Jipoxolo 20 - O Mikanda Ikola

Phaulu uia dingi ku Masedonia, ni ku Ngelexa, anga u alukila ku Azia

¹ Kia bhiti o jibuia, Phaulu u tuma kuixana o jixibulu, u a suinisa, hé u di lekela-nâ, anga u katuka kuia ku Masedonia.

² O kia zubha kubhita ku madiembu koko, ni ku a longesa maka mavulu, ua bhixila mu Ngelexa.

³ Kia bhange-mu mbeji jitatu, Jijudé ji mu batamena, kia kala mu ku di longa mu naviiu kuia ku Sidia, muène anga u kondoloka, u vutukila ia Masedonia.

⁴ Enʼiâ anga a mu xinjikila katé ku Azia, Sopata mukua Beleia monʼ a Pilu; ku akua Tesalonika, Aristarko ni Sekundo; ni Ngaio mukua Derbe, ni Timote; o ku akua Azia, Tixiko ni Tolofimo.

⁵ Ene oso anga a kalanga a tu kingila mu Tolôua.

⁶ Etu anga tu di longa mu Felipo, tu katuka, kia bhiti o izuua ia Jimbolo ja Kambe Kifulufulu. Anga tu bhanga izuua itanu mu kuzauka, hé tu a sanga mu Tolôua, anga tu xala mueniomo mu sambuadi dia izuua.

Phaulu mu Tolôua

⁷ Mu kizuua kia Sabhalu ku kiemba, anga tu bhongoloka mu kubukula o mbolo kumoxi ni jiphange. Bhenhobho Paulu u a tela maka, anga u sungina ni kuzuela katé mu kaxi ka usuku, mukonda kimene kiê uanda kukatuka.

⁸ Anga mu kala tundeia tuavulu mu sabhalalu mu tua di bhongoluela.

⁹ Anga bhu kala munzangala ua diiala, dijina diê Eutiko, ua xikama bhu njanena, kilu anga ki mu kuata. Kioso-phe Phaulu hanji a kuata maka, kilu kuma kia mu vulu, ua lauka bhoxi tunde ku sabhalalu ia matala atatu. O kieza ku mu zangula, uafu kiá.

¹⁰ Phaulu anga u tuluka, u di sunununa ku thandu diê, u mu bhubhala, uixi: Ki mu tale hadi; muenhu uê iú-uê!

¹¹ O kia bande dingi ku thandu, ua bukula o mbolo, hé a-dia. Anga u kala dingi mu kuta-nâ maka thembu iavulu, katé kuma kuakie, iú ua katuka kiua.

¹² Munzangala anga a mu bheka ni muenhu ku bhata diê, anga a kala mu tana kiavulu.

Mu Tolôua ni bhu Miletu

¹³ Etu-phe hé tu kalanga mu naviiu, tu katuka kuia ku Asose, ku tuanda kubhitula Phaulu. Mukonda muène kiene kia tu tumu, kuma uandala u endela bhoxi.

¹⁴ O kia tu sange ku Asose, tua mu bhitula, hé tuia-nê mu naviiu, anga tu bhixila ku Mitilene.

¹⁵ Kukatuka kuenioko, ki kukia tu lulama ni kikôlo kia Xiio. Mu kizuua kia kaiadi, tu bhita ku Samo, kizuua kiamukuâ tu kuaka ku Mileto.

¹⁶ Kuma Phaulu ua solo kusomboloka, nguê kuimana mu Efezo, mbe kuiengesa kubhanga thembu iavulu mu Azia. Mukonda uala ni lusolo, mbata uandalele se u ki tena, kizuua kia Pendekoxi ki mu bhitila mu Jeluzaleme.

Phaulu u lekela adiakime a Ngeleja ia Efezo

¹⁷ Ku Mileto Phaulu anga u tuma ku Efezo kuixana-ku adiakime a ngeleja ni eze ku di mona-nê.

¹⁸ Ene kia zubha kuiza, Phaulu ua ambela, uixi: Enʼuenu mua kʼijiia, tunde kizuua ki nga dianga kudiota mu Azia, kioso ki ene o uendelu uami mu ʼaxaxe kenu.

¹⁹ Nga sedivila Ngana ni kubatâma kuoso, ni masoxi. O kieniokio, sumbala ni iluezu i nga bhiti na-iu mukonda dia Jijudé ku ngi ta ikutu.

