Jipoxolo 27 - O Mikanda Ikola

Phaulu uendela mu naviiu mu kuia ku Roma

¹ Kia zubha o kudikunda kuila tu endela mu naviiu mu kuia ku Itália, Phaulu ni jipelezo jamukuâ a ji thelekala kua Kabhitangu dijina diê Julio. Muene ua tokalele ku kompanhiia iexana kuamba ia Sézalu Nguxi.

² Anga tu di longa mu naviiu ia Ndalamito ianda kuia ku matabhu a kibumu kia Azia. Bheniobho anga tu katuka. Aristarko mukua mbonge ia Tesalonika ku Masedonia, hé u kala ue ni etu.

³ Mu kizuua kia kaiadi anga tu kuaka bhu tabhu dia Sidonia, Julio anga u bhanga Phaulu kiambote, u mu ehela kuia mu ku di mona ni makamba mê, nʼ a kale ku usonhi, mbé a tambule ioso ia bhindamena.

⁴ Mu kutunda mu Sidonia, tu lunga ku musanza, anga tu bhita ku dima dia kikôlo kia Xipele, mukonda ku tua kanene o kitembue ki kia lungu-ku.

⁵ O ki tua zubha kuzauka o musanza ua Silisia ni Pamfidia, tu kuaka bhu Mila mu mbonge ia tokala ku Lisia.

⁶ Kabhitango anga u sanga bheniobho o naviiu ia Xandediia iala kuia ku Itália, anga u tu longa momo.

⁷ Naviiu ki ia bhange izuua iavulu ni kuenda kimuanu, kia tu bonzo o kubhiẋila ngó bha lulama ni Sinidu. Kuma o kitembue ki kia tu ehela ku di tela koko, tua bhitila ku dima dia kikôlo kia Keleta, hé tu lulama bhu Salamone.

⁸ Anga tu tala hadi mu ku kunga ni kibumu kiê, katé ki tua kuaka kididi a kʼ ixana Tabhu dia Tululuka, bha zukama ni diembu dia Laseia.

⁹ Anga tu kala-bhu muene kithangana. O ki tua mono thembu ia tu bhiti, o kuendela ku musanza kuala kiá iluezu, kuma kizuua kia kujila kia bhiti kiá, Phaulu ua a dimuna, uixi:

¹⁰ Enu jingana, nga mono kuma o njilʼ iii iandù kala ni hadi iavulu, ni imbamba ianda kudibota, ni naviiu, ni mienhu ia athu avulu ianda kufua.

¹¹ Maji o Kabhitangu-phe ua suu ngó mutabhuidi, ni mukua naviiu iê, kevu dingi kia zuela Phaulu.

¹² Mukonda ue o ditabhu ki dia uabhela kubhitila-bhu o thembu ia mbambi, athu ala-bhu kota a longesa o kukatuka dingi, phala kuteza kubhixila ku Fenise, o thembu ia mbambi nʼ a i bhitila koko. Kuma diodio ditabhu dia Keleta, dia bhana o mbandu ku suueste, o mbandu iamukuâ ku nordeste.

O kibhungu mu Kalunga

¹³ Kia mono o kitembu kia sulu kiandeka o kubhuka kilendu, a fika anda kubhanga kiá o ndunge iâ ia xinganekene, anga a sunga ombua ia naviiu a katuka, a kuata ku kunga ni kubnumu kia Keleta.

¹⁴ Maji mu kithangana-phe kiofele, kuenioko kua a tukulukila kitembu kia suina, a kʼ ixana Eulokilo, kia tundila ku kikôlo.

¹⁵ Naviiu kia i kuata kuala o kitembue, kubhanga na-kiu ki ku xikina, etu tua di ehelela, kiʼ kia tu phephulula.

¹⁶ Mu kubhita ku dima dia kakikôlo a kʼixana Kauda, ku mbandu iê ia sulu, tua tutumba kiavulu mu kusunga o bote ia batuka ku naviiu.

¹⁷ Kia zubha kuzaula o bote, atabhuidi a bhanga ioso ia tena mu ku kuatesa o naviiu, anga a bhitisa mikolo koxi diê. Kuma ala ue ni hele ia kusukamena mu kisekele kia zukama ku ndundu ia Libia. A tulula o jimvela, naviiu anga a kala ngó mu ku i kungulula ku kitembue.

¹⁸ O kibhidi-phe hanji kia tu vulu, mukonda dia kitembue. Mu kizuua kiamukuâ anga a kuata kutebhununa o imbamba, ni ku i takula mu menha.

¹⁹ Mu kizuua kia katatu ene ni makumâ, a texi o felamenda ia naviiu mu Kalunga.

²⁰ Tua bhange muene izuua iavulu, o dikumbi ni jithethembua tua lémbua ku di mona; o kitembu kia dikota hanji kia jiji, o ku tua sukila, ni kudielela kuila tu bhuluka, kuene kuoso kua tu bhu.

