kuala Nzambi kukala dikota, ni mukudi, ku lukuaku lua anju ia mu tukulukila mu kisasa.

³⁶ Muene muthu ua katula anʼ a Izalaiele mu Ijitu, iú ua endesa jinjila, kia zubha kubhanga madiuanu ni isuma mu Ijitu, ni mu Kalunga Kakusuka, ni mu kikangalakata, mu makuinhi a uana a muvu.

³⁷ Muene Mozé umoxiʼú u tangela anʼ a Izalaiele, uixi: Ngana hadia ua kà mi zangelekela mu ʼaxaxe ka jiphange jenu enu-enu, polofeta mukuâ ni eme.

³⁸ Mozé muene anga u di bhongolola ni mundu ua Izalaiele mu kikangalakata, anga u kala momo kumoxi ni jitata jetu ni anju ia mu zuelesa ku Mulundu ua Sinai. Mozé muenʼiú muene ua tambuile o mizambu ia muenhu kua Nzambi phala ku tu bhana na-iu etu.

³⁹ Muenʼiú-phe jitata jetu ka ẋikinine ku di tuma-nê, maji a mu tènde a-nga ku miẋima iâ enda a vutuka ku Ijitu.

⁴⁰ Hé a tangela Alá, exi: Tu bhangele jinzambi, jinzambi ji tu songuela ku pholo. Kuma o Mozé muenʼiú, ua tu songuela mu ku tunda kʼ oxi ia Ijitu, ki tuejiia kioso kia mu bhiti.

⁴¹ Anga a bhanga kidifua kia monʼ a ngombe mu izuuʼomo, hé a jibha ibhaku mu satela o kiteka. Anga a bhanga fesa mu kubhana ujitu ni mu sangulukila o kimbamba kia kalakala ene ni maku mâ.

⁴² Maji o Nzambi-phe ua a sondoloka, iú ua ehelela kusedivila o kifuẋi kia jithethembua ja diulu, kala kia ki soneka mu divulu dia jipolofeta, exi: Kifua Eme-muene mua ngi bhakuilile jixitu jojibhe ni jisata, mu makuinhi a uana a muvu mu kikangalakata, enu dibhata dia Izalaiele?

⁴³ Oko mua nhata jinga o balaka ia Moloko, ni thethembua ia nzambi ienu Lefani, o iteka i mua bhangele phala kubheza. Mu kiki-phe ngi mi balakala katé kuema dia Babilonia.

⁴⁴ Jitata jetu ja kexile ni balaka ia kikutu kia Nzambi mu kikangalakata. Balaka ieneʼoio a i kalakala kala kia lekela muène Nzambi anga u tangela Mozé kuma a i bhange, isokela ni kidifua kia mu idikiza.

⁴⁵ O iene kia i lundula o jitata jetu, eza na-iu ni Josuué kia bokona mu bhingana mʼoxi mumu mua kaiesa Nzambi o matumbu ku pholo ia jitata jetu. Anga a kala kienʼiki katé mu izuua ia Davidi.

⁴⁶ Davidi iú, anga u mona kuzediua ku mesu ma Nzambi, hé u bhinga kua Ngana phala ku mu ehela kuila Nzambi ia Jakobo u mu tungila dibhata.

⁴⁷ Maji Salomá-phe muène ua tungu onzo ia Nzambi.

⁴⁸ Sumbala Ió Uasuka ku Ukota kene kutunga mu jinzu jokalakale ni maku ma muthu, uila kia tange o Polofeta, uixi:

⁴⁹ Diulu kiandu kiami, oxi bangu iami ia kutula inama. Enu-phe mu ngi tungila onzo ia kidifua kiahi? Kididi ki kuebhi ki ngi tula phala dinhohenu?

⁵⁰ Manhi lukuaku luami ki luene lua bhange o imbamba ioso iii?

⁵¹ Mu kuzumbuka Xitevá, uixi: Enu mua thathamena-hi kiosuʼiki, tata! Mua kolela-hi kinéne o muẋima, matui a mi xiluka, mua lémbua kuivua o maka ma Nzambi! Enu izuua ioso mua di bhange kala o jitata jenu, nuka mu kamba kuẋinukina o Nzumbi Ikôla!

⁵² Polofeta kuẋi jitata jenu ja kambele ku mu zukutisa? Ene a jibha jinga o akunji a Nzambi, ió oso a tuamene kuidikiza mʼ ukulu kianda kuiza o Muthu Uaiuka. O Muène kiki enu mua mu bhakula, enu mua mu jibha; mu ijibhanganga iê.

⁵³ Enu mua tambula o Kitumu mu kusedivila kua ji-anju, ku ki kumbidila-phe mua ki tokoka!

O kufua kua Xitevá

⁵⁴ Kienʼiki ene oso a tokala ku Kionge kia Jitata ki evu o makʼ ama, a saluka dingi kiavulu, hé a mu kokotela ku mazu.

⁵⁵ Maji muène-phe uezala ni Nzumbi Ikôla, u tonginina mu diulu anga u mona o kubenha kua Nzambi. Ua mono ue ni Jezú uemana ku madilu ma Nzambi.

⁵⁶ Bhenhobho uixi: Talesenu! Nga mono diulu dia jikuka, ni Monʼ a Muthu uemana ku madilu ma Nzambi!

⁵⁷ Ene-phe matui a ma jika, a di kola bulukutu, hé a di lukula muenhu umoxi ku thandu diê.

⁵⁸ A mu kukila ku kanga dia mbonge, anga a mu bûba ni matadi. O jimbangi anga ji tula izuatu iâ bhu inama ia munzangala dijina diê Saúlu.

⁵⁹ Ene kioso kia mu bûba Xitevá ni matadi, muène-phe iú hingila Ngana Jezú, uixi: Ngana Jezú, tambula nzu mbi iami!

⁶⁰ Anga u fukama, u di kola di dizui dia suina, uixi: Ngana, kana kuta kituxi kiki mu konda iâ! O kia zubha ku ki zuela, u batula muenhu.