Jipoxolo 4 - O Mikanda Ikola

Phetele ni Nzuá a a kuta

¹ Kiosuiki Phetele ni Nzuá kia kala mu zuelela o mundu, jinganga ji tuia-bhu, ni kabhitangu ka kilangidilu kia Tembulu ni jisaduzeu.

² Ene a futuluka kiavulu, mukonda dia jipoxolo jiiadʼiji kukala mu longa mundu, ni kutanga o maka kuma Jezú ua fukunuka ku ʼalunga. Ni kuila o kia fukunuka muenʼiki, o madifundu ue hádia a kà fukunuka.

³ Anga a a kuata, a tuma ku a zekesa mu ʼaleia, kuma mu kumbi dia ngoloxi kiá.

⁴ Ku athu evu o maka-phe, ku kala avulu a xikana. O mundu ua ia a xikana, anga u tena konda ia midi jitanu.

⁵ Kúkia ni kimene, afundixi, ni adiakime ku mundu, ni jimesene jene mu longa o Kitumu, a di bhongolola mu Jeluzaleme.

⁶ Mu Kionge muenhomo mueza ue nganga ia dikota Hana, ni Kaiafa, ni Nzuá, ni Xandele, ni iá oso a tokala ku muiji ua nganga ia dikota.

⁷ O atumini kia zubha ku bhaka o jipoxolo bhu ʼaxaxe kâ, a ebhula, exi: Enu imʼ iíi, mua i bhange kiebhi? O kubhanga kiki, mua ki bhange ni kutena kuahi, mba mu dijina dia nanhi?

⁸ Bhenhobho Phetele uezala ni Nzumbi Ikôla, uixi: Enu mu afundixi, ni adiakime ku mundu!

⁹ Lelu, enu jingana, mua mu tu ibhula o mbote i tua bhange ku muthu iú ua kexi kinema ni kioso muène kia disanze.

¹⁰ Uila kiki, ijiienu-phe enu-enu oso mu jingana, ni mundu uoso ua Izalaiele, kuma mu dijina dia Jezú Kristu dia Nazalé, mua mu jibhile ku dikulusu, Nzambi anga u mu fukununa ku ʼalunga, muene mua disanzela o muthu iú uemana bhu pholo ienu bhenhabha.

¹¹ Muenʼió Jezú, a mu tange kuala o Madivulu ma Ngana, kuila: Muène o ditadi di mua tènde enu mu jimesene, dia bhingi diene di kuatesa bhu thungi.

¹² O kubhuluka kikale kua Muène ngó. Kuma o bhoxi dia diulu ʼabha, bhu ʼaxaxe kʼ athu, kana-bhu dingi dijina diengi dia bhana-bhu, dia tokala di kala dijina dia ku tu bhulula. Kiene kia bhekela kuila o Nzambi dijinʼidi ua di tula bhuma bhua bhingi kana muthu u lémbua kubhiẋila-bhu.

¹³ Kienʼiki o adiakime bhu Kionge Kiadikota, kia zubha ku mona o kúbhua uôma kua Phetele ni Nzuá, ni ku a tongolola kuma athu akua-tutu, ka zubha ku dilonga madivulu, a diuana, anga ki a lombolokela kuma ende ni Jezú.

¹⁴ Maji o kia mono diiala a mu sake, uemana-nâ kumoxi, ka tena dingi kuzuela kima.

¹⁵ Hé a tuma-phe kutubhula o Jipoxolo mu Kionge kia Jitata, ene anga a xala ni ku di longesa mudiâ,

¹⁶ exi: Mala iá, tu a bhanga kiebhi? Kuma kisuma kia dikota kidi ki a kalakala, kia di monekena ku akua Jeluzaleme oso, etuene ue ki tu tena ku dituna-kiu.

¹⁷ Maji phala ki ki sambuke dingi ku mundu-phe, tu a kuatesienu uôma, kuma hinu ka ki tone dingi, o kutela muthu maka mu dijina didi dia Jezú.

¹⁸ Ene anga a exana, hé a a tendelela, exi: Ki mi kale lumoxi! Kana kutanga mba kulonga mu dijina dia Jezú!