²¹ Ki tua zubha kubhanga thembu iavulu sé kudia, Phaulu uemana mu ʼaxaxe kâ, uixi: Enu jingana, mua fuamene ku ngʼ ivua kioso ki nga zuela. Mukonda se mua kambele kukatuka ku Keleta, hinu hadi ioso iii ki mu i tale, ni uenji ki ueji kudibota.

²² Kiki-phe, nga mi ambela, ki mu kale ni kikote, kuma ki bhuanda kufua muthu. O naviiu ngó iene ianda ku tu di bota, kuabhu!

²³ Nga zuela kiki, kuma usuku ua lelu, kua ngi tukulukila anju ia Nzambi, nga mu tokala, ngene ku mu sedivila,

²⁴ Uixi: Ku kale ni uôma, Phaulu! Kuma eie ua bhingi ua kèmana bhu pholo ia Sézalu. Talesa-phe, o Nzambi mu mbote iê ua ku bhana kiá oso u uala kuendela-nâ kumoxi mu naviiu.

²⁵ Uila kiki, enu mu jingana, tululukenu! Kuma eme nga dielela Nzambi, nga xikana kuila kioso kia ngi tangela kiene kianda kubhita.

²⁶ Kia bhingi-phe tu takukila mu kikolo.

²⁷ Kia bhiti o semana jiiadi, mu kaxi ka usuku, mabhuku hanji ma kuata ku tu xinjijika (takujula) ku musanza ua Adriatiko, akua kutabhula naviiu a suma kuma a zukama ku kibumu kia oxi.

²⁸ Anga a takula mukolo kua kutila kima kia neme phala kuzonga menha, a sanga kuila o kuzonga kuê kua makuinhi a tatu a metulu ni kisamanu. Kubhanga kithangana, a zonga dingi, hé a sanga makuinhi aiadi a metulu ni sambuadi.

²⁹ Kuma hele ia a kuata, kuila tu di vunda ku matadi ku kanga, a zoza ombua jiuana ku dima, ku popa ia naviiu, anga ênda kuila kuma kukia lusolo.

³⁰ Akua kutabhula anga a sota kulenga mu naviiu. O mu kudimbikisa, a tulula o bote, hé a fikisa kala andala kutuamekesa o jimbua ku pholo ia naviiu.

³¹ Bhenhobho, Phaulu uambela Kabhitangu ni masoladi, uixi: Akua kutabhula enʼiá se a kamba kuxala mu naviiu, enu ki mu tena kubhuluka.

³² O masoladi anga a batula o mikolo ia kutile o bote, hé a iehela kukunguluka.

³³ Kioso ki alu kinga kuila kuma kukia, Phaulu u a dionda kudiaula kakudia, uixi: Lelu uana kizuua ku dikuinhi, hanji ki mua nange ni kujila, ki mu di kama.

³⁴ Ndokuenu-phe, nga mi diondo, dienu kama koso-koso, mu kale ni nguzu, mu tene kulaia. Kuma enu oso, kana muthu kuandu mu sonoka ngó lundemba lumoxi ku mutue.

³⁵ Phaulu kia zuela kiki, ua tambula o mbolo anga u sakidila Nzambi ku mesu ma ene oso, anga u bukula-ku u kuata mu kudia.

³⁶ Ene oso anga a sangumuka kiua, a tambula uâ hé a mateka kudia.

³⁷ Etu oso tuala mu naviiu, tuala tu hâma jiiadi ja muthu ni makuinhi sambuadi ni kisamanu.

³⁸ Ene oso kia zubha o kuikuta, masa a ma takula mu menha, phala kutebhununa o naviiu ni i bhebhuluke dingi.

Athu oso a bhixila ku ngonguenha ni muenhu ni kudisanza

³⁹ Kuma ki kuakie, atabhuidi oxi ka ijiia, maji a mona-phe dituku diala ni palaia. Anga a di longesa mba a tena kukuakesa o naviiu bheniobho.

⁴⁰ Anga a batula o mikolo ia kuata jimbua, hé a ji xa mu muenha, a zoza mikolo ia kuata jileme, a sunga mvela iala ku pholo a i futununa ku kitembue, anga a pondala ku palaia.

⁴¹ Mu kubhita-phe bhuma bhua vulu o museke, bhua takanena hungulule jiiadi, naviiu ia sukamena bhoxi. O polôua anga i kuata, ki ia xikina kuzamba, o popa-phe i mateka kubudika ni kusuina kua mabhuku.

⁴² Masoladi anga a ta phungi ia kujibha o jipelezo joso, phala ka bhixile ku ngonguenha ni kuzoua nʼ a lengeʼâ.

⁴³ Kabhitangu-phe, kuma uandala u bhana Paulu o muenhu, ua a fudisa. Muène iú ua tumu oso ejiia o kuzoua a diange ku di ta ku menha, mbé a bhixile ku ngonguenha.

⁴⁴ Anga a xala-bhu u a tuma kuila amoxi a kuata mabaia, amoxi, ibhasu iengi ia naviiu, phala a bhuluke. Mu kubhanga kiki, ene oso a tomboka ku ngonguenha, a bhuluka.