Jipoxolo 21 - O Mikanda Ikola

Phaulu mu Tilu ni mu Sezaleia

¹ Ki tua zubha ku di uanununanâ, naviiu ia katuka, anga ienda lusolo katé ku kikôlo kia Kozi. O mu kizuua kia kaiadi tua bhixila ku Lode, o kutunda koko, tuia ku Patala.

² Anga tu sanga naviiu ianda kuzauka katé ku Fenixa, anga tu di longa, tu katuka.

³ O ki tua bhixila bhu kididi bhua tu monekena o kikôlo kia Xipele, kikôlo tua ki xie ku kiasu anga tu lunga ku Sidia, hé tu kuaka bhu Tilu, kuma naviiu bhene bhu ianda kulongomuena o imbamba.

⁴ O ki tu sanga-bhu jixibulu, tua xalanâ bhenhobho sambuadi dia kizuua. Enʼiá anga a zuela ni kutena kua Nzumbi Ikôla, a dimuna Phaulu kuma ka kà diote mu Jeluzaleme.

⁵ Maji o ki tua zubha kubhanga izuuʼ oio, tua katuka dingi o njila ietu. Ene oso ni ahatuʼ â, ni anʼ â, hé a tunda mu mbonge mu ku tu xinjikila, anga tu fukama-nâ ku ndundu, anga tu samba, tu di xalesa.

⁶ Etu anga tu di longa mu naviiu, ene a vutuka ku mabhata mâ.

⁷ Ki tua zubha o njila ia naviiu ia kutunda ku Tilu, tu kuaka bhu Potolomaida. Bheniobho jiphange anga tu ji menekena, tu induluka-nâ kizuua kimoxi.

⁸ Ki kuakie, tua katuka, hé tu bhixila ku Sezaleia. Anga tu tula mʼonzo ia Felipe dia mukunji, ua tokala ku sambuadi dia diiakono a a solele mu Jeluzaleme, muène anga u tu langeka.

⁹ Muenʼ iú u kala ni anʼ ê auana a ahatu, hanji ala ilumba, akua uanji ua upolofeta.

¹⁰ Mu kubhanga tu izuua bheniobho, ku Judeia ku tunda polofeta, dijina diê Akabo.

¹¹ Anga u tu sanga, u tambula o phonda ia Phaulu, u di kuta o inama iê-muène ni maku, uixi: Eme Nzumbi Ikôla uambe kiki: Mukua phonda iê iii, kienʼiki kia kà mu kuta o Jijudé mu Jeluzaleme, hé a kà mu thelekala bhu maku ma akua matumbu.

¹² Ki tuevu kiki, ni etu, ni jiphange akua bhata bhobho tu dionda Phaulu tuixi kana kubanda ku Jeluzaleme.

¹³ Kieniokio Phaulu ua kumbulula, uixi: Mu didila-hi kiki, anga mu ngi bhekela lamba diavulu ku muẋima? Kuma eme ngala polondo, ki ku ngi kuta ngó, maji katé ni ku ngi jibha mu Jeluzaleme mukonda dia dijina dia Ngana Jezú.

¹⁴ O ki tua lémbua ku mu fudisa, tua nhoha-ku, tuixi: O vondadi ia Ngana i bhite.

¹⁵ Kia bhiti izuuʼ oio, tua kutu imbamba ietu, hé tu banda ku Jeluzaleme.

¹⁶ Sai jiphange jimoxi-mu, akua mbonge ia Sezaleia, anga aia mu ku tu bheka. Ene hé a tu ambata katé mʼ onzo mu tuanda kutambula o kizalu, ia muthu mukua kikôlo kia Xipele, dijina diê Menasome. Muthu muenʼ iú uala kia kidistá kiokulu.

Phaulu mu Jeluzaleme

¹⁷ O ki tua zubha kubhiẋila mu Jeluzaleme, jiphange ja tu tambulula ni ngalasa iavulu.

¹⁸ Ki kukia, ni Phaulu ni etu tuia mu kudimona ni Tiiaku. Adiakime oso a Ngeleja anga a kala bheniobho.

¹⁹ Phaulu kia zubha o ku a menekena, muène ua a kunda mu kimoxi-kimoxi ima ioso ia bhangesa Nzambi mu ukunji uê ku matumbu.

²⁰ Ene kia zubha ku mu ivua, a ximana Nzambi, anga a mu ambela, exi: Ua mono, mukuetu, o Jijudé ja xikana mu ukidistá ja tena jimidi ni jimidi, maji ene oso a suinina o Kitumu kia Mozé.

²¹ Eie-phe a ku ivu fuma kuma o Jijudé ja muanganena mu matumbu, eie uene ku a longesa kuxa o Kitumu kia Mozé. Evu ue kuila eie uene ku a longesa kukamba kusaia anʼ â, ni kukamba kukuata o ijila ia Jijudé.

