Jipoxolo 26 - O Mikanda Ikola

Phaulu u fundila bhu pholo ia Ngilipa

¹ Ngilipa anga uambela Phaulu, uixi: A ku bhana disesa dia kuzuela. Phaulu anga u sunununa o lukuaku luê, u kuata kufûnda, uixi:

² Nga di mono kuzediua, sobha Ngilipa! kuila eme ngi fundila lelu bhu pholo ié, o ima ioso ia ngi tatela o Jijudé.

³ Kia di uabhela ue, mukonda eie u mesene, uejiia o ifua ioso ni maka ku Jijudé. Nga ku diondo-phe u ngʼivue ni muanu.

⁴ O kikexilu kiami tunde undenge, Jijudé joso a kʼ ijiia. Ejiia ue kuma tundeʼ ami undenge nga kudila mʼoxi iami muène mu ʼaxaxe ka kifuẋi kietu, ni mu Jeluzaleme.

⁵ A ngʼ ijiia kiambote kuila tunde ku dimatekenu, se ene andalele ku ngi bhela umbangi,—kuma kisoko kia beta kunjandamana mu ubhezelu uetu, muene mu nga tokala, mukonda nga kexile ngi falizeu.

⁶ O kiki ngemana bheniabha mu ku ngi fundisa, mukonda dia kudielela o kizuelu kia bhele Nzambi ku jitata jetu.

⁷ O kuinhi dietu dia muiji ni kiiadi, kia jijila o kusedivila Nzambi usuku ni muanha, kiene o kizuelu kia dielela ku ki mona. O kudielela kuenioko-phe, eie ngana u sobha, kuene kua bhekela o Jijudé ku ngi tatela!

⁸ Enu mu Jijudé mu ki kitilahi makutu o kuxikana kuila Nzambi u fukununa madifundu? Phaulu anga u ta-ku dingi, uixi:

⁹ Eme-muène nga fikile kidi kuma, nga tokala kubhanga ima iavulu ia kuẋinukina o dijina dia Jezú dia Nazalé.

¹⁰ Kiene-phe ki nga kexile mu kubhanga mu Jeluzaleme. Mukonda kia ngi bhele jinganga ja makota o kutena, ngi kala mu jika akua Ngana avulu mu ʼaleia. Ni ki eza jinga mu ku a jibha, nga tele-mu o dizui diami, ngixi a a jibhe muene.

¹¹ Ngi kala luavulu mu ku a bhana kaxtiku mu jinzu joso ja mabhezelu a Nzambi, ngi bhindamena ku a xingisa Jezú ni kudituna o kuxikana. Mukonda ue njinda ia ngi kuatele kinene, nga a salukila kiavulu, katé nga a zukutisa ni ku madiembu a makanga.

Phaulu u tanga o kubhuluka kuê

¹² Phaulu anga u kuata kuzuela, uixi: Kiene kia ngi bhekesele kuia ku Damasku, ki nga tambula o kutena ni mikanda, ku jinganga ja makota.

¹³ Maji mu kumbi dia mediia, eie ngana u Sobha, mu njila nga mono mukengeji ua tundu ku diulu, o kubenha kuê kua dikumbi ndenge mu kutua. O mukengeji uenʼiú ua ngi muikina eme ni athu u ngende-nâ.

¹⁴ Etu oso ki tua zubha o ku di bhala bhoxi, ngevu dizui dia ngʼambela mu uzuelelu ua Hebeleu, dixi: Saulu, Saulu! Eme ualu ngi zukutixila-hi? Eie, ni kuthathamana kuosʼ uku, ualu di kuamʼé ngó eʼmuene, mukua ni ngombe ki i ṗhuṗha isende ku jisongo.

¹⁵ Ngixi: Eie nanhi, Ngana? Ngana uixi: Eme Jezú, ualù ngi zukutisa.

¹⁶ Maji balumuka-phe, uimane. Eme kiene ki nga ku tukulukila, phala ku ku tuma, u kale mukunji uami, u kale mbangi ia ku tangela akuenu o ima ioso i nga ku tukulukila na-iu lelu, ni ima ioso hinu i ngi ku tukulukila na-iu dingi.

¹⁷ Ngi ku kudila ku mundu uenu ua Jijudé, ni ku matumbu, kuoso ku ngi ku tuma.

¹⁸ Phala ua kà a tonese mesu, a xie mua vundu, a biluke ku mukengeji, a tunde mu ubhika kua Satana, eze kua Nzambi. O mu ku ngi xikana eme, a tambule muloloko ua ituxi iâ, mbé a kale kiá muʼ axaxe ka kibuka kia athu a Nzambi òsole.

Phaulu u tanga o kikalakalu kiê

¹⁹ Kia bhiti kiki, sobha Ngilipa, kisumua kia tundu ku diulu ki ngi ki xibhaka.

²⁰ Nga diangela kubhana jingolokela ku akua Damasku, ngedi ni ku Jeluzaleme, ni mʼ oxi ioso ia Judeia, katé ni ku matumbu. Nga a jimbuila jinga kuma a tokala a diela ni kueha o ituxi iâ, nʼ a biluke kua Nzambi, ni kubhanga o imbamba ia fuamena o kudiela kua kidi.

²¹ Kiene kia ngi kuatela o Jijudé kioso ki nga kexi mu Tembulu, anga a sota ku ngi jibha.

²² Kia ngi kudila Nzambi-phe, nga kolokota katé mu kizuua kia lelu, ni kubhana umbangi uê ku makota ni ku jindenge. Ki ngene mu zuela kima-phe kia kambele Mozé ni jipolofeta ku ki zuela kuila hinu kʼ iza.

²³ Kuma ene a tange, exi: Kristu ua kà bhita ku jiphaxi, muène ua kà dianga mu kufukunuka kuê ku ʼalunga, mu kutubhula o mukengeji ku mundu ua Jijudé ni ku matumbu.

²⁴ Kia kala muène mu kufunda kiki, Festu u di kola, uixi: Eie Phaulu, ua saluka! O kuijiia kuavulu, kua ku bhekela kusaluka!

²⁵ Phaulu-phe ua mu vutuila, uixi: Eme ki ngi saluka, eselênsia dié na Festu. Nga tange maka ma kidi ni kilunji.

²⁶ Kuma eie sobha Ngilipa, imʼ iii ua ijiié, kiene ki nga mu zuelela sé héle. Kuma nga fika kuila imʼiii ki i mu jimbi, mukonda ki ia bhitila ku hota.

²⁷ Eie Sobha Ngilipa, Jipolofeta ua ji xikana? Nga ku ijiia kuma ua xikana!

²⁸ Bheniobho Ngilipa anga uambela Phaulu, uixi: Kindalʼ iki u ngi bhomba kiá kukala Kidistá?

²⁹ Kuala Phaulu: Nginda muene ki ku bhite, né mu kindala, né ku hádia, kuma kiene ki nga mu bhinga kua Nzambi, kuila ni eie kiá, ni ene oso a ngʼivu lelu, mu kale muene kala ki ngalʼ eme,—maji mu kamba ngoho o malubhambu iá.

³⁰ Phaulu kia zuela kiki, Sobha Ngilipa u balumuka ni Nguvulu, ni Mbelenise, ni ene oso kiá a xikamena-nâ.

³¹ O kia zubha kutunda-bhu a kala mu ku di zuelesa mudiâ, exi: Diialʼ idi ka bhange kima ki tokala ku mu jibha, mba ngó ku mu ta ku malubhambu.

³² Ngilipa anga uambela Festu, uixi: Diialʼ idi ueji ku mu ehe, se ka fundilile kubhiẋila kua Sézalu.