Jipoxolo 25 - O Mikanda Ikola

Phaulu bhu pholo ia Festu. U fundila kubhiẋila kua Sézalu

¹ Festu kia zubha kutula mu mbanza iê u bhanga izuua itatu, anga u tunda mu Sezaleia, u banda ku Jeluzaleme.

² Jinganga ja makota, ni makota mʼ athu ku Jijudé, anga a mu kana kuenioko ni kutatela Phaulu.

³ Anga a mu dionda ku a bhanga favolo ia kutuma Phaulu nʼ eze ku Jeluzaleme. Kifua iene o ndunge iâ ia ku mu batamena mu njila nʼ a mu jibhe.

⁴ Festu-phe ua a vutuila kuma Phaulu a mu bhake mu Sezaleia, o muène kuene kuanda kuia kindala.

⁵ Uixi: Oso-phe adiakime a tena mudienu, tu kulumukina kumoxi, muthu iú se ua bhange kiaiibha, ni a mu kuzale.

⁶ Festu kia zubha kubhanga-nâ nake diâ kizuua, mba dikuinhi, ua kulumuka ku Sezaleia. Kimene kiê anga u xikama ku kibhuna kia milonga, hé u tuma kutakana Phaulu.

⁷ Muène kia zubha o kuiza, Jijudé ja tundu mu Jeluzaleme ji mu bhaka bhu ʼaxaxe ni ku mu tatela ima iavulu iaiibha, maji iene ioso-phe ki i moneka umbangi.

⁸ Phaulu-phe mu kufûnda kuê, uixi; Eme ni ku Kitumu kia Mozé, ni ku Tembulu, ni kua Sézalu, ki kuala nga mu te kituxi.

⁹ Festu-phe mukonda ua mesena kudibhomba ku Jijudé, ua kumbulula Phaulu, uixi: Eie uandala u banda ku Jeluzaleme, nʼ a ku fundise o makʼ ama kuenioko bhu pholo iami?

¹⁰ Kuala Phaulu-phe: Eme ngemana bhu kibhuna kia Sézalu kia milonga, kuma bhene bha tokala o ku ngi fundisila. O Jijudé ki ngala ngi mukua kikuma kiâ, eie-muene ua kʼijiia.

¹¹ Se ngala ngi mukua kikuma kia kutondala o Kitumu, mba nga te kituxi ki tokala ku ngi jibha, ki ngi ditunu kufua. O ki kala ima ioso ia ngi tatela mala iá ki ia kidi, kana ue muthu u tena ku ngi thelekala kua ene. Kala kiki, eme nga fundila kubhiẋila kua Sézalu.

¹² Kieniokio, Festu kia zubha o ku di kunda ni jindongixi jê, uixi: Eie ua fundila kubhikila kua Sézalu, kua Sézalu; kuene muene ku uia.

Nguvulu Festu ni Sobha Ngilipa

¹³ Kia bhiti izuua, sobha Ngilipa ni Mbelenise, mukajʼê, a tula mu Sezaleia mu kuhindula ni kumenekena Festu.

¹⁴ O kia kala mu kuinduluka izuua iavulu, Festu u tanga o mulonga ua Phaulu kua Sobha, uixi: Sai diiala kunu a mu xi ku upelezo kuala Fele.

¹⁵ Muenʼiú ki ngaii mu Jeluzaleme, o jinganga ja makota ni adiakime a Jijudé a mu tatela ima, iá a ngi bhingi ku mu êlesa.

¹⁶ Eme nga a vutuila, ngixi: Ku akua Roma ki kiene-ku, kia muthu ku mu bhakula ngó kiokio, kikale uoso a mu te mulonga u mona ku pholo iê oso a mu kuzala, nʼ a kale ni kididi kia ku mu fundisa phala ku di zula o muiônga uê.

¹⁷ Ene oso kiá bhongoloka kunu-phe, eme ki ngi kokoloka dingi; kuakie ngo nga xikama kiá ku kibhuna kia milonga, o diiala anga ngi mu tuma.

¹⁸ Ene o nguma jê a mu kuzala, ki emana mu kufûnda, ka mu tange ni ikuma iaiibha uila ki nga fikile.

¹⁹ Kima kimoxi ki nga mono, a kuata-nê ngó jiphata ja ubhezelu uâ ene, ni ja muthu uafua kiá a mu ixana Jezú. Kuma Phaulu uixi, iú-ué ni muenhu.

²⁰ Eme kuma mu thulu mua ngi xiti kioso ki ngi tetulula o makʼama, Phaulu nga mu ibhula se u banda ku Jeluzaleme nʼ a mu fundise kuenioko.

²¹ Phaulu-phe ua fundila kuila o mulonga uê u bhixile kua Muenexi, iú ua bhingila kukala mu ʼaleia katé Muenexi kia tetulula o mulonga uê. Eme nga tumu o masoladi ku mu bhaka, katé ki ngi tena ku mu tumikisa kua Sézalu.

²² Bheniobho Ngilipa anga u ambela Festu, uixi: Nginda o diialʼ idi eme-muene ue ngi mu ivua. Festo uixi: Mungu, u mu ivué.

²³ Ki kuakie, Ngilipa ni Mbelenise eza ni kukemba kuavulu. A bokona mu sala, ni jikomanande, ni makota ʼathu mu mbongeʼomo. Festu bheniobho anga u tuma Phaulu eze.

²⁴ Festu anga u zuela, uixi: Eie u sobha Ngilipa, ni enu mu athu oso tua bhongoloka mueniumu! Talenu o muthu iú! A ngi bhingi-nê kuala o mundu uoso ua Jijudé, kutale ala kunu, uixi ala ku Jeluzaleme, a mu tatela ima iavulu bhu pholo iami. Ene a jiji exi: O iú ki muthu ua kukala dingi ku muenhu.

²⁵ Eme-phe ki ngi mu mono ni kituxi ki tokala ku mu jibha. Kuma-phe o muène ue ua fundila kubhiẋila kua Muenexi, eme ue kuene ku nganda ku mu tumikisa.

²⁶ Maji katé kiki, ki ngala-phe ni kima kia jimbuluka kia kusonekena ngana iami. Kiene lelu ki nga mu katuila bhu pholo ienu, kota dingi bhu pholo ié u sobha Ngilipa, phala ki tu zubha o ku mu ivua, ngʼ ijiie kioso ki ngi soneka.

²⁷ Kuma nga ki mono uoua, o kutumikisa pelezo, nʼ u kambe kujimbula kiambote o muiônga uê.