Jipoxolo 28 - O Mikanda Ikola

Phaulu mu kikôlo kia Melita

¹ Ki tua zubha o kubhuluka, kuila tua bhixila kiá ku ngonguenha, kiene ki tuejiia kuma kikolo a kʼixana Melita.

² O matambu a tungu momo a tuidikisa uthu uahi ngó! Kuma ene a uika tubhia, anga a tu tambulula etu oso, mukonda dia mvula iala kunoka, mukonda ue dia mbambi.

³ Phaulu-phe kia ẋanga kita kia jihuinhi, mu ku ji tula mu tubhia, mu tunda diuta, mukonda dia munza, anga di mu naminina ku lukuaku.

⁴ O matumbu ala mu kikôlo, kia mono o kibâmba kia mu nhenganana ku lukuaku, a di ambela, exi: Muthu iú uedi kala kijibhanganga! Mukonda sumbala ua bhuluka mu menha, maji Ngunza ka mu ehela kukola muenhu.

⁵ Phaulu-phe muène kibâmba ua ki kukumuina mu tubhia, ki kia mu kuama.

⁶ Ene anga a mu talesa kuila u jimba, mba u ẋikuka nʼ a fuila bhenhobho. Maji o kia kinga-phe kithangana kiavulu kuila ki bhita, a mu mono ki kia mu idi kima, a lunguluka, exi: Muenʼiú, Nzambi!

⁷ Kiki-phe mu mukau uenʼió mu kala mabhia ma muadiakime ua dikota ua mu tumina kikôlo, dijina diê Pubilo. Muenʼiú anga u tu tambulula kiambote, hé u tu langeka ni ujitu izuua itatu.

⁸ Kieniokio-phe, tatʼ â Pubilo u kala mu kata febele ni mu mala mua mu kala kubualala ni kikolôta. Phaulu anga u bokona mʼ onzo muala, u samba, u mu tula maku mê, hé u mu ilula.

⁹ Kiki ki kia bhiti, oso dingi mu kikôlo ala ni mahaxi, eza, hé a a saka.

¹⁰ Ene anga a tu bhanga ujitu uavulu! Kizuua ki tua katuka, a tu longela mu naviiu ima ioso i tua bhindamena phala mu njila.

Phaulu uendela mu naviiu iengi, anga u bhiẋilila ku Roma

¹¹ Kia bhiti mbeji jitatu, tu katuka mu naviiu ia Xandediia ia bhitila o thembu ia mbambi mu kikôlo. O naviiu ienʼiii dijina diê Kakulu ni Kabhasa.

¹² Anga tu kuaka bhu Silakuza, hé tubhanga-bhu izuua itatu.

¹³ Kutunda bhobho tu engumuka, anga tu bhixila mu mbonge ia Lejio. O kia bhiti kizuua kimoxi, kitembue kia sulu kia bhuku, anga tu bhixila ku Poteole.

¹⁴ Mu mbonge muenèʼ omo anga tu sanga-mu jiphange, a tu dionda kuinduluka-nâ sambuadi dia kizuua. Kiene kiua ki tua bhixila ku Roma.

¹⁵ O jiphange kueneʼ oko ku Roma kia tu ivu kuila etu tuiza, eza ku tu tumbidila katé bhu Kitanda kia Apio, ni bhu Ijima Itatu. O Phaulu kia di mono-nâ, ua sakidila Nzambi, iú ua tana-ku dingi.

Phaulu mu Roma

¹⁶ O ki tua zubha kutula mu Roma, Kabhitangu u thelekala jipelezo kua xefe ia kambamendo. Maji o Phaulu a mu ehela ku di kalela ni kididi kiê, ni disoladi diala ku mu inga.

¹⁷ Ki tua zubha kubhanga izuua itatu, Phaulu muène ua tumu kuixana o makotʼ athu ku Jijudé, a kexile mu Roma, phala kudimona-nâ. O kia bhongoloka, ua ambela uixi: Eme, akuetu jiphange, sumbala ki ngi bhange mundu uetu kima kiaiibha, ki ngi tondala ifua ia jitata jetu, o Jijudé mu Jeluzaleme a ngi thelekala upelezo ua akua Roma.

¹⁸ Ene-phe kia ngi tokuesa, andalele ku ngi jituna, mukonda ka ngi mono ni kikuma ki tokala ku ngi jibha.

¹⁹ Maji o Jijudé kia zuela akua Roma ene kʼandala ni ki bhite. Kiene kia ngi bhangesa o kufundila ku bhixila kua Sézalu suke o kifuẋi kietu-phe eme ki ngala ni kima kia ku a kuzala.

²⁰ Kiene ki nga mʼixanena ku di mona, ni ku di kunda ni enu. Mukonda o kidielelu kia Izalaiele kiene kia ngi kuikisa lubhambu lulu.

²¹ Ene a mu ambela, exi: Etu ku Judeia ki tu tambula-ku mikanda ia ku tange eie. Ki ku tundu ue akuetu, a ku âmba eie kima kiaiibha.

²² Maji tu endi-phe tu ku ivua kioso ki ua fika, mbata o kisoko kiki ki ua tokala, tua kʼ ijiia kuma kuene kuoso kia mu bonga malebhu.

²³ Kia mu bhana kizuua kia tokala o kudimona dingi, avulu muene a mu sanga mʼonzo mua tula. Muène anga u a lomboluela maka, u bhana umbangi ua Utuminu ua Nzambi. U sota ku a xikanesa ni maka ma tundu mu Kitumu kia Mozé ni mu madivulu ma Jipolofeta, tunde kimene katé ngoloxi, kuila Jezú muene Kristu.

²⁴ Amoxi anga a xikana ima ia tange Phaulu, amoxi-phe a xibhaka.

²⁵ O kia kuata kuzuela imʼ iii, iá a lémbua ku dʼivisa mudiâ, ene oso a muangana. Maji kuila kiluua a zubha o kumuangana, Phaulu uzuela ngó kiki, uixi: Kidi kia Nzumbi Ikôla, kia tange polofeta Izaia ku jitata jetu,

²⁶ Uixi: Ndeie ku mundu iú, ua kà ambele, kuila: enu o kuivua muanda kuivenunu, anga mu tokoka o kuijiia. O kutala, muandu talenunu muene, anga mu tokoka o kumona.

²⁷ Mbata o muẋima ua mundu iú ua kolokota, ene o matui mâ a ma xiti, o mesu mâ a ma jika. Hé ki kiene, eji kumona ni mesu, kuivua ni matui, kuijiia ni muẋima, nʼ a lunguluke dingi, eme ni nga a sake.

²⁸ O mu kuzubha Phaulu, uixi: Ijiienu na-kiu-phe kuma, o kubhuluka kueniʼ uku Nzambi ua ku tumikisa ku matumbu, ió ki Jijudé, ene-phe anda kuivua. [

²⁹ Kia zubha o kuzuela kiki, Jijuidé ji muangana, anga a di kuata jiphata javulu mudiâ.]

³⁰ Muène anga u xala mivu iiadi mu dibhata diê-muène dia mu lukalesa, u kala mu tambulula oso a mu kana.

³¹ Anga muène u boka o Njimbu ia Utuminu ua Nzambi, u longa ni kubhua o uôma ima ioso ia tokala kua Ngana Jezú Kristu, kana muthu ua mu fudisa.