²² O ki tualʼiki-phe, tuila kiebhi? Kuma ene olʼ iii a kʼivu kiá kuila eie ueza.

²³ Ndoko, u bhange kioso ki tu ku ambela: Tuala ni mala auana a bhange polomesa.

²⁴ Enʼ ió di bunde-nâ, u di zelese nâ kumoxi, o dixipeza diâ di kale mu konda ié, katé kia bhuta mitue. Mu kiokio ene oso-phe anda ku kʼ ijiia kuma ima ioso ievu, ku ku tatela ki ia kidi. Kuma a mona kuila eie-muene ue, mu uendelu ué mukua kukumbidila o Kitumu kia Mozé.

²⁵ Oso a xikana-phe ku matumbu, tua a sonekena kiá kioso ki tua a tetuluila kuma: Kadie jinge xitu ia iama iojibhe mu kilumbu kia sata ia iteka; kʼ a die jinge ue manhinga a kiama kioso-kioso, mba kudia xitu ia kiama kiokuenhe. Ka kale ue mu kubhanga undumbu.

²⁶ Kieniokio Phaulu ua tambula o mal â kiuana kiâ, o kimene kiê anga u di bonzela-nâ kumoxi. Hé u bokona mu Tembulu u vizala bhoso bhu bhuila o izuua ia dibônzo, ni kioso ki anda kuzubha kubhana o ilumbu ia muthu ni muthu.

Phaulu a mu bhanga pelezo mu Tembulu

²⁷ Ki kua kambele ngoho phala kuzubha o sambuadi dia izuua ia kudibônza, Jijudé ja akua Azia kia mono Phaulu mu Tembulu, a salumuna mundu, hé a mu kuata ni kukola,

²⁸ Exi: Mu akua Izalaiele tu bandienu! Iala muenʼ iú mukua kulongesa o athu kuene kuoso phala kuzemba mundu ua Izalaiele, ni kuzemba o Kitumu kia Mozé, ni kididi kiki, kia Tembulu. Bheniabha iú uala kubheka mu tembulu o athu ió ki Jijdué, phala kukasanesa o kididi kiki kikôla!

²⁹ Ene a zuela kiki kuma a diangele ku mu mona mu nzunga ni Tolofimo, mukua Efezo, iá a fika kuma Phaulu ua mu bheka ue mu Tembulu.

³⁰ Mbanza ioso anga i salumuka, o mundu edi ni ene bulukutu mvengete, hé eza ni kulenga, a kuata Phaulu, a mu sunga-sunga bhu kanga dia Tembulu; kithanganʼokio mabhitu a Tembulu a ma jika.

³¹ O mundu kia kala kia mu sota o ku mu jibhʼ iki, Komanande ua tumina o masoladi moso, a mu bhana o ngolokela kuma Jeluzaleme ioso ia di te mu kavanza.

³² Muene anga u lenguluka, u katula masoladi ni jikabhitangu, u lengela-bhu bhuala ene. O mundu kia mono Komanande ni masoladi, a zumbuka kubeta Phaulu.

³³ Komanande anga u bhixila, bhuala Phaulu, u mu kuata, u tuma ku mu kuta ni malubhambu maiadi. Anga uibhula kiua, uixi: Iala muenʼiú, mukua-hi? O muene ua bhange ihi?

³⁴ Ku mundu-phe iá a dikola kiki, iá a dikola kiki. O Komanande kia mono kuila kana kima kia lomboloka-bhu mukonda dia jibuia javulu, muene ua tumu masoladi phala Phaulu a mu bheke mu mbonge.

³⁵ O kia bhixila ku jixikata, kia bhingile masoladi Phaulu ku mu zangula, mukonda dia mundu kusuina;

³⁶ Kuma kifuẋi kioso kia athu a a nhenganana ni kukola, exi: Mu jibhiuenu! Mu jibhienu!

Phaulu u di bhangela

³⁷ Kiki, kia kala Phaulu mu ku mu bokuesa mu mbonge, uambela Komanande, uixi: Ngana, eie u ngehela ku ku ambela kama? Kuala muène: Eie uejiia kiebhi kuzuela o Ngeleko?

³⁸ Manhi ki eie-muène u mukua Ijitu iuná ua kitukisa athu mu izuua iabhiti, hé u baluka mu kikangalakata ni midi jiuana ja ifumbe?

³⁹ Phaulu-phe, uixi: Eme ngi Judé, a ngi vualela ku Talaso, mbonge ia fumana mu Silisia, ngi mukua bhata mu diembu dia ujitu. Nga ku diondo-phe u ngʼ ehele kutela o mundu tumaka.

⁴⁰ O Komanande anga u xikina. O kia mu ehela, Phaulu uemana ku jixikata, u batela o mundu ni lukuaku phala a di xibhe. O ene oso kia di xibha kia mbote, iú ua a zuelesa mu dimi dia Hebeleu, uixi: