Jipoxolo 24 - O Mikanda Ikola

Phaulu bhu pholo ia Fele

¹ Kia bhiti izuua itanu, nganga ia dikota Ananiia u kulumuka ku Sezaleia, ni adiakime amoxi-ku, ni muzuedi jina diê Teletulo, o kia bhixila kua nguvulu Fele a kuzala Phaulu.

² Teletulo kia mu ixana, u kuata kufunda, uixi: Eselênsia diê Ngana Nguvulu! Mukonda dia kutumina kué kua unjimu, kokué tua muena-ku kutululuka kuavulu, o ku muanu ué, o usueia ua tebhunuka mu kifuẋʼ iki.

³ Kuene kuoso sai ima iavulu ia mu bhanga mu ithangana ioso phala o mbote ia Jijudé, o kienʼiki tua mu ki tambulula ni kusakidila kuavulu, Eselênsia dié Na Fele.

⁴ Ki ngi mesena ku kudia kithangana ni ngi ku kumisa ngó ni kuzuela, maji nga ku diondo, mu kulenduka kué u tuive dingi ngó kathangana kofele.

⁵ Kuma o diialʼ idi tua mu ijiia, ua di fangana dibhebhu. Muène mukua kukitukisa o Jijudé mu ngongo ioso, muenʼiú kihuende mu kisoko kia akua Nazalé.

⁶ Uate-ku ue o kusota kukasanesa o Tembulu, etu tua mu kuata. [Tueji-phe ku mu fundisa kala ki ala mu Kitumu kietu.

⁷ Maji Komanande Lizio ua tu sangele, anga u mu tambula bhu maku etu ni kusuina kuavulu. Iú ua tumu oso a mu kuzala, kuiza kunu ko-kué.

⁸ Eie-muène se u mu tokuesa,] uanda kuijiia ima ioso i tua mu kuzala.

⁹ Jijudé anga ji mu kuatekesa mu kufunda exi imʼ iii ia kidi.

Phaulu u di bhangela bhu pholo ia Fele

¹⁰ Nguvulu kia mu bhalula kuila a zuele, Phaulu ua kumbulula uixi: Mukonda ngejiia kuila eie ua bhange kia mivu iavulu ni kufundisa o kifuẋʼ iki kia Jijudé; kia ngi uabhela ue o kufunda bhu pholo ié.

¹¹ Tuma ku kʼijiia eie ngana, kuila kua tena ngó kuinhi dia kizuua ni kiiadi, tunde ki nga bandele ku Jeluzaleme mu kubheza Nzambi.

¹² Mu Tembulu ka ngi sange-mu nga kuata jiphata ni muthu, mba ngala kuvunza mundu, né mu malombe, né mu nzunga.

¹³ O ima ia ngi tatela ue bhabha, ki i moneka mbangi ia kidi.

¹⁴ Maji ngi fisala kima kimoxi kokué, ngana: Eme nga mu kaiela o Njila ioio ia mu kuixana ene o Jijudé exi ia makutu; maji phala eme-phe, uene o uendelu u nga fuama kubhikila na-u Nzambi ia jitata jetu. O ima ioso iosoneke mu Kitumu kia Mozé, ni mu madivulu ma jipolofeta, eme nga i xikana.

¹⁵ Ngala ue ni kudielela kua Nzambi, ni ene iá na-ku, kuma hádia kukala difukunukinu dia athu aiuka ni athu abhukumuka.

¹⁶ Mukonda dia kiki, nga kuata muanu ua kukala ni muẋima ua kambe o kuêla, ni kua Nzambi ni ku athu, izuua ioso.

¹⁷ Kua ngi bhitila mivu iavulu ku makanga, eme ngejile kubhekela o kifuẋi kietu jimola ni maujitu.

¹⁸ O ki nga kexile mu kubhanga kiki, kuila nga zubha kiá o kikalakalu kia kudibonza, Jijudé jimoxi-mu kiene kia ngi sangele mu Tembulu. Maji ki nga di bande ni mundu uavulu, ki ngi kuata ue mvunda ioso-ioso.

¹⁹ Kua kexile-phe ni Jijudé jimoxi-moxi ja tundu ku Azia. Enʼió ene a fuamene kukala bhenhabha bhu pholo ié ni a ngi kuzale, se ngi mukua mulonga uâ.

²⁰ O kia kamba-bhu, enʼiá a tange kioso o kikuma kia ngi muene na-kiu, kioso ki ngemanene bhu pholo ia Kionge kia Dikota.

²¹ Hé kima, kikale o dizui ngó ki nga di kolele mu ʼaxaxe kâ, ngixi: O kudielela kua madifundu ni kufukunuka kuâ, kuene kua ngi bhekela o mulonga iú, u muala ku ngi fundixila enu bhabha lelu.

²² O Fele-phe kuma o Uendelu iú ua uijiia kiambote, ua a kingisa hanji, uixi: Katé hinu kià kulumuka Komanande Lizio, kiene ki ngi tetulula o makʼama.

²³ Anga muene u tuma Kabhitangu kuila a te muthu phala a tambule konda ia Phaulu. Maji o upelezo uê u kale uofele, makamba mê ka a fudise ku mu dikila.

Phaulu bhu pholo ia Fele ni Nduluxila

²⁴ Kia bhiti izuua, Fele ueza ni Nduluxila, muhatuʼê, kuma Judé. Anga u tuma kuixana Phaulu, phala ku mu ivua o maka ma kixikanu kia Jezú Kristu.

²⁵ Maji kioso Phaulu kia kala mu kulombolola kioso ki kala o kuiuka, ki kala o kutolola jihanji, ki kala o kufundisa kua hádia, Fele ua teketa, iú ua kumbulula, uixi: Kindala ndeie hanji. Hinu ki ngi kala ni thembu, ngi ku ixana dingi.

²⁶ Ku mbandu iamukuâ, Fele ue ua kexi mu dielela kuma Phaulu uanda ku mu bhana kitadi. Kiene kia tumina jinga luavulu ku mu ixana, hé u kala mu zuela-nê.

²⁷ Kia tena mivu iiadi-phe, Fele a mu Iendela ku unguvulu kuala Poloxo Festu. O Fele-phe, kuma ua mesenene kudiuabhesa ku Jijudé, ua xiê Phaulu mu ʼaleia.