¹⁹ Kuala Phetele ni Nzuá-phe: Enuenu xinganekenu kioso kia iuka-bhu bhu pholo ia Nzambi: O ku mʼ ívua enu, mba kuívua Nzambi? Tongololenu-kiu!

²⁰ Kuma etu ki tu tena kufula kutanga o ima ioso i tua mono, i tu evu.

²¹ Ene kia zubha ku a kusa dingi, a eha. Kuma ka bongo-bhu kikuma kia a bhela kaxtiku, mukonda dia uôma ua mundu. Mbata o kia bhangʼiki athu oso a mu ki ximanena Nzambi.

²² Mukonda o diiala muène a mu bhange o kisumuʼiki, kia ku mu saka, ua kexi mukua makuinhi auana a mivu ndenge.

Jixibulu ji di bhongolola mu kusamba

²³ Kioso o Phetele ni Nzuá kia zubha ku a eha, eza ku akuá, anga a a jimbuila kioso kia a tangela o makota ma jinganga ni adiakime a mundu.

²⁴ O iá, ki a zubha ku kʼ ívua, a zangula dízui mu kusamba kua Nzambi ni muenhu umoxi, exi: Ngana, eie ua bhanga o diulu ni oxi, ni menhʼ a kalunga ni ioso iala-mu!

²⁵ Eie-muène ua tanga kua Nzumbi Ikôla mu kanu dia tatʼ etu Davidi, selevende ié, uixi: Matumbu ma salumukina-hi, mundu anga a kana kima kia ku di metena?

²⁶ Jisobha mu ngongo jemana, atumini a ifuẋi a di kase, phala kubhanga ni Ngana, ni Kristu iê.

²⁷ Kuma ni kidi muene, mu mbongeʼ umu o Selevende ié ukôla, Jezú, ua mʼ undu ni maji phala kukala Kristu, ni Helode ni Pônsio Pilatu, ni akua matumbu, ni mundu ua Izalaiele, a mu balukila.

²⁸ Ene a di bhongolola phala nʼa bhange kioso o lúkuaku lué ni vondadi ié ia lekelela jinga kuma ki bhita.

²⁹ Kiki-phe, Ngana, talesa o jindumu ja tu te. O jiselevende jé u a bhane kúbhua uôma mu kutanga o maka mé.

³⁰ Eie, Ngana, sununa o lúkuaku lué ni kusaka, phala a bhange isumua ni nadiuanu mu dijina dia Selevende ié Ukôla, Jezú.

³¹ Ki a zubha kusamba, o kididi kia di bhongoluela, kia tunguta. Ene oso anga ezala ni Nzumbi Ikôla, hé andeka kutanga o maka ma Ngana ni kúbhua uôma.

O Kisangela kia Jixibulu

³² Kifuẋi kioso kia iá a xikana anga a kala muenhu umoxi, ni muxima umoxi. Kana-bhu muthu ua tena kuila ku jimbongo jê u jijila-ku kimbamba kuma kiê-muène, maji ene oso a kala ni ima ioso mu kisangela, anga enda ni ku di uanena na-iu ene oso mudiâ.

³³ Jipoxolo anga a bhana ni kutena kuavulu umbangi uâ ua kufukunuka kua Ngana Jezú. Anga kukala kiadi kiavulu kia Nzambi ku thandu dia ene oso.

³⁴ Ku mundu uâ, kana muthu ue u bhindama, kuma oso a vu jixi jâ mba jinzu, a ji sumbisa, o itadi ia imbamba ia sumbisa, eza,

³⁵ hé a i tula bhu inama ia Jipoxolo, o oso a bhindama, anga a a uanena jinga, kala muthu kioso kia tokala o kutata kuê.

³⁶ Kienhókio Zuze, a mu luka kuala Jipoxolo, exi, Barnabé, (dijina kia kuila muthu u bhuisa uôma), levita a mu vualela mu kikôlo kia Xípele,

³⁷ u kala ni díbhia diê, anga u di sumbisa, o kitadi uiza na-kiu, u ki tula bhu inama ia Jipoxolo.