Jipoxolo 23 - O Mikanda Ikola

¹ Phaulu bhenhobho Kionge kioso u kʼixi sûi, uixi: Enu akuetu! Eme ngende bhu pholo ia Nzambi ni muẋima ua kidi, katé mu kizuua kia lelu.

² Nganga ia dikota Ananiia, anga u tuma ió a mu imanena, ku mu bha huxi ku dikanu.

³ Phaulu anga u mu ambela, uixi: Kamangonha! Nzambi hinu u ku bhela-kiu eie kaxtiku! Mukonda eie ua xikamena ku ngi fundisa kia tokala mu Kitumu, kifua eie dingi u tondala o Kitumu, anga u tuma ku ngi bhesa huxi? Kiokio mu Kitumu ki kiala-mu!

⁴ Ene emana-bhu, ambela Phaulu, exi: Kifua o nganga ia dikota, mubhikʼa ngene a Nzambi, eie u mu xinga?

⁵ Phaulu uixi: Ki nga kʼ ijiia akuetu, kuila muène nganga ia dikota. Kuma kiosoneke mu Mikanda Ikôla, kuila: Mufundixiʼ a mundu ué, kana ku mu zuela kiaiibha.

⁶ Phaulu kia mono kuma kaxaxe-kâ ala jisaduzeu, kaxaxe kamukuâ jifalizeu, muène u di kola mu kaxi ka Kionge, uixi: Enu akuetu, eme ngi falizeu, ngi monʼ a falizeu. O kudielela kua madifundu, ni kufukunuka kuâ, kuene kua ngi bhekela o mulonga uenʼiú uala ku ngi fundixila!

⁷ Kia zubha o kuzuela kiki, kia bhekela mvunda mu jifalizeu ni jisaduzeu, o Kionge anga ki di uana mu ʼaxaxe.

⁸ Kuma o jisaduzeu akua kuila exi: ki kuene kufukunuka kua madifundu, ki kuene jinzumbi, ki kuene ji-anju. Maji o jifalizeu ima ioso iii a i xikana, exi sai.

⁹ Anga ki bheka jibuia javulu. Amoxi ku jimesene ja Kitumu, a tokala ku jifalizeu, emana, hé a zoka exi: Etu muthu iú ki tu mu mono ni kikuma. Sumba kuala nzumbi mba anju muene ia mu zuelesa!

¹⁰ Mvunda anga i vula, katé Komanande, mukonda dia hele ia Phaulu ku mu sanujuna kua ene, u tuma o masoladi kutuluka, ni ku mu katula ni kusuina mu ʼaxaxe kâ, phala ku mu bheka dingi mu mbonge.

¹¹ Usuku uenʼió Ngana anga u tukulukila Phaulu, hé a mu imanena bhu mbandu iê, uixi: Kolokota! Kala ki ua bhana o umbangi uami mumu mu Jeluzaleme, kiene ue ki ua kà bhana umbangi mu Roma.

Ndunge ia Jijdué phala kujibha Phaulu

¹² Ki kuakie-phe, Jijudé ja di kase, anga a ta kikutu kia kudilokela ni mázui, exi: Ki tudi, ki tunu, katé tua jibha Phaulu.

¹³ Mala a te o kikutu kiki, ala makuinhi a uana a muthu ndenge.

¹⁴ Ene anga a bhixila ku jinganga ja makota ni adiakime, exi: Etu tua di kutu ni mazui mavulu, kuila ki tudi, ki tunu, katé tua jibha Phaulu.

¹⁵ Kiki-phe ni enu ni Kionge kia Dikota kumoxi, mu tuma kuambela Komanande kuma a bheke Phaulu bhu pholo ienu. Muila kala o mulonga uê muʼ andala mu u tetulula dingi kiambote. Etu-phe, uila ngó u tula, tuala polondo ku mu jibha.

