Jipoxolo 22 - O Mikanda Ikola

¹ Enu mu akuetu, jiphange, nʼ enu mu jitata, ngʼ ivienu kioso ki ngi di lombolola lelu bhu pholo ienu.

² O kia mu ivu ua a zuelela mu dimi dia Hebeleu, edi ni ene hûdi! O phaulu phe, uixi:

³ Eme ngala ngi Judé, a ngi vualela mu Talaso, ku Silisia, a ngi sasela-phe mu mbanza ia Jeluzaleme muenʼiumu, bhu inama ia mesene Ngamadiiele. A ngi longo ni muanu uoso mu Kitumu kia jitata jetu, hé ngi kala mu suinisa Nzambi, uila enu oso ue ki mua mu suinina leluʼ idi.

⁴ Akua Uendelu iú nga a zukutisa jinga katé ni ku a jibha; ngi kala mu ku a kuta ni ku a thelekala mu ʼaleia, ni mala ni ahatu.

⁵ O muène nganga ia dikota u ngi kala mbangi kuma kiene kiabhiti, ni adiakime oso a tokala ku Kionge kia Jitata. Mukonda kua ene kuene ku nga tambuile o mikanda ia sonekena akuetu, o Jijudé ja kexile mu Damasku. Anga ngi katuka kuia ku Damasku mu kutakana oso ala kuenhoko, ni ku abheka mu Jeluzaleme ku malubhambu, phala ku a bhana kaxtiku.

Phaulu u tanga o ubhulukilu ue

⁶ Phaulu anga u kuata kuzuela, uixi: O ki ngi kala mu kuenda mu njila-phe, nga zukama kiá mu Damaxiko, mu kumbi dia mediia, nga tukumuka kua ngi tuila mukengeji ua dikota ua tundu mu diulu.

⁷ Anga ngi di bhala bhoxi, ngʼ ivua dizui dixi: Saulo, Saulo! Eme ualu ngi zukutixila-hi?

⁸ Ngetaia, ngixi: Eie nanhi, Ngana? Kuala Muène: Eme Jezú dia Nazalé, ualu ngi zukutisa.

⁹ Mala ene ngende-nâ, o mukengeji a u mono kidi. O dizui-phe ka dʼivu dia ió ua ngi zuelesa.

¹⁰ Ngixi-phe: Ngi bhanga kiebhi, Ngana? Ngana uixi: Balumuka, u bhixile mu mbonge ia Damasku. Mueniomo muene mua kà ku jimbuila ima ioso Nzambi ia ku mesena ku i bhanga.

¹¹ O ki nga lémbua kumona mukonda dia kubenha kua mukengeji uenió, akuetu u ngala-nâ a ngi kuata mu lukuaku, hé a ngi batesa katé mu Damasku.

¹² Mueniomo mua kexile muthu, dijina diê Ananiia. Muenʼiiú mubhezi, mukua kuxila o Kitumu, a mu tumbula kuala Jijudé joso ja tungu mueniomo.

¹³ Muene ueza, ua ngi sange, iú ua ngʼimanena, uixi: Phange Saulo, jikuka o mesu u mone dingi! Kithanganʼokio mesu ma ngi jikuka, anga ngi mu mona.

¹⁴ Muène-phe uixi: O Nzambi ia jitata jetu ua ku solo eie phala kuijiia o vondadi iê, ni kumona Muthu uê Uaiuka, ni kudivila eʼ muene o dizui dia dikanu diê.

¹⁵ Kuma eie uà kala u mbangi iê ku athu oso, ia ima ioso i ua mono, i uevu.

¹⁶ Kiki-phe u lalekela-hi dingi? Balumuka, u bhinge Ngana ku ku kuatekesa, ni a ku batizale, o ituxi iê nda a ku loloke-iu.

O ukunji ua Phaulu

¹⁷ Mu kuzubha Phaulu, uixi: Mu kukala-kukala-phe, nga vutuka ku Jeluzaleme. O ki ngi kala mu samba mu Tembulu, nganjiua kisuma.

¹⁸ Anga ngi mona Ngana uala ku ngʼ ambela, uixi: Lenguluka, u katuke mu Jeluzaleme, kuma athu mumu, ko-kuê ka xikina kutambula-ku umbangi uami eme.

¹⁹ Ngixi-phe: Ngana, ene a ngʼijiia kioso ki nga kutisa jinga athuʼé a ku xikana, eme nga a betesa jinga mu malombe moso ma Jijudé.

²⁰ Ni kia kexi mu bhubhisa o manhinga ma mbangi iê Xitevá, ua tanga jinga o Maka mé, eme ue kituxi kieniokio nga kʼimanena, nga ki xikina. Katé eme-muene nga langele o izuatu ia athu a mu jibha.

²¹ Bheniobho Ngana uixi-phe: Katuka! Eme ngi ku tuma ku makanga, ku matumbu, ió oso ki Jijudé.

²² Ene-phe anga a mu ividila hanji katé bhu kizuelu kiki. Bheniobho kia anga a kuata kukola, exi: Mu jibhienu! Iala ukala kiki, ki muthu ua kukala kulu dia mundu! A-fuê!

²³ O athu ki edi kiki bulukutu, ni kuzula o izuatu iâ, hé a kala mu ku i kukumuina bhulu, ni ku di takela mavu,

²⁴ Komanande u tuma athu kubokona ni Phaulu mu mbonge. Anga ua ambela ku mu tokuesa ni jixikote, phala kuijiia o kikuma kioso kiala ku mu kolela kiki kuala Jijudé.

²⁵ Kia kala-phe mu ku mu kuta ni mikolo, phala ku mu beta, Phaulu uambela Kabhitangu uemana-bhu, uixi: Manhi enu kubeta o mukua Roma, ki ki kôlo? Enu manhi mu tena kubeta muthu kiluua a mu fundisa nʼ a bele?

²⁶ Kabhitangu kia kʼivu, uaii kua Komanande, iú ua mu tangela, uixi: Aiuka kioso ki uanda kubhanga! Iala muenʼ iú monʼ a ngene ku Roma!

²⁷ Komanande anga uiza mù zuela ni Phaulu, uixi: Ngʼambele hanji kima kimoxi: Manhi eie u mukua Roma muene? Uixi: Xi!

²⁸ Komanande ua kumbulula, uixi: Ni eme uami. Ukota iú eme nga u sumba kitadi kiavulu. Phaulu-phe uixi: Eme-phe a ngi vualela-u.

²⁹ Kithangana kieniokio athu andekele ku mu tokuesa a muangana, a mu xa. Ni muene Komanande u kala ni uôma, kia kʼijiia kuila mukua Roma, mukonda ua tumu ku mu kutisa.

Phaulu bhu pholo ia Kionge kia Dikota

³⁰ Ki kukia, kuma Komanande ua mesena kuijiia o kidi kioso kia mu tatela o Jijudé, ua tumu kujituisa o malubhambu oso a kutile-nâ Phaulu, iú ua tumu Jinganga ja makota ni Kionge kioso kia Dikota kubhongoloka. Anga uiza ni Phaulu, hé u mu bhaka bhu ʼaxaxe-kâ.