²⁰ Enu mua kʼijiia ue kuila nga bhange ioso mu ku mi kuatekesa, ki nga fulu ku mi tangela kima ki tokala ku mi bhanga mbote. Nga mi tudila o Njimbu Iambote, nga mi longela jinga bhu nangu dia mundu, ni ku mabhata, inzo ni inzo.

²¹ Ngʼedikiza jinga ni Jijudé ni Jingeleku, kuma a bhingi kudiela ni kueha o ituxi iâ bhu pholo ia Nzambi, ni kuxikana kua Ngana ietu Jezú Kristu.

²² O kiki-phe, talesenu, mu kutumaka o Nzumbi Ikôla, muẋima ua ngi bhindamesa kuia ku Jeluzaleme, sumbala kioso kia kà ngi bhita koko ki nga kʼijiia.

²³ Ngejiia ngó, kia ngi bhana Nzumbi Ikôla umbangi, kuma mu jimbonge joso mua ngi xikamena jikaleia ni jihadi.

²⁴ Ki nga suu-phe kima. Né o muenhu uami ki ngʼ u jijila, kabasa ngi zubha o njila ia ngi xindi, ni ukunji ua ngi bhana Ngana Jezú. O ukunji uenʼ iú: O kubhana umbangi ua Njimbu Iambote ia kiadi kia Nzambi.

²⁵ Kiki-phe talesenu, nga kʼ ijiia kuma enu oso mu nga nhungina jinga ni kulonga o Utuminu ua Nzambi, o pholo iami ki mua kà i mona dingi.

²⁶ Kiene ki nga mi bhela-phe umbangi kizuua kia lelu, kuma nga zele, kana muthu mudienu u texika, o manhinga mê ni ma ngi kala ko-kuami.

²⁷ Kuma ki nga fulu ku mi jimbuila o mutendelu uoso ua Nzambi.

²⁸ Di langienu-phe enʼuenu, ni kilunga kioso, kuma o Nzumbi Ikôla ua mi bhange mu abidi a kilunga kienʼiki. Kalenu-phe mu abidi a ngeleja ia Ngana Nzambi, kuma Muène ua i sumbu ni manhinga ma Monʼ êlele muene.

²⁹ Mukonda ngejiia kuma, ki nganda kutunda-bhuʼ iki, kuanda kuiza jimbinji ji kaka mu ʼaxaxe kenu, ki ji kala ni henda ia kilunga.

³⁰ Ni mudienu muene, hinu mu moneka athu a tanga ima ia makutu, ia kutondalesa, hé a sunga jixibulu ku mbandu iâ.

³¹ Uila kiki di langienu, mu xinganeke kuma, mivu itatu iosuʼiii, ni mu muanha ni mu usuku, ki nga fulu dingi o ku mi dimuna, muthu ni muthu mudienu, ni masoxi.

³² Kiki-phe nga mi xalesa ni ku mi bhakula kua Nzambi ku mi langa, ni mu Njimbu iê ia kiadi i tena o ku mi tunga. Mukonda Muène ua ki soko o ku mi kuatekesa ni muie dingi ku pholo mu nzumbi, ni ku mi bhana o mabesá ió a bhaka Muène phala o mundu uê uoso.

³³ Kana muthu nga mu kuatela luimbi lua phalata iê, mba ulu, mba izuatu.

³⁴ Enʼuenu mua kʼijiia kuma o maku ami iá, ene a ngi bhandulula mu ioso i tua bhindamene na-iu, ni eme ni akuetu u nga di nhengene-nâ.

³⁵ Mu ima ioso nga mʼ idikiza kioso ki mua fuama kukalakala ni kubhindumuna mukuenu ua tate. Endenu ni kuxinganeka o kizuelu kia Ngana Jezú, ki edile uixi: O kubhana kota mu kuzediuisa, o kutambula ndenge.

³⁶ Phaulu kia zubha o kuzuela kiki, u fukama ni jiphange ene oso, anga u samba-nâ kumoxi.

³⁷ Ene oso anga a dila kisoxi, a di bhubhala ni Phaulu, a mu bhana jibeju.

³⁸ Mukondo ua a vudila kiengi, mukonda dia kizuelu kiê kia kuila, o pholo iê ka kà i mona dingi. Anga a mu xinjikila katé kia di longo mu naviiu.