¹⁶ Maji o muebhu a Phaulu-phe, monʼ a phangʼ iê ia muhatu, u kʼivua kioso kia mu batamena, anga uiza u bokona mu mbonge, u ki tangela Phaulu.

¹⁷ Phaulu anga uixana Kabhitangu kamoxi, u mu ambela, uixi: Munzangala iú mu bheke kua Komanande, a mu kunde tumaka.

¹⁸ Kabhitangu anga uia-nê, u mu bheka kua Komanande, uixi: Pelezu ió, Phaulu, ua ngʼ ixana, iú ua ngi bhingi ku ku bhekela munzangala iú. Uixi muene uandala ku ku kundila tumaka, ngana.

¹⁹ Komanande anga u mu kuata mu lukuaku, u sondoloka-nê bhu mbandu, hé u mu ibhula ku ubheka, uixi: Maka mahi u uandala ku ngi kundila?

²⁰ Muene uixi: O Jijudé ja di longesa ku ku bhinga mungu kutuluka ni Phaulu bhu Kionge kala mulonga uê uanda ku u ibhula dingi kiambote.

²¹ Eie-phe ku a evue. Kuma ku mundu uâ, makuinhi a uana a muthu ndenge, a mu batamena phala ku mu jibha. Ene oso a di kutu ni mulôko ua mázui kuma ka-di, ka-nu, katé kia jibha Phaulu. Kienʼiki ala kia polondo, a kinga ngó o kizuelu kié.

²² Komanande anga u sulula o munzangala ni ku mu tendelela, uixi: Kana ku ki tangela muthu, kuila imʼ iii ua ngʼ ivisa-iu.

Komanande u tumikisa Phaulu ku Sezaleia

²³ Komanande anga uixana Kabhitangu jiiadi, uixi: Polondalenu hama jiiadi ja masoladi aia ku Sezaleia, ni makuinhi sambuadi a muthu, akua kumondala o jikabalu, ni akua jisosa, a kala hâma jiiadi, phala a katuke mu ola ia kavua ia usuku.

²⁴ A kale ue ni jimonde, o Phaulu a mu mondalese, a mu bheke ni sauidi kua nguvulu Fele.

²⁵ Komanande anga u soneka mukanda kala kiki:

²⁶ Eme Kalaudio Lizio, nga tumu kumenekena eselênsia diê nguvulu Fele.

²⁷ Muthu iú a mu kuatele kuala Jijudé, andakele ku mu jibha. Anga ngʼa tulukila ni masoladi, hé ngi mu tambula, kuma ngevu kuila mukua Roma.

²⁸ Eme kuma nga mesenene kuijiia kiambote o mulonga uê, kioso kia mu zembela, nga mu bheka bhu pholo ia Kionge kia Dikota kia Jijudé.

²⁹ Maji nga sange kuila a mu tatela milonga ia kitumu kiâ ene. Ka mu tange-phe ni kima ki tokala ku mu jibha, mba ku mu kuika.

³⁰ Kia ngʼ ivisa kuma muène o Jijudé a mu batamena phala ku mu jibha, nga kalanga-phe ku ku tumikisanê koko. Eme nga tangela ió oso a mu tatela, kuila a mu kuzale ko-kué, eie. Mahezu!

³¹ Masoladi anga a bhanga kioso kia a tumu. A katula Phaulu hé a mu bheka ni usuku katé ku mbonge ia Andipatile.

³² Mu kimene-phe o masoladi a mu xila o akua kumondala jikabalu ku mu bheka, ene há a vutuka ku mbonge.

³³ Enʼió kia zubha kutula mu Sezaleia, a thelekala o mukanda kua Nguvulu ni Phaulu a mu bhiẋidisa.

³⁴ Nguvulu kia zubha kutanga o mukanda, uibhula Phaulu se muene mukua sengu kuẋi. O ki evu kuma mukua Silisia,

³⁵ Uixi: Ngi ku ivua kiambote kianda kuiza ió oso a ku xitala. Anga u tuma ku mu bhaka mu kinzo kia Helode.